कर्नाटकातील शृंगेरी मतदारसंघात २०२३मध्ये काँग्रेसचे आमदार राजेगौडा यांनी भाजपाच्या जीवराज यांना अवघ्या २०० मतांच्या फरकाने पराभूत केले होते. त्यासंदर्भात पोस्टल बॅलेटची पुनर्मोजणी रविवारी पहाटे पूर्ण झाली, पण त्यामुळे नव्याने वाद निर्माण झाला. पुनर्पडताळणीदरम्यान डी.एन. जीवराज यांनी विद्यमान काँग्रेस आमदार टी. डी. राजेगौडा यांना केवळ ५२ मतांनी मागे टाकले. यामुळे आता जीवराज हे विजयी ठरले आहेत. मात्र अधिकाऱ्यांनी अधिकृत निकाल जाहीर केलेला नाही; त्याऐवजी निकाल सीलबंद लिफाफ्यात भारतीय निवडणूक आयोगाकडे पाठवला आहे.
ही पुनर्मोजणी कर्नाटक उच्च न्यायालयाने एप्रिल २०२६ मध्ये दिलेल्या आदेशानुसार करण्यात आली होती, ज्याचा उद्देश २०२३ च्या निवडणुकीतील २०१ मतांच्या अल्प फरकाचा निकाल स्पष्ट करणे होता. आता पोस्टल मते मोजल्यावर काँग्रेसने त्यात काहीतरी छेडछाड केल्याचा आरोप केला आहे.
वादाचा मुद्दा २५५ पोस्टल बॅलेटबाबत आहे, ही मोजणी २०२३ मध्ये राजेगौडा यांच्या बाजूने वैध मानली गेली होती, पण रविवारी ती मतमोजणी अवैध घोषित करण्यात आली. निवडणूक अधिकारी गौरव शेट्टी यांनी सांगितले की, जीवराज यांची मते जवळपास स्थिर राहिली (६९२ वरून ६९०), तर राजेगौडा यांची मते ५६९ वरून ३१४ वर घसरली.
राजेगौडा यांनी म्हटले, “२०२३ मध्ये सर्व पक्षांच्या प्रतिनिधींसमोर ही मते वैध मानली गेली होती. तीन वर्षांनंतर ती अवैध ठरवणे समजण्यापलीकडचे आहे.” त्यांनी असा आरोप केला की त्यांच्या मतपत्रिकांवर आता “अतिरिक्त चिन्हे आणि रेषा” दिसत आहेत, जी मूळ मोजणीवेळी नव्हती.
राजेगौडा यांचे मोजणी प्रतिनिधी सुधीर कुमार मुरोळी यांनीही सांगितले, “फक्त आमच्या मतांच्या गठ्ठ्यांनाच अवैध ठरवण्यात आले.” त्यांनी माजी निवडणूक अधिकारी वेदमूर्ती, माजी उपआयुक्त के. एन. रमेश आणि जीवराज यांच्याविरुद्ध पोलिस तक्रार दाखल केली आहे, ज्यात २५५ मतपत्रिकांमध्ये गुन्हेगारी छेडछाड केल्याचा आरोप आहे.
हे ही वाचा:
जपानमधील भीषण जंगलातील आग ११ दिवसांनी नियंत्रणात
गोखिवरे कचरा घोटाळ्याचा महासभेत स्फोट!
मेरठ-प्रयागराज: विकासाची ‘गंगा’
अमेरिकेचा F-16 रडार सपोर्ट करार भारतासाठी चिंता वाढवणारा? कसा ते घ्या जाणून
पुनर्मोजणी सुरू होण्यापूर्वीच, राजेगौडा आणि त्यांच्या प्रतिनिधींनी स्ट्राँगरूममधील काही मतपेट्यांच्या कुलूप आणि सीलमध्ये छेडछाड झाल्याचा संशय व्यक्त केला होता.
अधिकृत निकाल जाहीर न झाल्यानेही, जीवराज यांनी रविवारी सकाळी विजयाचा दावा केला. “पुनर्पडताळणीत काँग्रेस उमेदवारांची मते मोठ्या प्रमाणात कमी झालेली दिसत आहेत. मला लगेच निवड प्रमाणपत्र मिळेल अशी अपेक्षा होती, पण आम्ही आयोगाच्या आदेशाची वाट पाहू,” असे ते म्हणाले.
उच्च न्यायालयाने एकूण २७९ नाकारलेल्या पोस्टल बॅलेटची पुनर्पडताळणी करण्याचे आदेश दिले होते. ही पुनर्मोजणी २०२३ च्या निवडणुकीचा अंतिम निकाल स्पष्ट करण्यासाठी करण्यात आली, ज्यात राजेगौडा यांना ५९,१७१ मते आणि जीवराज यांना ५८,९७० मते मिळाली होती.
