इंडोनेशियाच्या सागरी हद्दीत, बाली आणि लोंबोक दरम्यानच्या सामरिकदृष्ट्या महत्त्वाच्या सामुद्रधुनीतील बेटाजवळ एक चिनी हेरगिरीचे उपकरण सापडले आहे. टॉर्पेडोसारख्या दिसणाऱ्या या वस्तूचे वर्णन तज्ञांनी पाण्याखालील पाळत ठेवणारी प्रणाली म्हणून केले आहे. तसेच पाण्यात सापडलेले मानवरहित पाणबुडी वाहन (UUV) ही एक चिनी सागरी निगराणी प्रणाली असल्याचे इंडोनेशियन संरक्षण विश्लेषकांनी म्हटले आहे. तथापि, बीजिंगने या चिंता फेटाळून लावल्या असून, याचा अतिअर्थ लावण्याची किंवा त्यावर संशय घेण्याची गरज नाही, असे म्हटले आहे.
इंडोनेशियाची सरकारी वृत्तसंस्था ‘अंतारा’नुसार, गेल्या आठवड्यात लोंबोक सामुद्रधुनीतील गिली ट्रावांगन बेटाच्या उत्तरेला एका मच्छीमाराला ३.७ मीटर लांबीचे हे उपकरण सापडले. सागरी संरक्षण विश्लेषक एच. आय. सटन यांनी हे उपकरण चायनीज ७१० रिसर्च इन्स्टिट्यूटने विकसित केलेली ‘डीप-सी रिअल-टाइम ट्रान्समिशन मूरिंग सिस्टीम’ असल्याचे ओळखले. मिळालेल्या माहितीनुसार, ७१० रिसर्च इन्स्टिट्यूट ही चीनच्या सरकारी मालकीच्या चायना शिपबिल्डिंग इंडस्ट्री कॉर्पोरेशन (CSIC) चा एक भाग होती, जिचे नंतर चायना स्टेट शिपबिल्डिंग कॉर्पोरेशन (CSSC) मध्ये विलीनीकरण झाले. ही संस्था पाण्याखालील हल्ला आणि संरक्षणावर लक्ष केंद्रित करते, असे सटन म्हणाले आणि त्या परिसरात त्या उपकरणाच्या उपस्थितीबद्दल चिंता व्यक्त केली. यावरून असे सूचित होते की, चीनकडे सामरिक जलमार्गांमधील पाण्याखालील परिस्थितीची रिअल-टाइम माहिती पुरवणाऱ्या या सेन्सर्सचे जाळे असू शकते, जे त्यांच्या पाणबुडी कारवायांना मदत करेल, असेही ते पुढे म्हणाले.
सटन यांच्या मते, ही प्रणाली समुद्राच्या तळाशी असलेल्या नांगराला बांधण्यासाठी तयार केली आहे आणि ती पृष्ठभागावर तैनात केलेल्या कम्युनिकेशन बॉयजद्वारे माहिती प्रसारित करते. या उपकरणाची वैशिष्ट्ये स्पष्ट करताना सटन म्हणाले की, त्यात बसवलेले सेन्सर्स तापमान, खोली, प्रवाह, ध्वनी आणि लक्ष्याच्या माहितीसारख्या गोष्टींवर लक्ष ठेवतात. या उपकरणावर CSIC ही अक्षरे आणि कॉर्पोरेशनचा लोगो होता. मिळालेल्या माहितीनुसार, ही मूरिंग प्रणाली केवळ चीनपुरती मर्यादित नाही, तर अमेरिका, जपान आणि भारत यांसारखे इतर देशही तिचा वापर करतात.
हे ही वाचा:
गोल टोपी नको, शाल चालेल! सम्राट चौधरींची कृती चर्चेत
अंतराळातील देखरेख वाढवण्यासाठी ईशान्येत रडार, लडाखमध्ये टेलिस्कोप!
कॉर्पोरेट जिहादप्रकरणी मानवाधिकार आयोगाच्या नोटिसा
समुद्राचे तापमान आणि क्षारतेविषयी माहिती मिळवल्याने चीनला आपल्या पाणबुड्यांना सोनारच्या शोधापासून वाचवता येते. यामुळे चिनी पाणबुड्यांना कोणाच्याही लक्षात न येता हिंद महासागरात प्रवेश करता येतो. हे उपकरण समुद्रतळाचा नकाशा तयार करते. युद्धाच्या परिस्थितीत सुरुंग पेरण्यासाठी किंवा पाणबुड्यांना सुरक्षित ठिकाणी तैनात करण्यासाठी ही माहिती उपयुक्त ठरते.