अफगाणिस्तानातील हेलमंड प्रांतात एका सहा वर्षांच्या मुलीचे लग्न तब्बल ४५ वर्षीय व्यक्तीशी लावल्याचे समोर आले आहे. ही घटना समोर येताच त्याचा आंतरराष्ट्रीय स्तरावर निषेध करण्यात आला. पैशाच्या बदल्यात अल्पवयीन मुलीचे लग्न लावण्यात आल्याची माहिती आहे. २८ जून रोजी अमेरिकेतील अफगाणिस्तानातील वृत्तसंस्था Amu.tv ने पहिल्यांदा ही घटना नोंदवली होती. ही घटना मारजाह जिल्ह्यात घडली.
हश्त-ए-सुब डेलीच्या वृत्तानुसार, वर आधीच विवाहित असून त्याला दोन बायका आहेत. द टाईम्स ऑफ इंडियाच्या बातमीनुसार, स्थानिक सूत्रांनी सांगितले की, मुलीच्या वडिलांनी आर्थिक दबावाखाली हे लग्न लावले. तालिबान अधिकाऱ्यांनी समारंभात हस्तक्षेप केला असला तरी, त्यांच्या प्रतिसादामुळे नवीन चिंता निर्माण झाली आहे. लग्न रद्द करण्याऐवजी किंवा संबंधित पक्षांना अटक करण्याऐवजी, तालिबान अधिकाऱ्यांनी त्यांना “मुलगी नऊ वर्षांची होईपर्यंत तिला घरी आणण्याची वाट पाहण्याची” सूचना दिल्याचे वृत्त आहे.
हे ही वाचा :
एकाच कुटुंबातील तिघा चिमुकल्यांचा बुडून मृत्यू
‘आत्मनिर्भर विकसित भारत’ साकार करण्याची गुरुकिल्ली कोणती
पेंट फॅक्टरीत स्फोट, ५ मजूर भाजले
शिक्षकांना फुटकी कवडी न देणारे त्यांच्या वेतनाबद्दल विचारत आहेत!
सोशल मीडियावर मोठ्या प्रमाणात प्रसारित झालेल्या या विधानामुळे २०२१ मध्ये सत्तेत आल्यापासून महिला आणि मुलांच्या हक्कांबाबत तालिबानच्या भूमिकेवर पुन्हा टीका होऊ लागली आहे. संयुक्त राष्ट्रांच्या महिला अहवालानुसार, तालिबानच्या महिलाविरोधी कायद्यांमुळे देशात बालविवाहांमध्ये २५ टक्के वाढ झाली आहे आणि किशोरवयीन गर्भधारणेत ४५ टक्के वाढ झाली आहे. अनेक राष्ट्रांनी जाहीर केले आहे की जोपर्यंत तालिबान सरकार आंतरराष्ट्रीय कायद्यांतर्गत महिलांच्या हक्कांची हमी आणि संरक्षण देत नाही तोपर्यंत ते अधिकृतपणे तालिबान सरकारला मान्यता देणार नाहीत.