पाकिस्तान आणि सौदी अरेबियाने एका महत्त्वपूर्ण संरक्षण करारावर स्वाक्षरी केली. या करारानुसार, दोन्ही देशांनी एकमेकांविरुद्ध झालेल्या कोणत्याही आक्रमणाला संयुक्तपणे प्रत्युत्तर देण्याचे मान्य केले आहे. या घडामोडींचा भारत बारकाईने आढावा घेत आहे. भारताने गुरुवारी (१८ सप्टेंबर) स्पष्ट केले की, तो आपल्या राष्ट्रीय हितांचे रक्षण करण्यासाठी आणि “सर्व क्षेत्रांमध्ये व्यापक राष्ट्रीय सुरक्षा” सुनिश्चित करण्यासाठी आवश्यक ती सर्व पावले उचलणार आहे.
“आम्ही या विकासाचे आपल्या राष्ट्रीय सुरक्षेवर तसेच प्रादेशिक आणि जागतिक स्थिरतेवर होणाऱ्या परिणामांचा अभ्यास करू. भारताच्या राष्ट्रीय हितांचे रक्षण करण्यासाठी आणि सर्व क्षेत्रात व्यापक राष्ट्रीय सुरक्षा सुनिश्चित करण्यासाठी सरकार वचनबद्ध आहे,” असे परराष्ट्र मंत्रालयाचे प्रवक्ते रणधीर जयस्वाल यांनी माध्यमांच्या प्रश्नांना उत्तर देताना सांगितले.
पंतप्रधान शेहबाज शरीफ यांच्या बुधवारी सौदी अरेबियाच्या राजकीय दौऱ्यादरम्यान स्ट्रॅटेजिक म्युच्युअल डिफेन्स अॅग्रीमेंट नावाच्या या करारावर स्वाक्षरी करण्यात आली. गेल्या आठवड्यात कतारमध्ये हमास नेत्यांवर इस्रायलने केलेल्या हल्ल्यानंतर दोहा येथे झालेल्या शिखर परिषदेच्या पार्श्वभूमीवर ही घटना घडली आहे.
या परिषदेत पाकिस्तानसह ४० इस्लामिक राष्ट्रांनी हजेरी लावली होती. गेल्या आठवड्यात कतारमध्ये हमास नेत्यांवर इस्रायलने केलेल्या हल्ल्यानंतर नेत्यांनी नाटोसारखी युती करण्यासाठी आग्रह धरला होता. विशेष म्हणजे, अण्वस्त्रे असलेला पाकिस्तान हा एकमेव इस्लामिक राष्ट्र आहे.
दोन्ही देशांनी स्वाक्षरी केलेल्या परस्पर संरक्षण करारानुसार, दोघांपैकी एकावर झालेला हल्ला हा दोघांवरच झालेला हल्ला मानला जाईल. काही माध्यमांच्या वृत्तानुसार, या करारामुळे पाकिस्तानची अण्वस्त्र क्षमता सौदी अरेबियासाठी खुली झाली आहे. “हा करार… दोन्ही देशांमधील संरक्षण सहकार्याचे पैलू विकसित करणे आणि कोणत्याही आक्रमणाविरुद्ध संयुक्त प्रतिकारशक्ती मजबूत करणे हे आहे,” असे सौदी प्रेस एजन्सीने प्रकाशित केलेल्या निवेदनात म्हटले आहे.
भारताने सांगितले की त्यांना या घडामोडींची जाणीव आहे आणि सौदी अरेबिया आणि पाकिस्तानमधील परस्पर संरक्षण करार काही काळापासून सुरू असल्याचे मान्य केले. “सौदी अरेबिया आणि पाकिस्तान यांच्यात सामरिक परस्पर संरक्षण करारावर स्वाक्षरी झाल्याचे वृत्त आम्हाला मिळाले आहे. दोन्ही देशांमधील दीर्घकालीन व्यवस्थेला औपचारिक स्वरूप देणारा हा विकास विचाराधीन आहे याची सरकारला जाणीव होती,” असे जयस्वाल म्हणाले.
हे ही वाचा :
साबरमती नदीकाठच्या ७०० हून अधिक अनधिकृत बांधकामांवर बुलडोझर कारवाई
दिशा पटानी गोळीबार: हल्लेखोरांकडे सापडले पाकिस्तानी ड्रोनद्वारे तस्करी केलेले तुर्की पिस्तूल
शाहिद आफ्रिदीच्या राहुल प्रेमामागचे गूढ काय ?
जेव्हा शिकागोमध्ये झाला हिंदुत्वाचा जयजयकार… |
दरम्यान, पहलगाम दहशतवादी हल्ला आणि ऑपरेशन सिंदूरनंतर इस्लामाबाद आणि नवी दिल्ली यांच्यातील संबंध बिघडले असल्याने पाकिस्तान आणि सौदी अरेबियामधील करार अधिक महत्त्वाचा ठरतो.