महापालिका निवडणुकांमध्ये मतदारांच्या बोटांवर लावण्यात आलेल्या मार्कर पेनच्या शाईवरून वाद निर्माण झाल्यानंतर, आगामी निवडणुकांसाठी पारंपरिक बॉटलमधील कायमस्वरूपी शाई वापरण्याचा निर्णय घेण्यात आला आहे. हा निर्णय राज्य निवडणूक आयोग यांनी घेतला आहे. नुकत्याच झालेल्या महापालिका निवडणुकांत मतदारांच्या डाव्या हाताच्या बोटावर मार्कर पेनने शाई लावण्यात आली होती. मात्र, ही शाई काही वेळात फिकट होत असल्याचे किंवा सहज निघून जात असल्याचे अनेक व्हिडीओ सोशल मीडियावर व्हायरल झाले. काही मतदारांनी अशी तक्रार केली की, मतदानानंतर दुसऱ्याच दिवशी बोटावरील शाई जवळपास नाहीशी झाली होती. त्यामुळे एकाच व्यक्तीला पुन्हा मतदान करता येऊ शकते का, असा गंभीर प्रश्न उपस्थित झाला.
हे ही वाचा:
फुटपाथवर भाजी विकणाऱ्या सावंत मावशीचा मुलगा झाला सीआरपीएफचा जवान
त्या आरपीएफ महिलेने केली रेल्वे स्थानकावरून १५०० मुलांची सुटका
फडणवीस आणणार महाराष्ट्रात मोठी गुंतवणूक
इंडोनेशियात ११ प्रवाशांसह उड्डाण करणाऱ्या विमानाचा संपर्क तुटला
या वादाची दखल घेत राज्य निवडणूक आयोगाने पुढील ग्रामपंचायत, पंचायत समिती आणि जिल्हा परिषद निवडणुकांसाठी कायमस्वरूपी शाईचा वापर करण्याचा निर्णय घेतला आहे. ही शाई अनेक वर्षांपासून निवडणूक प्रक्रियेत वापरली जात असून, ती पटकन न पुसता येणारी आणि अधिक विश्वासार्ह मानली जाते. त्यामुळे दुहेरी मतदान रोखण्यास मोठी मदत होते.
आयोगाने या शाईसाठी पुरवठादारांकडून दरपत्रके मागवण्याची प्रक्रिया सुरू केली आहे. तसेच, याआधी वापरण्यात आलेल्या मार्कर पेनचे नमुने तपासणीसाठी मागवण्यात आले असून, त्यांची गुणवत्ता तपासली जाणार आहे. निवडणूक प्रक्रियेबाबत चुकीची माहिती पसरवली गेल्यास कायदेशीर कारवाई केली जाईल, असा इशाराही आयोगाने दिला आहे.
एकूणच, मतदान प्रक्रिया अधिक सुरक्षित, पारदर्शक आणि विश्वासार्ह ठेवण्यासाठी हा निर्णय महत्त्वाचा ठरणार आहे. शाईच्या वापरामुळे मतदारांचा निवडणूक व्यवस्थेवरील विश्वास अधिक मजबूत होईल, अशी अपेक्षा व्यक्त केली जात आहे.