शनिवारी करूर येथे तमिळगा वेत्री कळगम (TVK) पक्षाचे प्रमुख व अभिनेता-राजकारणी विजय यांच्या प्रचारसभेदरम्यान भीषण चेंगराचेंगरी झाली. या दुर्घटनेत किमान ३६ जणांचा मृत्यू झाला असून त्यात महिला व लहान मुलांचाही समावेश आहे.
सभेला प्रचंड गर्दी झाल्याने अनेक कार्यकर्ते व लहान मुले बेशुद्ध पडली. परिस्थिती हाताबाहेर जात असल्याचे लक्षात येताच विजय यांनी आपले भाषण थांबवून लोकांना शांत राहण्याचे आवाहन केले आणि रुग्णवाहिका मार्ग मोकळा करण्याची विनंती केली.
परवानगीपेक्षा पाचपट जास्त गर्दी
विजय यांच्या करूर सभेसाठी प्रशासनाने दिलेल्या परवानगीत १०,००० लोकांची उपस्थिती अपेक्षित असल्याचे नमूद होते. मात्र, प्रत्यक्षात सुमारे ५०,००० लोक १.२० लाख चौ.फुटाच्या जागेत जमल्याचा अंदाज आहे.
मुख्यमंत्री स्टॅलिन यांच्याकडून दखल
घटनेनंतर मुख्यमंत्री एम.के. स्टॅलिन यांनी सोशल मीडियावर लिहिले की करूर येथील घडामोडी “चिंताजनक” आहेत. त्यांनी तात्काळ उपचार सुरू करण्याचे निर्देश जिल्हाधिकाऱ्यांना, माजी मंत्री सेंथिल बालाजी आणि आरोग्यमंत्री सुब्रमणियन यांना दिले.
स्टॅलिन म्हणाले, “करूर येथून येणाऱ्या बातम्या चिंताजनक आहेत. मी अधिकाऱ्यांना रुग्णालयात दाखल झालेल्या लोकांना तत्काळ उपचार देण्यास सांगितले आहे. तिरुची जिल्ह्यातील मंत्री अन्बिल महेश यांना मदतीसाठी पाठवले आहे. तसेच एडीजीपींशीही संपर्क साधून परिस्थिती नियंत्रणात आणण्याचे आदेश दिले आहेत. नागरिकांनी डॉक्टर आणि पोलिसांशी सहकार्य करावे.”
हे ही वाचा:
वांगचूकला अटक, ‘गीतांजली’च्या भोवतीही संशयाचे धुके
पाकिस्तानकडून अफगाण निर्वासित छावण्या बंद
गोंधळात लाठीचार्ज, एक मुलगी बेपत्ता
प्रशासनाने जमाव पांगवण्यासाठी लाठीचार्ज केला. बेशुद्ध पडलेल्या लोकांना पाणीपुरवठा करण्यात आला आणि तातडीने वैद्यकीय पथके तैनात करून त्यांना जवळच्या रुग्णालयात हलवण्यात आले.
दरम्यान, गोंधळात नऊ वर्षांची एक मुलगी बेपत्ता झाली. विजय यांनी पोलिस व कार्यकर्त्यांना तिच्या शोधासाठी आवाहन केले, ज्यामुळे गर्दीत अधिकच घबराट पसरली.
मोदींची शोकसंवेदना
पंतप्रधान नरेंद्र मोदींनीही या दुर्घटनेवर शोक व्यक्त केला. त्यांनी सोशल मीडियावर लिहिले, तमिळनाडूतील करूर येथे सभेदरम्यान झालेली दुर्दैवी घटना अतिशय वेदनादायी आहे. मृतांच्या कुटुंबियांप्रती माझ्या भावना आहेत. जखमींना लवकर बरे वाटावे यासाठी प्रार्थना करतो.”
विजय यांचे भाषण आणि राजकीय टोला
ही दुर्घटना विजय यांच्या भाषणादरम्यानच घडली. विजय यांनी थेट नाव न घेता माजी डीएमके मंत्री सेंथिल बालाजी यांच्यावर उपरोधिक टीका केली. ते म्हणाले की, “डीएमकेने करूरमध्ये विमानतळ उभारण्याचे वचन दिले होते, परंतु नंतर केंद्राला त्यासाठी विनंती केली.”
तसेच विजय यांनी जाहीर केले की, “पुढील सहा महिन्यांत तमिळनाडूतील राजकारणात सत्ता बदल घडणार आहे.”
२०२६ विधानसभा निवडणुकीसाठी राज्यभर प्रचार
विजय यांची ही सभा २०२६ च्या विधानसभा निवडणुकीसाठी सुरू असलेल्या त्यांच्या राज्यव्यापी प्रचाराचा एक भाग होती. गोंधळानंतर परिस्थितीवर नियंत्रण मिळवल्यानंतर कार्यक्रम शांततेत संपन्न झाला.