क्रिकेट इतिहासातील दोन दिग्गज—सचिन तेंडुलकर आणि ब्रायन लारा—यांच्यातील ‘कोण श्रेष्ठ?’ हा वाद अनेक वर्षे रंगला. पण वेस्ट इंडिजचा महान फलंदाज ब्रायन लारा याने एका विधानाने ही चर्चा जवळपास संपवून टाकली होती.
लाराने स्पष्ट शब्दांत म्हटले होते, “मी फक्त एक सामान्य खेळाडू आहे, पण सचिन जीनियस आहे. सचिन हा असा एकमेव फलंदाज आहे, ज्याची फलंदाजी पाहण्यासाठी मी तिकीट काढून स्टँडमध्ये बसायला तयार आहे.”
लाराच्या या विधानाने सचिनबद्दलचा आदरच नाही, तर त्याच्या महानतेची साक्ष दिली.
२४ एप्रिल रोजी ‘क्रिकेटचा देव’ म्हणून ओळखला जाणारा सचिन तेंडुलकर ५३ वर्षांचा होत आहे. १९७३ साली मुंबईत जन्मलेल्या सचिनने १९८९ मध्ये आंतरराष्ट्रीय क्रिकेटमध्ये पदार्पण केले आणि पुढील दोन दशकांहून अधिक काळ क्रिकेटविश्वावर अधिराज्य गाजवले.
२०११ साली वानखेडे स्टेडियमवर भारताला विश्वचषक जिंकून देत त्याने आपल्या कारकिर्दीचे स्वप्न पूर्ण केले. २०१३ मध्ये त्याने आंतरराष्ट्रीय क्रिकेटला निरोप दिला.
सचिनच्या नावावर आजही अनेक विक्रम कायम आहेत—
- २०० कसोटी सामने, १५,९२१ धावा, ५१ शतके
- ४६३ वनडे, १८,४२६ धावा, ४९ शतके
मैदानावरील कामगिरीसोबतच सचिनचा साधेपणा आणि इतरांना मार्गदर्शन करण्याची वृत्ती त्याला अधिक महान बनवते. अनेक युवा खेळाडूंनी त्याच्याकडून मिळालेल्या प्रेरणेच्या कथा सांगितल्या आहेत.
ब्रायन लाराच्या त्या एका वाक्याने मात्र एक गोष्ट स्पष्ट झाली— महानतेची तुलना नसते… ती फक्त मान्य केली जाते!