भारतीय महिला क्रिकेट संघाची दमदार फलंदाज जेमिमा रोड्रिग्ज हिने टी२० आंतरराष्ट्रीय क्रिकेटमध्ये २५०० धावांचा टप्पा गाठत आणखी एक मोठा विक्रम आपल्या नावावर केला आहे. अॅडिलेड ओव्हलवर ऑस्ट्रेलियाविरुद्ध खेळल्या जात असलेल्या तिसऱ्या आणि निर्णायक सामन्यात तिने अर्धशतकासह हा मानाचा टप्पा पार केला.
जेमिमाने ४६ चेंडूंमध्ये ४ चौकारांसह ५९ धावांची महत्त्वपूर्ण खेळी साकारली. आपला ११८वा टी२० आंतरराष्ट्रीय सामना खेळताना भारताच्या डावातील पाचव्या षटकात किम गार्थच्या गोलंदाजीवर चौकार ठोकत तिने २५०० धावांचा आकडा पार केला.
या कामगिरीसह जेमिमा ही महिला टी२० आंतरराष्ट्रीय क्रिकेटमध्ये २५०० धावा पूर्ण करणारी चौथी भारतीय खेळाडू ठरली आहे. यापूर्वी कर्णधार हरमनप्रीत कौर, उपकर्णधार स्मृती मंधाना आणि सलामीवीर शेफाली वर्मा यांनी हा टप्पा गाठला आहे.
सामन्याबद्दल बोलायचे झाल्यास, नाणेफेक जिंकून प्रथम फलंदाजी स्वीकारलेल्या भारताने ६ गडी गमावून १७६ धावा उभारल्या. १९ धावांवर शेफाली वर्मा (७) बाद झाल्यानंतर जेमिमा आणि स्मृती मंधाना यांनी दुसऱ्या विकेटसाठी ८२ चेंडूंमध्ये १२१ धावांची भक्कम भागीदारी करत डाव सावरला.
मंधानाने ५५ चेंडूंमध्ये ३ षटकार आणि ८ चौकारांसह ८२ धावा केल्या. त्यानंतर ऋचा घोषने ७ चेंडूंमध्ये १ षटकार आणि २ चौकारांच्या मदतीने १८ धावा करत संघाला गती दिली. जेमिमाच्या ५९ धावांच्या योगदानामुळे भारताने मजबूत धावसंख्या उभी केली.
ऑस्ट्रेलियाकडून अॅनाबेल सदरलँडने सर्वाधिक २ बळी घेतले, तर किम गार्थ आणि सोफी मोलिन्यू यांनी प्रत्येकी १ बळी मिळवला.
मालिकेतील पहिला सामना भारताने डकवर्थ-लुईस नियमानुसार २१ धावांनी जिंकला होता, तर दुसरा सामना ऑस्ट्रेलियाने १९ धावांनी जिंकला. त्यामुळे तिसरा आणि अंतिम सामना निर्णायक ठरला आहे.