पुरुष टी२० विश्वचषक २०२६ सुरू होण्याआधीच नेपाळ क्रिकेट संघाने तयारीला वेग दिला आहे. संघाची गोलंदाजी अधिक भक्कम करण्यासाठी नेपाळने माजी ऑस्ट्रेलियन वेगवान गोलंदाज इयान हार्वे यांची गोलंदाजी सल्लागार म्हणून नियुक्ती केली आहे.
५३ वर्षीय इयान हार्वे यांना आंतरराष्ट्रीय क्रिकेटचा मोठा अनुभव आहे. ते यापूर्वी इंग्लंडमधील ग्लूस्टरशायर संघाचे मुख्य प्रशिक्षक होते. याच संघाकडून त्यांनी आपल्या क्रिकेट कारकिर्दीची सुरुवात केली होती.
हार्वे यांनी डिसेंबर १९९७ मध्ये आंतरराष्ट्रीय क्रिकेटमध्ये पदार्पण केले. ऑस्ट्रेलियाकडून त्यांनी ७३ एकदिवसीय सामने खेळले असून ३०.३१ च्या सरासरीने ८५ बळी घेतले आहेत. फलंदाज म्हणूनही त्यांनी ७१५ धावा केल्या. दक्षिण आफ्रिकेत झालेल्या २००३ च्या एकदिवसीय विश्वचषक विजेत्या ऑस्ट्रेलियन संघाचा ते भाग होते.
टी२० प्रकारात हार्वे यांची ओळख एक चतुर अष्टपैलू खेळाडू म्हणून आहे. अचूक यॉर्कर आणि विविध चेंडूंच्या बदलांसाठी ते प्रसिद्ध आहेत. त्यांनी ५४ टी२० सामने खेळत २३.७३ च्या सरासरीने ५२ बळी घेतले आहेत. याशिवाय ३ शतके, ५ अर्धशतके आणि एकूण १,४७० धावा त्यांच्या नावावर आहेत.
गट ‘क’ मध्ये असलेला नेपाळ संघ ८ फेब्रुवारी रोजी इंग्लंडविरुद्ध आपल्या विश्वचषक मोहिमेची सुरुवात करणार आहे. त्यानंतर १२ फेब्रुवारीला इटली, १५ फेब्रुवारीला वेस्ट इंडिज आणि १७ फेब्रुवारीला बांगलादेशविरुद्ध सामने होणार आहेत. नेपाळचे सर्व गट सामने मुंबईतील वानखेडे मैदानावर खेळवले जाणार आहेत.
टी२० विश्वचषक २०२४ मध्ये नेपाळला एकही विजय मिळवता आला नव्हता, तरीही त्यांनी दक्षिण आफ्रिका आणि बांगलादेशसारख्या बलाढ्य संघांना चांगली टक्कर दिली होती.
यंदाच्या विश्वचषकासाठी नेपाळने मजबूत संघ उभारला असून रोहित पौडेल संघाचे नेतृत्व करत आहेत. दीपेंद्र सिंह ऐरी यांची उपकर्णधार म्हणून नियुक्ती करण्यात आली आहे.
टी२० विश्वचषक २०२६ साठी नेपाळचा संघ:
रोहित पौडेल (कर्णधार), दीपेंद्र सिंह ऐरी (उपकर्णधार), संदीप लामिछाने, कुशल भुर्टेल, आसिफ शेख, संदीप जोरा, आरिफ शेख, बसीर अहमद, सोमपाल कामी, करण केसी, नंदन यादव, गुलशन झा, ललित राजबंशी, शेर मल्ला, लोकेश बम.