मुंबईत ‘धुरंधर: द रिवेंज’ या चित्रपटाच्या शूटिंगदरम्यान कथित नियमभंग झाल्यानंतर मुंबई महानगरपालिकेने दिग्दर्शक आदित्य धर यांच्या B62 प्रॉडक्शन या कंपनीला ब्लॅकलिस्ट केले आहे. तसेच १ लाख रुपयांचा दंड ठोठावण्यात आला असून २५,००० रुपयांची सुरक्षा ठेव (डिपॉझिट) जप्त करण्यात आली आहे.
माहितीनुसार, अलीकडेच मुंबईत सुरू असलेल्या शूटिंगदरम्यान अनेक नियमांचे उल्लंघन झाल्याची तक्रार समोर आली होती. एका स्थानिक रहिवाशाने सेटवर फायर टॉर्चचा वापर केल्याची तक्रार बीएमसीकडे केली होती. नगरपालिकेच्या म्हणण्यानुसार, “शूटिंग पूर्ण होईपर्यंत फायर टॉर्चचा वापर करू नये,” अशी मौखिक सूचना चित्रपटाच्या टीमला देण्यात आली होती. मात्र, त्यानंतरही कथितपणे नियमांचे पालन झाले नाही आणि पोलिसांनी घटनास्थळावरून पाच फायर टॉर्च जप्त केले.
शनिवार (१५ फेब्रुवारी) रोजी देखभाल कर्मचाऱ्यांकडून एक प्रस्ताव नोंद सादर करण्यात आली. त्यात ऑनलाइन परवानगी प्लॅटफॉर्मवर जमा असलेली २५,००० रुपयांची सुरक्षा ठेव जप्त करण्याची शिफारस करण्यात आली. याशिवाय अर्जदार कोमल पोखरियाल आणि नासिर खान यांनी शूटिंगदरम्यान आगीचा वापर न करण्याचे लेखी आश्वासन दिले होते. त्यांनाही B62 प्रॉडक्शन्ससोबत ब्लॅकलिस्ट करण्याचा प्रस्ताव मांडण्यात आला. तसेच लेखी आश्वासनाचा भंग केल्याबद्दल १ लाख रुपयांचा दंड आकारण्याची शिफारस करण्यात आली. प्रस्ताव नोंदीत असेही नमूद करण्यात आले आहे की, “प्रॉडक्शन हाऊसला महाराष्ट्र फिल्म सिटीच्या ऑनलाइन सुविधेवर अर्ज करण्यापासून ब्लॅकलिस्ट करण्यात येईल आणि नियमभंगासाठी १ लाख रुपयांचा दंड आकारला जाईल.”
हे ही वाचा:
‘सेव्हन सिस्टर्स’बद्दल मोहम्मद युनूस यांची खुमखुमी कायम
मेरठमध्ये सापडली पाकिस्तानी हेर महिला
२२५ रुपये हिसकावले; निकाल लागला ३३ वर्षांनी! बिहारमधील प्रकरण नेमकं काय?
फ्रान्सचे राष्ट्राध्यक्ष मॅक्रॉन तीन दिवसीय भारत दौऱ्यावर! ‘असा’ असेल कार्यक्रम
‘धुरंधर: द रिवेंज’ हा चित्रपट १९ मार्च रोजी भव्य प्रदर्शनासाठी सज्ज होत आहे. हा चित्रपट ५ डिसेंबर २०२५ रोजी प्रदर्शित झालेल्या आणि बॉक्स ऑफिसवर मोठे यश मिळवलेल्या ‘धुरंधर’ या ब्लॉकबस्टर चित्रपटाचा सीक्वेल आहे. या चित्रपटाचे दिग्दर्शन आदित्य धर यांनी केले असून रणवीर सिंग, संजय दत्त, अर्जुन रामपाल, आर. माधवन, डॅनिश पंडोर आणि सारा अर्जुन यांसह अनेक कलाकार प्रमुख भूमिकेत आहेत.