झारखंडच्या चतरा जिल्ह्यात उड्डाणानंतर रांची ते दिल्ली असा प्रवास करणारी एअर ऍम्ब्युलन्स कोसळून मोठा अपघात सोमवारी सायंकाळी झाला. या दुर्दैवी अपघातात सात जणांचा मृत्यू झाला. खराब हवामानामुळे पर्यायी मार्गाचा शोध घेतल्यानंतर त्याचा संपर्क तुटला, असे नागरी विमान वाहतूक महासंचालनालयाने सांगितले.
“विमानाने रांचीहून भारतीय वेळेनुसार १९:११ वाजता उड्डाण केले. कोलकात्याशी संपर्क स्थापित केल्यानंतर, हवामानामुळे विचलनाची म्हणजेच पर्यायी मार्गाची विनंती केली. भारतीय वेळेनुसार १९:३४ वाजता, वाराणसीच्या आग्नेयेस अंदाजे १०० नॉटिकल मैल अंतरावर असलेल्या कोलकात्याशी विमानाचा संपर्क आणि रडार संपर्क तुटला,” असे विमान वाहतूक निरीक्षकांनी म्हटले आहे.
दरम्यान, केंद्रीय नागरी विमान वाहतूक मंत्रालयाची चौकशी शाखा, हवाई अपघात चौकशी शाखा (AAIB), आज नवी दिल्लीतील फ्लाइट ऑपरेटर रेडबर्ड एव्हिएशनच्या कार्यालयाला भेट देईल आणि रेडबर्डच्या ऑपरेशन्स आणि क्रॅश झालेल्या विमानाशी संबंधित सुरक्षा ऑडिट अहवाल आणि इतर प्रमुख कागदपत्रांची तपासणी करण्याची शक्यता आहे. या भेटीची पुष्टी करताना, रेडबर्ड एव्हिएशनचे व्यवस्थापकीय संचालक अक्षय कुमार यांनी सांगितले की, अलीकडील बारामती अपघातानंतर त्यांच्या विमानाचे विशेष ऑडिट करण्यात आले होते. “बारामती दुर्घटनेनंतर रेडबर्डचे विशेष ऑडिट करण्यात आले. दोन्ही वैमानिक बऱ्यापैकी अनुभवी होते. रांची एटीसीशी झालेल्या संपर्कातून खराब हवामानाचे संकेत मिळाले. आम्ही एएआयबीच्या संपर्कात आहोत. एएआयबीची एक टीम आज आमच्या कार्यालयाला भेट देईल,” असे अक्षय कुमार यांनी सांगितले.
कठीण भूप्रदेशामुळे बचावकार्यात कसा अडथळा येत होता याचे वर्णन करताना, सशस्त्र सीमा दलाच्या (एसएसबी) सेकंड-इन-कमांडने सांगितले की, जंगलाच्या आत असलेल्या अपघातस्थळापर्यंत रस्ता नसल्याने त्यांना जवळजवळ दोन किलोमीटरपर्यंत मृतदेह वाहून नेणे आवश्यक होते. ते पुढे म्हणाले की, टीम घटनास्थळी पोहोचेपर्यंत कोणीही जिवंत नव्हते आणि त्यांच्याकडे फक्त एकच स्ट्रेचर होता, ज्यामुळे ऑपरेशन आणखी आव्हानात्मक बनले.
चतरा येथील अधिकाऱ्यांनी सांगितले की त्यांना रात्री १० वाजता अपघाताची माहिती मिळाली आणि कठीण भूभागामुळे बचाव कार्य आणखी आव्हानात्मक बनले. “आम्हाला १० च्या सुमारास अपघात झाल्याची माहिती मिळाली. भूप्रदेश पाहता येथे पोहोचणे कठीण होते,” असे सिमरिया ब्लॉक अधीक्षक सुमित कुमार अग्रवाल यांनी सांगितले. दुसऱ्या एका अधिकाऱ्याने सांगितले की, वादळामुळे विमान कोसळले. विमानातील दोघांमध्ये क्रू मेंबर होते, तर उर्वरित पाच जणांमध्ये एक रुग्ण आणि रुग्णाचे कुटुंबीय होते.
हे ही वाचा:
ड्रॅगनच्या जाळ्यातून महाराष्ट्र देशाला मुक्त करणार
गांधी कुटुंबाने मला ७ महिने भेटच दिली नाही!
द केरळ स्टोरी २ ला प्रचारकी म्हणणाऱ्या अनुराग कश्यपला झापले
मुंबई महानगरपालिकेत नोकरीचे आमिष दाखवून घातला ३३ लाखांचा गंडा
झारखंडमधील चतरा येथे झालेल्या एअर ऍम्ब्युलन्स अपघातात मृत्युमुखी पडलेल्या मृत रुग्णाची आणि त्याच्या कुटुंबातील सदस्यांची ओळख पटली आहे. मृत रुग्ण संजय आणि त्याचे नातेवाईक लातेहार जिल्ह्यातील चांदवा शहरातील रहिवासी होते. बळींमध्ये त्याची पत्नी अर्चना, ध्रुव नावाचा नातेवाईक, रुग्णालयातील कर्मचारी आणि क्रू मेंबर्स होते. संजय चांदवा शहरात एक हॉटेल चालवत होता. गेल्या सोमवारी, संजय त्याच्या हॉटेलमध्ये शॉर्ट सर्किटमुळे झालेल्या अपघातात भाजला. कुटुंबाने नातेवाईकांकडून पैसे उधार घेऊन एअर ऍम्ब्युलन्स भाड्याने घेतली होती. संजयला गंगाराम रुग्णालयात नेण्यासाठी एअर ऍम्ब्युलन्स निघाली होती.