गोव्यातील दाबोळीम विमानतळ बंद होणार असल्याच्या चर्चेमुळे राज्यातील राजकारण तापले असताना मुख्यमंत्री प्रमोद सावंत यांनी स्पष्ट शब्दांत हा दावा फेटाळून लावला आहे. दाबोळीम विमानतळ कधीही बंद होणार नाही आणि तो पुढेही नियमितपणे कार्यरत राहील, असे त्यांनी ठामपणे सांगितले. विरोधक केवळ राजकीय लाभासाठी भीतीचे वातावरण निर्माण करत असल्याचा आरोपही त्यांनी केला.
अलीकडे दक्षिण गोव्याचे खासदार विरियातो फर्नांडिस यांनी संसदेत दाबोळीम विमानतळाच्या नागरी वापरावर मर्यादा येऊ शकतात, असा मुद्दा उपस्थित केला होता. काही प्रशासकीय हालचाली सुरू असल्याचे त्यांनी सूचित केल्याने राज्यात संभ्रम निर्माण झाला. मात्र मुख्यमंत्री सावंत यांनी यावर प्रतिक्रिया देताना सांगितले की राज्य सरकारचा स्पष्ट निर्णय आहे की गोव्यातील दोन्ही विमानतळे सुरू राहतील.
हे ही वाचा:
कांगारूंचं गर्वहरण; जिम्बाब्वेचा ऐतिहासिक पराक्रम
मोदींना कापसाच्या सापळ्यात अडकवण्याचा कट फसला
बांगलादेशात हिंदू कामगाराची हात-पाय बांधून हत्या
सध्या गोव्यात दाबोळीमबरोबरच मोपा येथील मनोहर आंतरराष्ट्रीय विमानतळ कार्यरत आहे. मुख्यमंत्री म्हणाले की दोन्ही विमानतळे परस्परपूरक आहेत आणि राज्याच्या पर्यटन, उद्योग व रोजगार क्षेत्रासाठी दोन्हींचे अस्तित्व महत्त्वाचे आहे. दाबोळीम विमानतळाच्या पायाभूत सुविधांवर मोठा निधी खर्च करण्यात आला आहे. त्यामुळे तो बंद करण्याचा प्रश्नच उद्भवत नाही, असे त्यांनी स्पष्ट केले.
दरम्यान, गोव्याचे वाहतूक मंत्री माविन गुदिन्हो यांनी नवी दिल्ली येथे संरक्षण मंत्री राजनाथ सिंह यांची भेट घेतली. या भेटीत दाबोळीम विमानतळाच्या भवितव्याबाबत सकारात्मक चर्चा झाली असून नागरी उड्डाणे सुरूच राहतील, असे आश्वासन मिळाल्याचे गुदिन्हो यांनी सांगितले.
विरोधी पक्षनेते युरी आलेमाव यांनी मात्र सरकारवर टीका करत स्पष्ट लिखित हमी देण्याची मागणी केली आहे. तर गोवा फॉरवर्ड पक्षाचे नेते विजय सरदेसाई यांनीही सरकारने दाबोळीम विमानतळाबाबतची भूमिका पारदर्शकपणे जाहीर करावी, अशी मागणी केली आहे.
दाबोळीम विमानतळाचा संबंध केवळ प्रवासी वाहतुकीपुरता मर्यादित नसून दक्षिण गोव्याच्या अर्थव्यवस्थेशी तो थेट जोडलेला आहे. पर्यटन व्यवसाय, हॉटेल उद्योग आणि स्थानिक रोजगारासाठी हा विमानतळ अत्यंत महत्त्वाचा मानला जातो. त्यामुळे त्याच्या भवितव्याबाबत निर्माण झालेली अनिश्चितता दूर करण्याचा प्रयत्न सरकारकडून करण्यात येत आहे.
एकूणच, दाबोळीम विमानतळ बंद होणार नसल्याचा सरकारचा स्पष्ट दावा असला तरी विरोधकांनी उपस्थित केलेल्या प्रश्नांमुळे हा मुद्दा सध्या गोव्याच्या राजकारणाच्या केंद्रस्थानी आला आहे. आगामी काळात या विषयावर आणखी चर्चा आणि राजकीय हालचाली होण्याची शक्यता नाकारता येत नाही.