पश्चिम आशियामध्ये सुरू असलेल्या तणावामुळे आणि जागतिक ऊर्जा बाजारात झालेल्या दरवाढीच्या पार्श्वभूमीवर देशात घरगुती स्वयंपाक गॅस (LPG) सिलेंडरच्या किंमती वाढवण्यात आल्या आहेत. ७ मार्चपासून लागू झालेल्या नव्या दरांनुसार १४.२ किलोच्या घरगुती LPG सिलेंडरच्या किंमतीत ६० रुपयांची वाढ करण्यात आली आहे, तर १९ किलोच्या कमर्शियल सिलेंडरच्या किंमती सुमारे ११५ रुपयांनी वाढल्या आहेत.
तेल वितरण कंपन्यांच्या माहितीनुसार, राजधानी दिल्लीमध्ये नॉन- सबसिडी घरगुती एलपीजी सिलेंडरची किंमत ८५३ रुपयांवरून वाढून ९१३ रुपये झाली आहे. त्याचप्रमाणे मुंबईमध्ये ही किंमत ९१२.५० रुपये, कोलकात्यात सुमारे ९३९ रुपये आणि चेन्नईमध्ये ९२८.५० रुपये प्रति सिलेंडर झाली आहे. राज्यनिहाय कर आणि व्हॅटमुळे वेगवेगळ्या शहरांमध्ये किंमतीत थोडाफार फरक दिसून येतो.
उद्योग क्षेत्राशी संबंधित अधिकाऱ्यांच्या मते, ही दरवाढ जागतिक ऊर्जा बाजारातील वाढत्या किंमतींचा परिणाम आहे. त्यांच्या म्हणण्यानुसार, “पश्चिम आशियामध्ये सुरू असलेल्या तणावामुळे जागतिक ऊर्जा खर्चात वाढ झाली आहे. हा प्रदेश जागतिक तेल आणि गॅस पुरवठा साखळीसाठी अत्यंत महत्त्वाचा आहे.” गेल्या एका वर्षात घरगुती एलपीजीच्या किंमतीत ही दुसरी वाढ आहे. यापूर्वी एप्रिल २०२५ मध्ये ५० रुपयांची वाढ करण्यात आली होती. मात्र सरकारचे म्हणणे आहे की भारतातील घरगुती गॅसच्या किंमती अजूनही अनेक शेजारी देशांच्या तुलनेत कमी आहेत.
सरकारच्या प्रमुख प्रधानमंत्री उज्ज्वला योजना अंतर्गत लाभार्थ्यांना सवलत मिळत राहणार आहे. या योजनेअंतर्गत पात्र कुटुंबांना १४.२ किलोच्या प्रत्येक सिलेंडरवर ३०० रुपयांची सबसिडी दिली जाते, जी वर्षात जास्तीत जास्त १२ रिफिलपर्यंत लागू असते. सध्या देशभरातील १० कोटींपेक्षा अधिक कुटुंबे या योजनेच्या कक्षेत आहेत.
व्यावसायिक एलपीजी सिलेंडरच्या किंमतीतही लक्षणीय वाढ झाली असून याचा थेट परिणाम हॉटेल, रेस्टॉरंट आणि इतर व्यावसायिक आस्थापनांवर होऊ शकतो. दिल्लीमध्ये १९ किलोचा कमर्शियल सिलेंडर १,७६८.५० रुपयांवरून वाढून १,८८३ रुपये झाला आहे. मुंबईमध्ये याची किंमत आता १,८३५ रुपये, कोलकात्यात सुमारे १,९९० रुपये आणि चेन्नईमध्ये २,०४३.५० रुपये झाली आहे. या वर्षात आतापर्यंत व्यावसायिक एलपीजीच्या किंमतीत एकूण ३०० रुपयांहून अधिक वाढ नोंदवली गेली आहे.
हे ही वाचा:
मुंब्रा येथे कन्स्ट्रक्शन व्यावसायिकाच्या घराबाहेर गोळीबार
ट्रम्प, बायडेन यांच्या हत्येचा कट रचल्याप्रकरणी पाकिस्तानी नागरिक दोषी!
IRINS देना बुडण्यापूर्वी भारताने दुसऱ्या इराणी जहाजाला दिलेला आश्रय
राज्याच्या अर्थसंकल्पात मुंबईसाठी काय?
दरम्यान, पेट्रोलियम आणि नैसर्गिक वायू मंत्री हरदीप सिंग पुरी यांनी सांगितले की, “नागरिकांना स्वस्त आणि टिकाऊ इंधन उपलब्ध करून देणे ही आमची प्राथमिकता आहे आणि आम्ही त्यासाठी सातत्याने प्रयत्न करत आहोत. भारतात ऊर्जेची कोणतीही कमतरता नाही आणि ऊर्जा ग्राहकांनी चिंता करण्याचे कारण नाही.” तेल कंपन्यांनीही अफवांपासून दूर राहण्याचे आवाहन केले आहे. देशातील सर्वात मोठी तेल वितरण कंपनी इंडियन ऑइलने निवेदनात म्हटले आहे की, “भारतामध्ये इंधनाचा पुरेसा साठा उपलब्ध आहे. पुरवठा आणि वितरण व्यवस्था सुरळीतपणे सुरू आहे. इंडियन ऑइल देशभरात अखंडित इंधन पुरवठ्यासाठी वचनबद्ध आहे. नागरिकांनी घाबरून जाऊन पेट्रोल पंपांवर गर्दी करू नये आणि केवळ अधिकृत स्त्रोतांवरच विश्वास ठेवावा.”