अहमदाबादहून लंडन गैटविककडे जाणाऱ्या एअर इंडिया फ्लाइट AI171 मध्ये किमान १६९ भारतीय आणि ५३ ब्रिटिश नागरिक प्रवास करत होते. ही फ्लाइट उड्डाण घेतल्याच्या काही क्षणांतच क्रॅश झाली, अशी माहिती एका एअरलाइन अधिकाऱ्याने गुरुवारी दिली.
दुर्घटनेची माहिती: ही फ्लाइट दुपारी १:३८ वाजता अहमदाबादहून रवाना झाली होती. त्यामध्ये एकूण २४२ प्रवासी आणि क्रू मेंबर्स होते, ज्यात ७ पोर्तुगीज नागरिक आणि १ कॅनडियन नागरिक देखील होते. विमानात १० केबिन क्रू आणि २ पायलट होते.
हेही वाचा..
एअर इंडिया विमान अपघाताचा व्हिडीओ आला समोर!
विमान क्रॅश : वेदना शब्दांत व्यक्त करता येणं अशक्य
पायलटने ‘मे-डे’ कॉल केला होता !
भारतातील घडलेले १० भीषण विमान अपघात
पायलटची माहिती: विमानाचे संचालन कॅप्टन सुमीत सभरवाल करत होते, ज्यांना ८,२०० तासांहून अधिकचा उड्डाण अनुभव होता. त्यांच्या सोबत फर्स्ट ऑफिसर क्लाईव्ह कुंदर होते, ज्यांचा अनुभव १,१०० तासांचा होता.
एअर इंडियाचा शोकसंदेश: जानेवारी २०२२ मध्ये खासगीकरणानंतर ही टाटा समूहाच्या व्यवस्थापनाखाली आलेल्या एअर इंडियाची पहिली मोठी दुर्घटना ठरली. एअर इंडियाने आपल्या ‘एक्स’ (Twitter) अकाउंटचा प्रोफाइल आणि कव्हर फोटो काळ्या रंगात बदलून शोक व्यक्त केला.
एअर इंडिया अध्यक्ष एन. चंद्रशेखरन यांचे वक्तव्य: “अत्यंत दुःखद अंतःकरणाने मी पुष्टी करतो की अहमदाबादहून लंडन गैटविककडे जाणारी एअर इंडिया फ्लाइट १७१ आज एका गंभीर अपघाताला सामोरी गेली आहे. या हृदयद्रावक घटनेमुळे प्रभावित सर्व कुटुंबीय आणि प्रियजनांप्रती आमच्या संवेदना आहेत.
सध्या आमचे सर्व प्रयत्न पीडितांना आणि त्यांच्या कुटुंबीयांना सहकार्य करण्याकडे केंद्रित आहेत. आम्ही आमच्या पूर्ण क्षमतेने आपत्कालीन प्रतिसाद देणाऱ्या पथकांना मदत करत आहोत.”
तपास आणि मदत: चंद्रशेखरन यांनी सांगितले की, आपत्कालीन केंद्र सुरू करण्यात आले असून प्रभावित कुटुंबांसाठी सहाय्यता टीम तयार करण्यात आली आहे.
माहितीसाठी हेल्पलाइन नंबर: १८०० ५६९१ ४४४ तपासाचा तपशील: विमानाने रनवे २३ वरून उड्डाण केल्यानंतर लगेच मे-डे कॉल दिला गेला, परंतु त्यानंतर कॉकपिटकडून कोणताही संपर्क झाला नाही. डीजीसीएच्या निवेदनानुसार, विमान विमानतळाच्या बाहेरच्या हद्दीत क्रॅश झाले. डीजीसीएचे अधिकारी फ्लाइट डेटा, व्हॉईस रेकॉर्डिंग आणि प्रत्यक्षदर्शींचे निवेदन गोळा करण्यासाठी घटनास्थळी पोहोचले आहेत.