भारतीय वायुसेनेच्या एका रिमोटली पायलटेड एअरक्राफ्ट (RPA) ला इंजिनमध्ये अचानक तांत्रिक बिघाड झाल्याने आपत्कालीन लँडिंग करावी लागली. हे एअरक्राफ्ट नियमित प्रशिक्षण मोहिमेवर होते. बिघाड असूनही उच्च दर्जाचे व्यावसायिक कौशल्य दाखवत एअरक्राफ्टची सुरक्षितपणे लँडिंग करण्यात आली. ही घटना राजस्थानातील जैसलमेरजवळ प्रशिक्षण सॉर्टीदरम्यान घडली. गुरुवारी भारतीय वायुसेनेने याबाबत अधिकृत माहिती दिली.
वायुसेनेच्या निवेदनानुसार, ऑपरेटरांनी प्रसंगाचे त्वरित मूल्यमापन करून नियंत्रित पद्धतीने एअरक्राफ्ट एका मोकळ्या मैदानात सुरक्षित उतरवले. या तत्परतेमुळे कोणतीही जीवितहानी झाली नाही आणि जमिनीवरील कोणत्याही मालमत्तेला नुकसान झाले नाही. वायुसेनेने हेही स्पष्ट केले आहे की एअरक्राफ्टला अत्यल्प नुकसान झाले आहे आणि ते सुरक्षितरीत्या परत मिळवण्यात आले आहे. इंजिनमध्ये झालेल्या बिघाडाची सविस्तर तांत्रिक तपासणी लवकरच सुरू होईल. भविष्यात अशा घटना टाळण्यासाठी बिघाडाचे नेमके कारण शोधणे आवश्यक आहे.
हेही वाचा..
ट्रोलर्सना मुक्क्याचा मार : नूपूरचे विश्व मुक्केबाजी स्पर्धेत सुवर्ण यश
रशियाला उत्तरी समुद्र मार्गावर हवाय भारताचा वावर चीनचीही नजर
ऋषभ पंत करणार एमएस धोनीची बरोबरी!
मिळालेल्या माहितीनुसार, हे रिमोटली पायलटेड एअरक्राफ्ट पूर्णपणे प्रशिक्षण मोहिमेवर होते आणि कोणत्याही संवेदनशील ऑपरेशनमध्ये सहभागी नव्हते. त्यामुळे वायुसेनेला कोणत्याही प्रकारचे नुकसान झालेले नाही. घटना स्थळी सुरक्षेची उपाययोजना तैनात करण्यात आली आणि मानक प्रक्रियांनुसार एअरक्राफ्ट वायुसेनेच्या ताब्यात घेण्यात आले. तज्ज्ञांचे म्हणणे आहे की अशा घटनांमध्ये ऑपरेटरांची त्वरित प्रतिक्रिया आणि आपत्कालीन प्रक्रियांचे काटेकोर पालन यामुळेच सुरक्षित लँडिंग शक्य होते. रिमोटली पायलटेड एअरक्राफ्ट हे आधुनिक युद्धनीती आणि गुप्तचर क्षमतेचा महत्त्वाचा भाग आहेत. भारतीय वायुसेना परिचालन कौशल्य आणि प्रणालीगत विश्वासार्हता टिकवण्यासाठी अशा एअरक्राफ्टचा नियमितपणे प्रशिक्षण मोहिमांत वापर करते. भारतीय वायुसेनेने आश्वासन दिले आहे की ती सर्व सुरक्षा मानके आणि उड्डाण प्रोटोकॉलचे काटेकोर पालन करते. या घटनेत कोणतीही हानी न होणे हे वायुसेनेच्या व्यावसायिक संचालनक्षमता आणि तांत्रिक कौशल्याचे द्योतक आहे.