चीनच्या राजधानी पेइचिंग येथे चीनी कम्युनिस्ट पार्टीच्या (सीपीसी) २० व्या केंद्रीय समितीच्या चौथ्या पूर्ण अधिवेशनात “राष्ट्रीय आर्थिक आणि सामाजिक विकासासाठी १५ वा पंचवार्षिक आराखडा तयार करण्याबाबत सीपीसी केंद्रीय समितीचे सुचवलेले मार्गदर्शन” (संक्षिप्तात “सूचना”) पारित करण्यात आले. “सूचना” मध्ये म्हटले आहे की “१५ वा पंचवार्षिक आराखडा” (२०२६-२०३०) हा समाजवादी आधुनिकीकरणाची पूर्तता करण्याचा एक निर्णायक कालखंड असेल. “१४ व्या पंचवार्षिक आराखड्या”च्या (२०२१-२०२५) काळात चीनने विकासाच्या क्षेत्रात उल्लेखनीय यश मिळवले आहे. त्यामुळे “१५ वा पंचवार्षिक आराखडा” हा समाजवादी आधुनिकीकरणाच्या प्रवासात भूतकाळ आणि भविष्य यांना जोडणारा अत्यंत महत्त्वाचा टप्पा ठरेल. या काळात चीनच्या विकासाचे वातावरण अधिक खोल आणि गुंतागुंतीच्या बदलांना सामोरे जाईल.
या “सूचना” दस्तऐवजात १५ व्या पंचवार्षिक आराखड्याच्या कालावधीत चीनच्या आर्थिक व सामाजिक विकासासाठी मार्गदर्शक विचारधारा, मुख्य उद्दिष्टे आणि दिशानिर्देश निश्चित करण्यात आले आहेत. त्यात हे स्पष्ट करण्यात आले आहे की, सीपीसीचे एकूण नेतृत्व कायम ठेवणे, लोककेंद्रित विकासाला प्राधान्य देणे, उच्च दर्जाच्या विकासाला गती देणे, सखोल व सर्वंकष सुधारणा सुरू ठेवणे, प्रभावी बाजारव्यवस्था आणि कार्यक्षम शासन यांचा समन्वय साधणे, विकास आणि राष्ट्रीय सुरक्षेचे समन्वयन साधणे — हे तत्त्व पाळले जाईल.
हेही वाचा..
अभिनेते सतीश शाह यांचे निधन किडनी निकामी झाल्यामुळे नाहीतर ‘या’ कारणामुळे!
कॅनडात भारतीय वंशाच्या व्यावसायिकाची गोळ्या घालून हत्या!
प्रशांत किशोर यांना निवडणूक आयोगाची नोटीस
भारत विरुद्ध ऑस्ट्रेलिया : टी२० सामन्यांत सर्वाधिक धावा करणारे ५ फलंदाज
“सूचना” मध्ये पुढील मुख्य विकास उद्दिष्टे नमूद केली आहेत: उच्च गुणवत्तेच्या विकासात ठोस परिणाम साध्य करणे, विज्ञान व तंत्रज्ञान क्षेत्रातील आत्मनिर्भरतेची पातळी लक्षणीयरीत्या वाढवणे, सर्वंकष सुधारणा अधिक गतीने राबवणे, सामाजिक संस्कृती व सभ्यता उन्नत करणे, लोकजीवनाची गुणवत्ता सातत्याने सुधारणे, “सुंदर चीन” निर्माण करण्यात मोठी प्रगती साधणे आणि राष्ट्रीय सुरक्षेची बळकटी वाढवणे.
या उद्दिष्टांच्या आधारे पुढील पाच वर्षे सतत प्रयत्न केले जातील, जेणेकरून वर्ष २०३५ पर्यंत चीन आर्थिक शक्ती, वैज्ञानिक व तांत्रिक क्षमता, राष्ट्रीय संरक्षणशक्ती, एकूण राष्ट्रीय सामर्थ्य आणि आंतरराष्ट्रीय प्रभाव या सर्व क्षेत्रांत मोठी झेप घेईल. त्या वेळी चीनचा प्रति व्यक्ति जीडीपी मध्यम विकसित देशांच्या पातळीवर पोहोचेल, लोकांचे जीवन अधिक सुखी व समृद्ध बनेल आणि समाजवादी आधुनिकीकरण मूळ स्वरूपात साकारले जाईल. याशिवाय, “सूचना” मध्ये पुढील दिशानिर्देशांचा उल्लेख आहे:
आधुनिक औद्योगिक प्रणालीची उभारणी, उच्च दर्जाची वैज्ञानिक व तांत्रिक आत्मनिर्भरता वाढवणे, मजबूत अंतर्गत बाजारव्यवस्था निर्माण करणे, नवीन विकास नमुन्याची गतीने स्थापना करणे, च्चस्तरीय समाजवादी बाजारव्यवस्थेचा विकास, परदेशांसाठी खुल्या अर्थव्यवस्थेचा विस्तार, कृषी आणि ग्रामीण आधुनिकीकरणाला वेग देणे, ग्रामीण पुनरुत्थानाला चालना देणे, प्रादेशिक आर्थिक संतुलन साधणे व समन्वित विकास प्रोत्साहित करणे.
तसेच, दस्तऐवजात संपूर्ण राष्ट्राची सांस्कृतिक नवकल्पना आणि सर्जनशीलता प्रोत्साहित करण्यावर भर देण्यात आला आहे; समाजवादी संस्कृती समृद्ध करण्यासाठी उपाय सुचवले आहेत; लोकांच्या उपजीविकेचे संरक्षण आणि उन्नती सुनिश्चित करणे, सर्वांसाठी समान समृद्धीचा प्रयत्न करणे, हरित आर्थिक परिवर्तन गतीमान करणे, “सुंदर चीन”चे स्वप्न साकार करणे, राष्ट्रीय सुरक्षा प्रणाली आणि क्षमतांचे आधुनिकीकरण करणे, तसेच चीनी पीपल्स लिबरेशन आर्मीच्या स्थापनेच्या शताब्दीच्या उद्दिष्टांची निश्चित वेळेत पूर्तता करणे आणि राष्ट्रीय संरक्षण तसेच लष्करी आधुनिकीकरण उच्च दर्जाने साध्य करणे या दिशेने मार्गदर्शन करण्यात आले आहे.