मुंबई- अहमदाबाद बुलेट ट्रेन प्रकल्पाने महाराष्ट्रात आणखी एक महत्त्वाचा टप्पा गाठला असून तिसऱ्या पर्वतीय बोगद्याचे (एमटी-07) बांधकाम पूर्ण करण्यात आले आहे. हा बोगदा पालघर जिल्ह्यातील डहाणू तालुक्यातील अंबेसरी गावाजवळ उभारण्यात आला असल्याची माहिती रेल्वे मंत्रालयाने मंगळवारी दिली. मंत्रालयाने सांगितले की, हा पर्वतीय बोगदा ४१७ मीटर लांब आणि १४.४ मीटर रुंद असून, उच्च-वेगवान बुलेट ट्रेनच्या सुरळीत संचालनासाठी अत्याधुनिक निरीक्षण व सुरक्षा यंत्रणांनी सुसज्ज करण्यात आला आहे. पालघर जिल्ह्यात अवघ्या पाच महिन्यांत तीन पर्वतीय बोगद्यांची कामे पूर्ण झाल्याने देशातील पहिल्या बुलेट ट्रेन प्रकल्पाला अधिक गती मिळाली आहे.
मंत्रालयाच्या निवेदनानुसार, बुलेट ट्रेन कॉरिडॉरच्या दोन्ही मार्गिकांसाठी तयार करण्यात आलेल्या या बोगद्याचे उत्खनन दोन्ही टोकांपासून नियंत्रित ड्रिलिंग आणि स्फोट तंत्रज्ञानाद्वारे करण्यात आले. बांधकामादरम्यान प्रगत अभियांत्रिकी पद्धती आणि सुरक्षा मानकांचे काटेकोर पालन करण्यात आले.
उत्खननाच्या संपूर्ण प्रक्रियेदरम्यान संरचनात्मक स्थिरता, कामगारांची सुरक्षा आणि अचूक अंमलबजावणी सुनिश्चित करण्यासाठी अत्याधुनिक निरीक्षण प्रणाली आणि भू-तांत्रिक उपकरणांचा वापर करण्यात आला. सरफेस सेटलमेंट पॉइंट्स (एसएसपी), 3D टार्गेट्स, स्ट्रेन गेज आणि सिस्मोग्राफ यांसारख्या रिअल-टाइम मॉनिटरिंग यंत्रणांच्या मदतीने कंपन, बोगद्याची हालचाल आणि आसपासच्या संरचनांवर सातत्याने लक्ष ठेवण्यात आले. तसेच, बोगदा बांधकामादरम्यान वायुवीजन प्रणाली, अग्निसुरक्षा व्यवस्था, नियंत्रित प्रवेश आणि सातत्यपूर्ण भू-तांत्रिक देखरेख यांसारख्या कामगार सुरक्षेच्या उपाययोजनांमध्ये कोणतीही तडजोड करण्यात आली नाही.
रेल्वे मंत्रालयाने सांगितले की, ही कामगिरी महाराष्ट्रातील यापूर्वी पूर्ण झालेल्या बोगद्यांच्या यशावर आधारित आहे. पालघर जिल्ह्यातील सफाळे परिसरातील १.५ किलोमीटर लांबीच्या पहिल्या पर्वतीय बोगद्याचे (एमटी-05) काम २ जानेवारी २०२६ रोजी पूर्ण झाले होते. महाराष्ट्रातील बुलेट ट्रेन प्रकल्पातील हा पहिला यशस्वी पर्वतीय बोगदा ठरला. त्यानंतर ३ फेब्रुवारी २०२६ रोजी दुसऱ्या बोगद्याचे (एमटी-06) बांधकाम पूर्ण झाले. हा ४५४ मीटर लांबीचा बोगदा न्यू ऑस्ट्रियन टनेलिंग मेथड (NATM) चा वापर करून खोदण्यात आला. अशाप्रकारे अवघ्या एका महिन्याच्या कालावधीत पालघर जिल्ह्यात दोन बोगद्यांची कामे पूर्ण झाली होती.
महाराष्ट्रात बांधकामाधीन असलेल्या सात पर्वतीय बोगद्यांपैकी एमटी-05, एमटी-06 आणि एमटी-07 या बोगद्यांमधील उत्खनन पूर्ण झाले आहे. एमटी-08 (३५० मीटर) चे उत्खनन ५ ऑक्टोबर २०२३ रोजीच पूर्ण झाले होते. एमटी-03 चे काम ८० टक्क्यांहून अधिक पूर्ण झाले असून, एमटी-04 सुमारे ६० टक्के पूर्ण झाली आहे. तर एमटी-01 आणि एमटी-02 या बोगद्यांचे काम वेगाने सुरू आहे.
हे ही वाचा:
वाळवीने पैसे खाल्ले! १ कोटींच्या नोटा फस्त
रणवीरची बंदीविरोधात न्यायालयात धाव
इराणकडून कुवेत, बहारीनमधील अमेरिकी लष्करी तळ लक्ष्य
सीबीएसई घोटाळा प्रकरणी अध्यक्ष आणि सचिवाला हटवले
मुंबई-अहमदाबाद बुलेट ट्रेन प्रकल्पातील एकूण आठ पर्वतीय बोगद्यांपैकी सात बोगदे महाराष्ट्रातील पालघर जिल्ह्यात असून, एक बोगदा गुजरातमधील वलसाड जिल्ह्यात आहे. वलसाडमधील बोगद्याचे काम यापूर्वीच पूर्ण झाले आहे. मंत्रालयाच्या माहितीनुसार, वापी आणि बोईसर बुलेट ट्रेन स्थानकांदरम्यान असलेल्या तिन्ही पर्वतीय बोगद्यांचे उत्खनन यशस्वीरित्या पूर्ण झाले आहे. मुंबई-अहमदाबाद बुलेट ट्रेन मार्गिका महाराष्ट्रातील बोईसर आणि गुजरातमधील वापी या महत्त्वाच्या औद्योगिक पट्ट्यातून जात असून, या विभागातील बांधकाम कामे वेगाने प्रगतीपथावर आहेत. या मार्गावर एमटी-08, एमटी-07 आणि एमटी-06 असे तीन पर्वतीय बोगदे समाविष्ट आहेत.