भारताच्या वाहन उद्योगाने मे २०२६ मध्ये दमदार कामगिरी नोंदवली असून प्रवासी वाहने, दुचाकी आणि तीन चाकी वाहनांच्या मजबूत मागणीमुळे मे महिन्यातील विक्रीने आतापर्यंतचा उच्चांक गाठला आहे. ही माहिती सोसायटी ऑफ इंडियन ऑटोमोबाईल मॅन्युफॅक्चरर्स (SIAM) ने सोमवारी दिली. मे २०२६ मध्ये देशांतर्गत प्रवासी वाहनांची विक्री वार्षिक आधारावर २७.३ टक्क्यांनी वाढून ४,३८,८५४ युनिट्स इतकी झाली. गेल्या वर्षी याच महिन्यात हा आकडा ३,४४,६५६ युनिट्स होता.
दुचाकी वाहन विभागातही उल्लेखनीय वाढ दिसून आली. या विभागातील विक्री १४.८ टक्क्यांनी वाढून १९,०२,२०९ युनिट्स झाली. तर तिनचाकी वाहनांची विक्री ३१.१ टक्क्यांनी वाढून ७०,७२० युनिट्स इतकी झाली. SIAM चे महासंचालक राजेश मेनन यांनी सांगितले की, मे महिन्यात तीनही प्रमुख वाहन श्रेणींमध्ये आतापर्यंतची सर्वाधिक विक्री नोंदवली गेली आहे. त्यांच्या मते, मे २०२५ मधील तुलनेने कमी आधार, जीएसटी दरातील कपात आणि सुलभ वित्तपुरवठा पर्याय यामुळे वाहनांच्या मागणीत वाढ झाली आहे.
वाहन उत्पादकांच्या मजबूत घाऊक विक्रीच्या आकडेवारीमागे किरकोळ विक्रीतील मोठी वाढ हे प्रमुख कारण असल्याचेही त्यांनी नमूद केले. यापूर्वी फेडरेशन ऑफ ऑटोमोबाईल डीलर्स असोसिएशन (FADA) ने जाहीर केलेल्या आकडेवारीनुसार, मे महिन्यात प्रवासी वाहनांच्या किरकोळ विक्रीने प्रथमच ४ लाखांचा टप्पा ओलांडला. ही विक्री वार्षिक आधारावर २३.२५ टक्क्यांनी वाढून ४,०२,५९१ युनिट्स झाली.
FADA च्या मते, ग्रामीण भागातील मजबूत मागणी, एंट्री-लेव्हल कार विभागातील सुधारणा आणि स्पोर्ट युटिलिटी व्हेईकल्स (SUV) ची सातत्यपूर्ण मागणी यामुळे ही वाढ झाली. दुचाकी विभागात स्कूटर विक्रीने विशेष कामगिरी केली. स्कूटरची विक्री २७.४ टक्क्यांनी वाढून ७,३९,६६७ युनिट्स झाली. मोटरसायकल विक्रीत ७.२ टक्के वाढ होऊन ती ११,१३,९७३ युनिट्स वर पोहोचली. तर मोपेड विक्रीत ३०.३ टक्के वाढ होऊन ती ४८,५६९ युनिट्स झाली. तीन चाकी वाहन विभागानेही आपली वाढ कायम ठेवली. या विभागातील विक्री गेल्या वर्षीच्या ५३,९४२ युनिट्सवरून वाढून ७०,७२० युनिट्स झाली.
हे ही वाचा:
भारत-स्लोव्हाकिया संबंधांना ‘व्यापक भागीदारी’चा दर्जा!
दिव्यांशी सिंग बनणार भारतीय हवाई दलातील पहिल्या महिला कमिशन्ड अधिकारी
पंतप्रधान नरेंद्र मोदींसमोर स्लोव्हाकियन कलाकारांनी गायले ‘वंदेमातरम’
मदरशातील शिक्षकासोबत लग्न ठरल्याने मुलीने संपवले जीवन
तीन चाकी विभागात प्रवासी वाहतूक करणारी वाहने हा सर्वात मोठा विभाग ठरला. त्यांची विक्री ३० टक्क्यांनी वाढून ५७,६४९ युनिट्स झाली. तर मालवाहू तीन चाकी वाहनांच्या विक्रीत ३५.३ टक्क्यांची वाढ नोंदवली गेली आणि विक्री ११,८०२ युनिट्स वर पोहोचली. वाहन उद्योगातील ही मजबूत वाढ देशातील ग्राहकांचा वाढता आत्मविश्वास, ग्रामीण अर्थव्यवस्थेतील सुधारणा आणि सुलभ कर्ज सुविधांमुळे वाहन क्षेत्राला मिळालेल्या नव्या गतीचे द्योतक मानली जात आहे.