पश्चिम बंगालमधील मालदा जिल्ह्यात न्यायालयीन अधिकाऱ्यांना ओलीस ठेवल्याच्या आणि हिंसाचाराच्या प्रकरणात राष्ट्रीय तपास संस्थेने (NIA) अटक केली आहे. एनआयएने काँग्रेसशी संबंधित दोन कार्यकर्ते शाहदात हुसेन आणि आसिफ शेख यांना अटक केली आहे. यापूर्वी काँग्रेस नेते सायेम चौधरी आणि इतर काहींनाही ताब्यात घेण्यात आले होते.
हे प्रकरण १ एप्रिल रोजी कालियाचक-II बीडीओ कार्यालयात झालेल्या हिंसाचाराशी संबंधित आहे, जिथे मतदार यादीच्या विशेष पुनरावलोकन (SIR) दरम्यान नावे वगळल्याच्या विरोधात मोठी गर्दी आक्रमक झाली होती. सात न्यायालयीन अधिकाऱ्यांना अनेक तास ओलीस ठेवण्यात आले होते. एनआयएच्या माहितीनुसार, शाहदात हुसेन आणि आसिफ शेख यांनी आंदोलनादरम्यान गर्दी जमवणे आणि भडकवण्यात महत्त्वाची भूमिका बजावली. सध्या एजन्सी दोघांची चौकशी करत असून, या घटनेतील त्यांची नेमकी भूमिका तपासली जात आहे.
यापूर्वी एनआयएने इंडियन सेक्युलर फ्रंट (ISF)शी संबंधित पंचायत सदस्य गोलाम रब्बानी यांनाही अटक केली होती. तसेच काँग्रेस नेते सायेम चौधरी यांना अलीनगर पंचायत क्षेत्रात निवडणूक प्रचारादरम्यान ताब्यात घेण्यात आले होते. एका वरिष्ठ एनआयए अधिकाऱ्याने सांगितले, “आम्ही चौधरी यांची चौकशी करत आहोत आणि या प्रकरणातील त्यांची भूमिका निश्चित करत आहोत. पुरेसे पुरावे मिळाल्यास पुढील कारवाई केली जाईल.” तपासात असेही समोर आले आहे की, यापूर्वी राज्याच्या सीआयडीने या प्रकरणात ३५ जणांना अटक केली होती. यामध्ये ऑल इंडिया मजलिस-ए-इत्तेहादुल मुस्लिमीन (AIMIM)शी संबंधित कार्यकर्ता आणि वकील मोफक्करुल इस्लाम याचाही समावेश आहे. सीआयडीच्या मते, इस्लाम हा या घटनेचा मुख्य सूत्रधार असून त्यानेच कथितपणे गर्दी भडकवली होती.
हे ही वाचा:
२००२ गुजरात दंगल प्रकरणात नऊ हिंदू निर्दोष
स्वरसम्राज्ञी आशा भोसले यांना आज दादरच्या हिंदू स्मशानभूमीत अखेरचा निरोप
“युद्ध संपलेले नाही”; बुलेटप्रुफ जॅकेटमध्ये नेतान्याहूंचा दक्षिण लेबनॉन दौरा
सौदी अरेबियात पाकिस्तानने १३,००० सैनिक आणि फायटर जेट्स पाठवले
एनआयएने आता या सर्व ३५ आरोपींची कस्टडी मागितली असून तपासाचा व्याप्ती आणखी वाढवला जात आहे. अटक करण्यात आलेल्या आरोपींच्या चौकशीतून या कटात सहभागी इतर लोकांची ओळख पटेल, अशी एजन्सीला अपेक्षा आहे. प्रकरणाची गंभीरता लक्षात घेता मालदा जिल्ह्यातील मोथाबाडी आणि कालियाचक पोलिस ठाण्यांत एकूण १२ एफआयआर दाखल करण्यात आले आहेत. डीआयजी दर्जाच्या अधिकाऱ्यांच्या नेतृत्वाखाली सुमारे ४० सदस्यीय एनआयए पथक राज्यात तळ ठोकून तपास करत आहे.
घटनेदरम्यान जमावाने नॅशनल हायवे-१२ जाम केला होता आणि पोलिसांनी हस्तक्षेप केल्यावर दगडफेक करण्यात आली. परिस्थिती नियंत्रणात आणण्यासाठी अनेक तास लागले. त्यानंतर उशिरा रात्री सुरक्षा दलांनी सर्व ओलीस अधिकाऱ्यांची सुरक्षित सुटका केली. निवडणूक आयोगाच्या निर्देशांनंतर आणि सर्वोच्च न्यायालयाच्या हस्तक्षेपानंतर हे प्रकरण एनआयएकडे सोपवण्यात आले असून, या संपूर्ण घटनेमागील कट आणि नेटवर्क उघड करण्यासाठी तपास सुरू आहे.