झारखंडमध्ये सुरक्षा दलाने नक्षलवाद्यांविरोधात मोठी कारवाई केली आहे. ३६ तास चाललेल्या या चकमकीत आतापर्यंत २१ नक्षलवादी ठार झाले आहेत. गुरुवारी १५ जणांच्या मृत्यूची पुष्टी झाल्यानंतर, शुक्रवारी आणखी सहा मृतदेह सापडले. २ कोटी रुपयांपेक्षा जास्त बक्षीस असलेला नक्षलवादी अनल हा त्याच्या २५ नक्षलवादी साथीदारांसोबत वेढला गेला होता. अनलसह २१ जणांना ठार मारण्यात आले आहे, अशी माहिती समोर आली आहे.
झारखंडमधील पश्चिम सिंहभूम जिल्ह्यातील सारंडा येथील घनदाट जंगलात पतिराम मांझी उर्फ अनल दा हा २५ नक्षलवाद्यांसह घेरला गेला होता. सीआरपीएफ आणि झारखंड पोलिसांनी संयुक्त कारवाईत त्यांना घेरले होते. नक्षलवाद्यांनी केलेल्या गोळीबारानंतर सुरक्षा दलांनी प्रत्युत्तर देऊन दहशत निर्माण केली. २.३५ कोटी रुपयांचे बक्षीस असलेला अनल दा देखील ठार झाला. झारखंड सरकारने १ कोटी रुपयांचे, ओडिशा सरकारने १.२ कोटी रुपयांचे बक्षीस त्याच्यावर जाहीर केले होते. याशिवाय राष्ट्रीय तपास संस्थेने (एनआयए) त्याच्यावर १५ लाख रुपयांचे बक्षीस जाहीर केले होते.
अनल दा हा माओवादी लष्करी आयोगाचा प्रमुख देखील होता. अलिकडच्या काळात कोल्हाणच्या सारंडा वनक्षेत्रात माओवाद्यांनी सुरक्षा दलांवर केलेल्या मोठ्या हल्ल्यांमध्ये अनलने महत्त्वाची भूमिका बजावली होती. ठार झालेल्या नक्षलवाद्यांमध्ये एसएसी कमांडर अनमोल उर्फ सुशांतचा समावेश आहे, ज्याच्यावर २५ लाख रुपयांचे बक्षीस होते. अनमोलच्या डोक्यावर ओडिशामध्ये ६५ लाख रुपयांचे बक्षीसही होते. आतापर्यंत मारल्या गेलेल्या डझनहून अधिक नक्षलवाद्यांची ओळख पटली आहे. ठार झालेल्या नक्षलवाद्यांमध्ये अनेक महिलांचाही समावेश आहे.
हे ही वाचा:
मुस्लिम महिलेने पतीला गो- तस्करीच्या कटात गोवले, प्रियकराला अटक
जपानच्या पंतप्रधानांनी अवघ्या तीन महिन्यांत संसद केली बरखास्त
इंदूरमध्ये दूषित पाणी पिल्याने २२ जण आजारी
खलिस्तान समर्थक दहशतवादी पन्नूविरुद्ध दिल्लीत एफआयआर
गुरुवारी सकाळी ६ वाजताच्या सुमारास चाईबासा येथील किरीबुरूच्या दुर्गम कुमडी आणि होंजोदिरी गावांमध्ये सुरू झालेल्या चकमकीनंतर पोलिसांनी शोध मोहिमेदरम्यान मोठ्या प्रमाणात शस्त्रे आणि स्फोटके जप्त केली, असे ऑपरेशन्स महानिरीक्षक मायकेल राज एस. यांनी सांगितले. नक्षलवाद्यांना शोधण्यासाठी हेलिकॉप्टर आणि ड्रोनचा वापर केला जात आहे. ऑपरेशन्स महानिरीक्षकांनी असेही सांगितले की या कारवाईने माओवादी संघटनेचा कणा मोडला आहे.