उत्तर प्रदेशची राजधानी लखनऊ येथील एक धक्कादायक घटना उघडकीस आली आहे. एका मुस्लिम महिलेने आपल्या प्रियकरासोबत राहण्यासाठी पतीला खोट्या प्रकरणांत अडकवण्याचा कट रचला. तिने पतीला दोनदा गो-तस्करी आणि गोवधाच्या प्रकरणांत गोवण्याचा प्रयत्न केला. पोलिसांच्या माहितीनुसार, ही संपूर्ण योजना अत्यंत सुनियोजित होती आणि पतीला तुरुंगात पाठवून घटस्फोटाचा मार्ग मोकळा करणे हाच तिचा उद्देश होता. मात्र कटाचा पर्दाफाश होताच महिलेचा प्रियकर अमान याला अटक करण्यात आली, तर महिला न्यायालय परिसरातून फरार होण्यात यशस्वी ठरली.
लखनऊ पश्चिमचे पोलीस उपायुक्त (डीसीपी) विश्वजीत श्रीवास्तव यांच्या मते, संबंधित मुस्लिम महिला आणि अमान यांची ओळख सुमारे दोन वर्षांपूर्वी इंस्टाग्रामवर झाली होती. अमान हा भोपाळचा रहिवासी असून तो वारंवार लखनऊला येऊन तिला भेटत असे. महिला अलीगढ मुस्लिम विद्यापीठातून इंग्रजी साहित्य विषयात पदव्युत्तर पदवीधर आहे, तर अमान संगणक विज्ञानात बीटेक पदवीधर आहे. महिलेचा पती वसीम हा कागदाच्या व्यवसायाशी संबंधित व्यापारी आहे.
पोलीस तपासात समोर आले की ऑगस्ट २०२५ मध्ये पहिल्यांदा वसीमला अडकवण्याची योजना आखण्यात आली. अमानने ‘राहुल’ या बनावट नावाने बजरंग दलशी संपर्क साधला. सप्टेंबरमध्ये त्याने हजरतगंजमधील एका पार्किंगमध्ये उभ्या असलेल्या वसीमच्या महिंद्रा थार गाडीत ३० किलो मांस लपवले. गाडीच्या चाव्या वसीमच्या पत्नीनेच दिल्या होत्या. त्यानंतर अमानने हिंदू संघटनेला माहिती दिली, ज्यामुळे पोलिसांना अलर्ट करण्यात आले. परिणामी वसीमला अटक होऊन तुरुंगात पाठवण्यात आले; मात्र महिन्याभरानंतर त्याची जामिनावर सुटका झाली. नंतर हे स्पष्ट झाले की मांस मुद्दामहून गाडीत ठेवण्यात आले होते.
पहिला कट फसल्यावर महिला आणि तिच्या प्रियकराने दुसरी योजना आखली. महिलेने पतीच्या मोबाईल फोनचा वापर करून ऑनलाइन पोर्टर वाहन बुक केले आणि ओटीपी अमानला दिला. १४ जानेवारीला अमान भोपाळहून १२ किलो गोमांस घेऊन लखनऊला पोहोचला. जुन्या शहरातील एका पत्त्यावरून बोऱ्यात बंद केलेली खेप ई-रिक्शात लोड करण्यात आली, ज्याची डिलिव्हरी काकोरीतील वसीमच्या कारखान्याजवळ ठरवण्यात आली होती. अमानने पुन्हा हिंदू संघटनेला माहिती दिली, त्यानंतर १५ जानेवारीला काकोरी पोलिसांनी रिक्शा थांबवून गोमांस जप्त केले आणि वसीमला ताब्यात घेतले.
तपासादरम्यान वसीमने सांगितले की त्याला पत्नीच्या बेकायदेशीर संबंधांचा संशय होता, म्हणून त्याने घरात सीसीटीव्ही कॅमेरे बसवले होते. फुटेजमध्ये असे आढळले की घटनेच्या दोन दिवस आधी महिला वसीम बाथरूममध्ये असताना त्याच्या फोनमधील ओटीपी मिळवत होती. त्यानंतर अमानशी संपर्क केल्याचे पुरावेही सापडले. काकोरी पोलीस ठाण्याचे निरीक्षक सतीश चंद्र राठौर यांनी सांगितले, “अमानने वसीमची ओळख वापरून अमीनाबाद ते काकोरी असा ऑनलाइन पोर्टर बुक केला. गोमांस भोपाळहून मागवले गेले होते, ते कार्डबोर्ड बॉक्समध्ये लपवून वाहनात ठेवण्यात आले. पोलिसांची तात्काळ कारवाई व्हावी यासाठी अमानने ‘राहुल’ या नावाने बजरंग दलाच्या सदस्यांना माहिती दिली.”
हे ही वाचा:
जपानच्या पंतप्रधानांनी अवघ्या तीन महिन्यांत संसद केली बरखास्त
इंदूरमध्ये दूषित पाणी पिल्याने २२ जण आजारी
खलिस्तान समर्थक दहशतवादी पन्नूविरुद्ध दिल्लीत एफआयआर
ट्रम्प यांच्या ‘शांतता मंडळा’त सामील होण्यावरून पाकमध्ये गदारोळ
पोलिसांच्या माहितीनुसार, १८ जानेवारीला सापळा रचून अमानला अटक करण्यात आली असून त्याने गुन्ह्याची कबुली दिली आहे. महिला आधीच घरातून फरार झाली होती. २० जानेवारीला तीन पोलिस कर्मचारी तिला पकडण्यासाठी इलाहाबाद उच्च न्यायालयाच्या परिसरात पोहोचले; मात्र वकिलांच्या गोंधळात ती तेथून पळून जाण्यात यशस्वी ठरली. या घटनेनंतर संबंधित पोलिस कर्मचाऱ्यांना निलंबित करण्यात आले असून त्यांच्याविरुद्ध अवैध प्रवेशाचा गुन्हा दाखल करण्यात आला आहे. सध्या महिलेचा शोध सुरू असून, लवकरच तिला अटक करण्यात येईल, असे पोलिसांनी सांगितले आहे.
