भारतीय वायुदलातील एका विंग कमांडरला सोशल मीडियावर महिलेच्या माध्यमातून ‘हनी ट्रॅप’मध्ये अडकवून संवेदनशील संरक्षणविषयक माहिती मिळवल्याचा धक्कादायक प्रकार समोर आला आहे. दिल्ली पोलिसांनी या अधिकाऱ्याला माहिती कथितरीत्या शेअर केल्याच्या आरोपाखाली अटक केली असून, त्याच्यावर शासकीय गुप्तता कायद्यांतर्गत गुन्हा दाखल करण्यात आला आहे.
पोलिसांच्या माहितीनुसार, वैयक्तिक आयुष्यातील कठीण काळात या विंग कमांडरची सोशल मीडियावर एका महिलेशी ओळख झाली. सुरुवातीला दोघांमध्ये संवाद सुरू झाला आणि त्यानंतर नियमित व्हिडिओ कॉल होऊ लागले. महिलेने अधिकाऱ्याचा विश्वास संपादन केल्यानंतर त्याच्याकडून लष्करी हालचाली आणि तैनातीशी संबंधित माहिती मागण्यास सुरुवात केल्याचा पोलिसांचा दावा आहे.
अधिकाऱ्याने लष्करी युनिट्सच्या हालचाली व तैनातीशी संबंधित तपशील, तसेच काही फोटो, व्हिडिओ, कागदपत्रे आणि इतर संवेदनशील माहिती डिजिटल माध्यमातून महिलेला पाठवल्याचा आरोप आहे. ही माहिती नेमकी किती प्रमाणात बाहेर गेली आणि तिचा वापर कोणत्या उद्देशाने होणार होता, याचा तपास सुरू आहे.
या प्रकरणात आणखी एक गंभीर बाब समोर आली आहे. संबंधित महिलेने विंग कमांडरला त्याच्या एका सहकाऱ्याच्या मोबाईलमध्ये विशिष्ट ऍप स्थापित करण्यास सांगितल्याचे पोलिसांनी म्हटले आहे. हे ऍप हेरगिरी करणारे किंवा दूरस्थ प्रवेश मिळवून देणारे घातक सॉफ्टवेअर असण्याचा तपास यंत्रणांना संशय आहे.
हे ही वाचा:
खालिद, शरजीलच्या सुटकेची मागणी करणाऱ्या दोन विद्यार्थ्यांना जामीन नाही
ई-२० पेट्रोलमध्ये क्लोराइड, पाण्याची भेसळ नाही!
भारत-चीनवर टॅरिफची तलवार; १००% शुल्काचे विधेयक मंजूर
सलमान खानच्या घराबाहेर बंदोबस्तावर असलेल्या पोलिसाचा मृत्यू
दिल्ली पोलिसांना संबंधित महिलेचा पाकिस्तानी गुप्तचर यंत्रणेशी संबंध असल्याचा संशय आहे. तिच्यामागे पाकिस्तानमध्ये कार्यरत सूत्रधार असण्याची शक्यताही तपासली जात आहे. या प्रकरणामागे मोठे हेरगिरीचे जाळे आहे का आणि त्यात आणखी कोणाचा सहभाग आहे, याचा शोध तपास यंत्रणा घेत आहेत. भारतीय वायुदलाच्या गुप्तचर विभागाकडून मिळालेल्या विशिष्ट माहितीच्या आधारे दिल्ली पोलिसांनी कारवाई केली. ३१ मे २०२६ रोजी रात्री विंग कमांडरला अटक करण्यात आली.