पश्चिम आशियामध्ये सुरू असलेल्या युद्धाच्या पार्श्वभूमीवर शनिवारी (७ मार्च) इस्रायलने इराणची राजधानी तेहरान येथे मोठ्या प्रमाणावर हवाई हल्ले केले. या हल्ल्यांमध्ये तेहरानमधील प्रमुख विमानतळांपैकी एक असलेल्या मेहराबाद आंतरराष्ट्रीय विमानतळाला लक्ष्य करण्यात आले. हल्ल्यानंतर विमानतळ परिसरात मोठी आग लागली आणि संपूर्ण परिसरात धुराचे लोट दिसून आले.
सोशल मीडियावर समोर आलेल्या अनेक व्हिडिओंमध्ये रनवेवर उभे असलेले एक विमान आगीच्या ज्वाळांमध्ये सापडलेले दिसत आहे, तर आकाशात दाट काळा धूर पसरलेला दिसत आहे. मेहराबाद विमानतळ हा इराणमधील सर्वाधिक व्यस्त विमानतळांपैकी एक असून येथे देशांतर्गत तसेच काही आंतरराष्ट्रीय उड्डाणेही चालतात. इस्रायली सैन्याने निवेदन जारी करून सांगितले की, त्यांनी तेहरानमध्ये व्यापक हवाई हल्ल्यांची मालिका सुरू केली असून इराणी सत्तेशी संबंधित अनेक ठिकाणांना लक्ष्य करण्यात आले आहे. मात्र या ताज्या हल्ल्यात विमानतळाच्या नेमक्या कोणत्या भागांचे नुकसान झाले आहे याची तत्काळ अधिकृत पुष्टी झालेली नाही.
दरम्यान, या आठवड्यात यापूर्वीही या विमानतळावर हल्ला झाला होता. ४ मार्च रोजी इस्रायलने दावा केला होता की त्यांनी येथे असलेल्या हवाई संरक्षण आणि देखरेख प्रणाली नष्ट करण्यासाठी हल्ला केला होता, कारण त्या त्यांच्या हवाई मोहिमांसाठी धोका ठरत होत्या.
हे ही वाचा:
पत्रकार हत्या प्रकरणात गुरमीत राम रहीम निर्दोष पण, ‘या’ प्रकरणात मुक्काम तुरुंगातच
रशिया अमेरिकेच्या लष्करी तळांची गुप्त माहिती इराणला देतोय?
घरगुती गॅस ६० रुपयांनी तर, व्यावसायिक सिलेंडर ११५ रुपयांनी महागला
मुंब्रा येथे कन्स्ट्रक्शन व्यावसायिकाच्या घराबाहेर गोळीबार
पश्चिम आशियातील सध्याचा तणाव २८ फेब्रुवारी रोजी अधिक तीव्र झाला, जेव्हा अमेरिका आणि इस्रायलने मिळून इराणवर मोठे लष्करी हल्ले केले. या हल्ल्यांमध्ये इराणचे सर्वोच्च नेते अली खामेनी यांच्यासह अनेक वरिष्ठ इराणी अधिकाऱ्यांचा मृत्यू झाल्याचे सांगितले गेले. १ मार्च रोजी इराणने खामेनी यांच्या मृत्यूची पुष्टी करत कठोर प्रत्युत्तर देण्याचा इशारा दिला होता. तेहरानने असेही म्हटले होते की या प्रदेशातील अमेरिकेची लष्करी तळे अमेरिकन भूभागासमान मानली जातील आणि त्यांच्यावर प्रतिहल्ला केला जाईल. यानंतर इराणने इस्रायलसोबतच प्रदेशातील अमेरिकन लष्करी तळांनाही लक्ष्य केले आहे.