अमेरिकेत एका पाकिस्तानी नागरिकाला अमेरिकेचे राष्ट्राध्यक्ष डोनाल्ड ट्रम्प आणि इतर वरिष्ठ अमेरिकन नेत्यांची हत्या करण्याचा कट रचल्याबद्दल दोषी ठरवण्यात आले आहे. हा कट २०२० मध्ये इराणी लष्करी कमांडर कासिम सुलेमानी याच्या हत्येचा बदला घेण्यासाठी रचला गेला असल्याचे सांगितले जाते.
अमेरिकेच्या न्याय विभागाने घेतलेल्या निर्णयानुसार, आरोपीचे नाव आसिफ मर्चंट आहे. त्याला सुपारी घेऊन हत्या करणे आणि सीमापार दहशतवादी हल्ल्याचे नियोजन अशा विविध गुन्ह्यांत दोषी ठरवण्यात आले.
अधिकाऱ्यांच्या मते, हा कट २०२४ मध्ये तयार करण्यात येत होता आणि त्याचे लक्ष्य अनेक वरिष्ठ अमेरिकन नेते होते. त्यामध्ये जो बायडेन आणि रिपब्लिकन नेते निक्की हॅले यांचाही समावेश होता. निक्की हॅले यांनी २०२४ मध्ये रिपब्लिकन राष्ट्रपती उमेदवारीसाठी ट्रम्प यांना आव्हान दिले होते.
तपासकर्त्यांच्या म्हणण्यानुसार, मर्चंटने अमेरिकेतच काही लोकांना या हत्या करण्यासाठी भरती करण्याचा प्रयत्न केला. मात्र एप्रिल २०२४ मध्ये ज्याच्याशी त्याने संपर्क साधला त्या व्यक्तीने हा कट अधिकाऱ्यांना कळवला आणि नंतर गुप्त माहिती देणारा म्हणून सहकार्य केले. त्याच वर्षी मर्चंटला अटक करण्यात आली होती आणि त्याने सुरुवातीला दोष नाकारला होता.
ब्रूकलिन येथील न्यायालयात चाललेल्या खटल्यादरम्यान त्याने इराणच्या इस्लामिक रिव्होल्युशनरी गार्ड कॉर्प्सशी संबंध असल्याची कबुली दिली.
हे ही वाचा:
पश्चिम आशियातील संघर्षाचा जागतिक अर्थव्यवस्थेवर परिणाम
भारत-अमेरिका व्यापार करार ३-४ महिन्यांत शक्य
धुरंधर २ ने पाकिस्तानचा पुन्हा जळफळाट होणार!
मात्र त्याने असेही सांगितले की या चर्चांमध्ये तो अनिच्छेने सहभागी झाला होता आणि तेहरान येथे राहणाऱ्या आपल्या कुटुंबाच्या सुरक्षिततेची त्याला भीती वाटत होती. तसेच त्याला एखाद्या विशिष्ट व्यक्तीची हत्या करण्याचे थेट आदेश दिले गेले नव्हते, मात्र संभाषणात तीन संभाव्य लक्ष्यांचा उल्लेख झाला होता.
दरम्यान, इराणने ट्रम्प किंवा इतर अमेरिकन अधिकाऱ्यांवर हल्ल्याचा कट रचल्याचे आरोप फेटाळले आहेत. हा खटला अशा वेळी समोर आला आहे जेव्हा अलीकडील अमेरिका आणि इस्रायलच्या इराणवरील हल्ल्यांनंतर मध्यपूर्वेत तणाव मोठ्या प्रमाणात वाढला आहे.