अमेरिकेच्या स्वातंत्र्याच्या २५० व्या वर्धापन दिनानिमित्त एक महत्त्वाचा आणि वादग्रस्त निर्णय समोर आला आहे. अमेरिकेच्या परराष्ट्र विभागाने मर्यादित संख्येत विशेष स्मरणिका पासपोर्ट जारी करण्याची योजना जाहीर केली आहे. या विशेष पासपोर्टमध्ये राष्ट्राध्यक्ष डोनाल्ड ट्रम्प यांचा फोटो समाविष्ट करण्यात येणार आहे.
४ जुलै २०२६ रोजी अमेरिका आपल्या स्वातंत्र्याच्या २५० वर्षांचा मोठ्या उत्साहात उत्सव साजरा करणार आहे. त्याच पार्श्वभूमीवर हे विशेष पासपोर्ट तयार करण्यात येत आहेत. या पासपोर्टच्या आतल्या पानांवर डोनाल्ड ट्रम्प यांचा फोटो दिला जाणार असून, त्यासोबत १७७६ साली स्वातंत्र्य घोषणापत्रावर स्वाक्षऱ्या होत असल्याचे ऐतिहासिक चित्र देखील दाखवले जाईल.
हे ही वाचा:
ओपेकला मोठा धक्का! संयुक्त अरब अमिरातीने संघटना सोडली
उष्णतेचा वाढता प्रकोप; हीट स्ट्रोकपासून कसे वाचाल?
आज बंगालमधील मतदानाचा दुसरा टप्पा, हिंदू मते बदल घडवणार?
निवडणुका संपल्या की पेट्रोल-डिझेल महागणार?
या डिझाइनमध्ये अमेरिकन ध्वज, स्वातंत्र्य घोषणापत्रातील मजकूर आणि ट्रम्प यांची सुवर्ण स्वाक्षरी असे विविध प्रतीकात्मक घटक असणार आहेत. विशेष म्हणजे, हे पासपोर्ट पूर्णपणे वैध असतील आणि त्यामध्ये सध्याच्या पासपोर्टप्रमाणे सर्व सुरक्षा वैशिष्ट्ये कायम ठेवली जातील.
हे पासपोर्ट सर्व नागरिकांसाठी बंधनकारक नसतील. इच्छुक नागरिकांना ते घेण्याचा पर्याय दिला जाईल, तर नियमित पासपोर्ट पूर्वीप्रमाणेच उपलब्ध राहतील. काही अहवालांनुसार, हे विशेष पासपोर्ट मर्यादित प्रमाणात तयार केले जाणार असून, ठराविक केंद्रांमधूनच वितरित केले जातील.
हा उपक्रम “अमेरिका२५०” या राष्ट्रीय मोहिमेचा एक भाग आहे. या मोहिमेत देशभर विविध कार्यक्रम, सांस्कृतिक उपक्रम आणि समारंभ आयोजित केले जाणार आहेत. यात क्रीडा स्पर्धा, ऐतिहासिक प्रदर्शन आणि मोठ्या प्रमाणावर राष्ट्रीय कार्यक्रमांचा समावेश असेल.
मात्र या निर्णयावर टीका देखील होत आहे. अनेक राजकीय विश्लेषक आणि विरोधकांचे म्हणणे आहे की, एखाद्या जिवंत किंवा अलीकडील राजकीय नेत्याचा फोटो अधिकृत सरकारी कागदपत्रांवर देणे ही पारंपरिक पद्धतीच्या विरोधात आहे. त्यामुळे सरकारी प्रतीकांचा राजकीय वापर होण्याची शक्यता व्यक्त केली जात आहे.
एकूणच, अमेरिकेच्या २५० व्या स्वातंत्र्यदिनानिमित्त हा उपक्रम ऐतिहासिक आणि आकर्षक मानला जात असला, तरी त्यावरून राजकीय वाद निर्माण होण्याची शक्यता नाकारता येत नाही.