भारतीय क्रिकेट नियामक मंडळाने (BCCI) दुबई येथे झालेल्या आंतरराष्ट्रीय क्रिकेट परिषदेच्या (ICC) बोर्डाच्या बैठकीदरम्यान आशिया कप २०२५ च्या ट्रॉफीचा मुद्दा औपचारिकपणे उपस्थित केला. बीसीसीआय आणि आशियाई क्रिकेट परिषदेचे (ACC) अध्यक्ष मोहसिन नक्वी यांच्यातील वाद दूर करण्यास आयसीसीने सहमती दर्शवली आहे. २८ सप्टेंबर रोजी दुबई येथे झालेल्या अंतिम सामन्यात भारताने पाकीस्तानला सात विकेट्सनी हरवले, परंतु संघाला अद्याप ट्रॉफी मिळालेली नाही. ही चांदीची ट्रॉफी अजूनही नक्वी यांच्या ताब्यात असून त्यांच्या निर्देशानुसार ती दुबईतील एसीसी मुख्यालयात आहे.
माहितीनुसार, आयसीसीने आता हे प्रकरण सोडवण्यासाठी एक समिती स्थापन केली आहे. बीसीसीआयने आशिया कप ट्रॉफी वाद आयसीसीसमोर उपस्थित केला आहे. आयसीसीने भारत आणि पाकिस्तानला हा मुद्दा सौहार्दपूर्णपणे सोडवण्यास सांगितले आहे. आयसीसीने म्हटले आहे की, भारत आणि पाकिस्तान दोन्हीही जागतिक क्रिकेटसाठी महत्त्वाचे आहेत आणि यावर लक्ष ठेवण्यासाठी एक समिती स्थापन केली आहे, अशी माहिती इंडिया टुडेने सूत्रांच्या हवाल्याने दिली आहे.
आयसीसी बोर्डाच्या बैठकीत भारताचे प्रतिनिधित्व करणारे बीसीसीआय सचिव देवजित सैकिया यांनी म्हटले की, ही ट्रॉफी भारतीय संघाची आहे आणि ती विलंब न करता सोपवण्यात यावी. अनेक आयसीसी संचालकांनी चिंता व्यक्त केली की चॅम्पियन्सकडून ट्रॉफी रोखणे हे क्रिकेटच्या कारभाराचे वाईट परिणाम दर्शवते आणि लवकर तोडगा काढण्याची विनंती केली.
आयसीसी बोर्डाने ओमान क्रिकेट बोर्डाचे अध्यक्ष पंकज खिमजी यांना समितीचे अध्यक्षपद देण्याचा निर्णय घेतला, ज्यांचे बीसीसीआय आणि पीसीबी या दोघांशीही सौहार्दपूर्ण संबंध आहेत. खिमजी यांनी यापूर्वी दोन्ही बोर्डांमधील क्रिकेटविषयक बाबींमध्ये मध्यस्थी केली आहे, असे वृत्त आहे.
हे ही वाचा:
पश्चिम आफ्रिकन देश असलेल्या मालीमध्ये पाच भारतीय नागरिकांचे अपहरण
डोनाल्ड ट्रम्प जी-२० परिषदेत सहभागी होणार नाहीत! कारण आले समोर
तेजस विमानांसाठी ११३ इंजिन खरेदीचा भारत- अमेरिकेमध्ये करार
घुसखोरीचा प्रयत्न उधळला; दोन दहशतवाद्यांना घातले कंठस्नान
सामन्यानंतरच्या सादरीकरण समारंभात भारतीय पुरुष क्रिकेट संघाने नक्वी यांच्याकडून ट्रॉफी स्वीकारण्यास नकार दिल्यानंतर हा वाद सुरू झाला. पाकिस्तानचे गृहमंत्री म्हणूनही काम करणारे नक्वी एसीसी अध्यक्ष म्हणून ट्रॉफी सादर करणार होते. सूर्यकुमार यादवच्या नकारानंतर, ट्रॉफी घेऊन नक्वी निघून गेले. आयसीसी बैठकीच्या सुमारे दहा दिवस आधी बीसीसीआयने नक्वी यांना पत्र लिहून ही ट्रॉफी भारतीय संघाला देण्याची विनंती केली होती. तथापि, कोणताही प्रतिसाद मिळाला नाही. नक्वी यांनी नंतर १० नोव्हेंबर रोजी दुबई येथे एका वेगळ्या समारंभात ट्रॉफी सादर करण्याची ऑफर दिली, परंतु बीसीसीआयने नकार दिला आणि त्याऐवजी आयसीसीच्या बैठकीत हा मुद्दा उपस्थित केला.