पंतसमोर नवी ‘कसोटी’; जुरेल-ईशानची दावेदारी जोरात!

एकेकाळी टीम इंडियाच्या तिन्ही फॉरमॅटमधील प्रमुख खेळाडू आणि भविष्यातील कर्णधारपदाचा दावेदार मानला जाणारा ऋषभ पंत सध्या आपल्या क्रिकेट कारकिर्दीतील कठीण टप्प्यातून जात आहे. वनडे आणि टी-२० संघातून बाहेर असलेल्या पंतसाठी आता कसोटी संघातील स्थानही सुरक्षित राहिलेले नाही. ध्रुव जुरेल आणि ईशान किशन यांच्या दमदार कामगिरीमुळे पंतसमोर मोठे आव्हान उभे राहिले आहे.

कसोटी क्रिकेटमध्ये पंतच्या अनुपस्थितीत ध्रुव जुरेलने सातत्यपूर्ण कामगिरी करत स्वतःची दावेदारी मजबूत केली आहे. देशांतर्गत तसेच परदेशातील परिस्थितीत भारतीय डाव सावरण्याची क्षमता त्याने दाखवून दिली आहे. पंतच्या तुलनेत जुरेलची फलंदाजी अधिक संयमी आणि पारंपरिक कसोटी शैलीची आहे. पंत आक्रमक फलंदाजीसाठी ओळखला जातो, तर जुरेल संयमाने डाव पुढे नेण्यावर भर देतो.

त्यामुळे सध्या कसोटी संघात पंतसाठी सर्वात मोठे आव्हान ध्रुव जुरेलकडूनच असल्याचे चित्र आहे.

दुसरीकडे, ईशान किशननेही देशांतर्गत क्रिकेटमध्ये दमदार कामगिरी करत राष्ट्रीय संघात पुनरागमन केले आहे. तिन्ही फॉरमॅटमध्ये खेळण्याचा अनुभव असलेला ईशान यष्टीरक्षक फलंदाज म्हणून पंतसाठी आणखी एक पर्याय निर्माण करतो. टी-२०नंतर त्याने वनडे संघातही पुनरागमन केले आहे.

पंतप्रमाणेच ईशान हा डावखुरा फलंदाज आहे. परिस्थितीनुसार आक्रमक किंवा संयमी फलंदाजी करण्याची क्षमता, तसेच गरजेनुसार वरच्या किंवा मधल्या क्रमांकावर खेळण्याची लवचिकता ही ईशानची जमेची बाजू आहे. त्यामुळे पंतने आगामी काळात कसोटी क्रिकेटमध्ये अपेक्षित कामगिरी केली नाही, तर ईशान किशनही दीर्घ फॉरमॅटमध्ये पुनरागमन करण्याच्या शर्यतीत उतरू शकतो.

कसोटीतील आकडे काय सांगतात?

पंतचा कसोटी क्रिकेटमधील अनुभव आणि आकडेवारी निश्चितच जुरेल व ईशानपेक्षा सरस आहे. मात्र, क्रिकेटमध्ये सध्याचा फॉर्म आणि सातत्यही तितकेच महत्त्वाचे ठरते. त्यामुळे आगामी कसोटी मालिकांमध्ये पंतची कामगिरी आणि जुरेल-ईशानची दावेदारी याकडे निवड समितीचे लक्ष असणार आहे.

पंतचे कसोटी संघातील स्थान कायम राहणार की जुरेल-ईशान त्याला आव्हान देणार, याचे उत्तर आगामी कामगिरीतूनच मिळणार आहे.