थायलंड ओपन २०२६ बॅडमिंटन स्पर्धेत भारताच्या स्टार खेळाडूंनी शानदार कामगिरी करत क्वार्टर फायनलमध्ये प्रवेश केला आहे. दोन वेळा ऑलिम्पिक पदक विजेती पीव्ही सिंधू तसेच सात्विकसाईराज रंकीरेड्डी आणि चिराग शेट्टी या जोडीने आपल्या प्रतिस्पर्ध्यांवर मात करत पुढची फेरी गाठली.
जागतिक क्रमवारीत १२व्या स्थानावर असलेल्या पीव्ही सिंधूने डेन्मार्कच्या अमाली शुल्जचा अवघ्या २८ मिनिटांत २१-१३, २१-१५ असा सरळ गेममध्ये पराभव केला. सिंधूची या स्पर्धेतील ही सलग दुसरी विजय ठरली. याआधी तिने पहिल्या फेरीत चायनीज तैपईच्या तुंग सिउ-टोंगला २१-९, २१-१२ ने हरवलं होतं.
आता क्वार्टर फायनलमध्ये सिंधूची लढत सध्याची विश्वविजेती जपानच्या अकाने यामागुचीविरुद्ध होणार आहे. विशेष म्हणजे हेड-टू-हेड रेकॉर्डमध्ये सिंधूकडे १५-१३ अशी आघाडी आहे.
दरम्यान, पुरुष दुहेरीत सात्विक आणि चिरागच्या जोडीने मलेशियाच्या ब्रायन जेरेमी गूनटिंग आणि मोहम्मद हायकल या जोडीचा २१-१२, २१-१९ असा सरळ गेममध्ये पराभव केला. या स्पर्धेत सात्विक-चिराग ही एकमेव अव्वल मानांकित जोडी असून त्यांनी याआधी २०१९ आणि २०२४ मध्येही विजेतेपद पटकावलं आहे.
आता सेमीफायनलमध्ये प्रवेशासाठी त्यांची लढत जपानच्या ताकुमी नोमुरा आणि युइची शिमोगामी या सहाव्या मानांकित जोडीविरुद्ध होणार आहे.
थॉमस कपमध्ये कांस्यपदक जिंकल्यानंतर या स्पर्धेत उतरलेल्या सात्विक-चिराग जोडीने पहिल्या सामन्यात इंडोनेशियाच्या मोह पुत्रा एरवियानस्याह आणि बगास मौलाना यांचा २१-१९, २१-२३, २१-१० असा पराभव केला होता.
भारतीय खेळाडूंच्या इतर सामन्यांमध्ये किदांबी श्रीकांतने सिंगापूरच्या आठव्या मानांकित लोह कीन यूचा २१-१४, २१-१५ असा सरळ गेममध्ये पराभव केला. दुखापतीनंतर पुनरागमन करणाऱ्या लक्ष्य सेनने सिंगापूरच्या जिया हेंग जेसन तेहला २१-१६, २१-१७ ने हरवत शानदार सुरुवात केली.
महिला गटात देविकाने जपानच्या एन. निदाइरावर विजय मिळवला, तर बन्सोडने झांग वेन यूविरुद्धच्या चुरशीच्या सामन्यात १३-२१, २६-२४, २१-१३ अशी शानदार बाजी मारली.
मात्र, भारताच्या अनमोल खरबचा प्रवास पहिल्याच फेरीत संपला. जागतिक क्रमवारीत चौथ्या क्रमांकाच्या चेन यू फेईविरुद्ध तब्बल एक तास दहा मिनिटे चाललेल्या लढतीत अनमोलला २१-१९, १३-२१, १८-२१ असा पराभव स्वीकारावा लागला.