२६ जानेवारी २०२६ रोजी भारताने आपला ७७ वा गणतंत्र दिवस मोठ्या उत्साहात आणि राष्ट्रीय अभिमानाच्या वातावरणात साजरा केला. यंदाच्या कर्तव्यपथावरील परेडमध्ये महाराष्ट्राच्या चित्ररथाने गणेशउत्सवाची भव्य, भावपूर्ण आणि अर्थपूर्ण मांडणी सादर केली. महाराष्ट्राच्या सांस्कृतिक ओळखीचा मानबिंदू असलेल्या गणेशोत्सवाच्या माध्यमातून श्रद्धा, लोककला, परंपरा आणि समाजप्रबोधनाचा संदेश प्रभावीपणे पोहोचवण्यात आला.
चित्ररथाच्या मध्यभागी गणरायाची भव्य, शांत आणि मंगलमूर्ती साकारण्यात आली आहे. भक्तीभाव, आशा आणि सकारात्मक ऊर्जेचे प्रतीक ठरणारी ही मूर्ती पारंपरिक सजावट, फुलांची कलात्मक रचना आणि प्रकाशयोजनेमुळे अधिक उठून दिसते. ढोल-ताशांचे नाद, लेझीम, कोळी नृत्य, लावणी तसेच वारी परंपरेची झलक दाखवणाऱ्या शिल्परचना आणि प्रतिकृतींमुळे चित्ररथाला सजीवपणा लाभला आहे. महाराष्ट्राच्या विविध भागांतील लोककलेचे दर्शन एकाच मंचावर घडवण्याचा हा यशस्वी प्रयत्न ठरतो.
हे ही वाचा:
गणतंत्र दिवस २०२६: कर्तव्यपथावर भारताची ताकद
मोदींच्या बहुरंगी साफ्याने वेधले लक्ष
स्वित्झर्लंड लष्करी संस्थेच्या अहवालात ऑपरेशन सिंदूरच्या यशाचा दावा
२००० ते २०२६: शिक्षणावरील खर्चात ११ पटांहून अधिकची वाढ
गणेशोत्सवाचा सामाजिक पैलूही या चित्ररथात ठळकपणे अधोरेखित करण्यात आला आहे. सार्वजनिक गणेशोत्सवाच्या माध्यमातून स्वातंत्र्यलढ्यात मिळालेली प्रेरणा, समाजात एकता निर्माण करण्याची भूमिका आणि सामूहिक सहभागाची भावना सूचक प्रतिमांतून मांडण्यात आली आहे. स्वच्छता, पर्यावरणपूरक उत्सव, सामाजिक सलोखा आणि युवकांचा सक्रिय सहभाग यांसारखे समकालीन संदेशही प्रभावीपणे सादर करण्यात आले आहेत.
एकूणच हा चित्ररथ महाराष्ट्राची समृद्ध परंपरा आणि आधुनिक विचार यांचा संतुलित संगम दर्शवतो. श्रद्धा जपत समाजाला पुढे नेणारी मूल्ये कशी रुजवता येतात, याचे हे उत्तम उदाहरण आहे. देशभरातील प्रेक्षकांसमोर महाराष्ट्राची सांस्कृतिक ओळख, भक्तीची परंपरा आणि एकतेचा संदेश अभिमानाने मांडणारा हा गणेशउत्सव चित्ररथ नक्कीच लक्षवेधी ठरला.