पंतप्रधान नरेंद्र मोदी यांनी संयुक्त अरब अमीरातचे (युएई) राष्ट्रपती शेख मोहम्मद बिन जायद अल नाहयान यांचे दिल्लीत पालम विमानतळ येथे अत्यंत आपुलकीने स्वागत केले. युएई राष्ट्रपतींचा हा भारताचा अधिकृत दौरा असून, या भेटीकडे भारत–युएई द्विपक्षीय संबंधांच्या दृष्टीने विशेष महत्त्वाने पाहिले जात आहे.
शेख मोहम्मद यांच्या आगमनावेळी पंतप्रधान मोदी स्वतः विमानतळावर उपस्थित राहिले. दोन्ही नेत्यांनी उबदार हस्तांदोलन करत एकमेकांचे स्वागत केले. यावेळी दोन्ही देशांतील मैत्रीपूर्ण संबंध, परस्पर विश्वास आणि दीर्घकालीन सहकार्याची झलक पाहायला मिळाली. जरी हा दौरा अल्पकालीन असला, तरी या भेटीतून महत्त्वाच्या धोरणात्मक आणि आर्थिक मुद्द्यांवर सखोल चर्चा होणार आहे.
हे ही वाचा :
ट्रम्प यांच्या भीतीमुळेच कॅनडाची चीनसोबत लोळण फुगडी….
२०२५ मध्ये बांगलादेशात अल्पसंख्यांकांशी संबंधित ६४५ गुन्हेगारी घटना
ट्रम्प यांच्या टॅरिफविरोधात युरोपियन संघ सार्वभौमत्वाचे अस्त्र वापरणार
त्या आरपीएफ महिलेने केली रेल्वे स्थानकावरून १५०० मुलांची सुटका
या दौऱ्यात भारत आणि संयुक्त अरब अमीरात यांच्यातील व्यापार, गुंतवणूक, ऊर्जा सुरक्षा, संरक्षण सहकार्य, तंत्रज्ञान तसेच प्रादेशिक व जागतिक घडामोडींवर विचारविनिमय होण्याची अपेक्षा आहे. विशेषतः ऊर्जा क्षेत्रात युएई हा भारताचा प्रमुख भागीदार मानला जातो. कच्चे तेल, नैसर्गिक वायू, तसेच नवीकरणीय ऊर्जेच्या क्षेत्रात दोन्ही देशांमध्ये सहकार्य सातत्याने वाढत आहे.
गेल्या काही वर्षांत भारत–युएई संबंधांनी नवी उंची गाठली आहे. युएईमध्ये लाखो भारतीय नागरिक विविध क्षेत्रांत कार्यरत असून, ते दोन्ही देशांमधील दुवा म्हणून काम करतात. दुसरीकडे, युएईकडून भारतात पायाभूत सुविधा, रिअल इस्टेट, स्टार्टअप्स आणि डिजिटल क्षेत्रात मोठ्या प्रमाणावर गुंतवणूक होत आहे. यामुळे भारताच्या आर्थिक विकासाला चालना मिळत आहे.
शेख मोहम्मद बिन जायद अल नाहयान यांची ही भारत भेट दोन्ही देशांतील मैत्री अधिक दृढ करणारी ठरणार आहे. या चर्चांमधून भविष्यातील सहकार्याला नवी दिशा मिळेल, तसेच भारत–युएई धोरणात्मक भागीदारी आणखी बळकट होईल, असा विश्वास व्यक्त केला जात आहे.