पंतप्रधान नरेंद्र मोदी यांनी ऑस्ट्रेलिया दौऱ्यात पुन्हा एकदा ‘ऑपरेशन सिंदूर’चा उल्लेख करत दहशतवादाविरोधातील भारताच्या कठोर भूमिकेचा पुनरुच्चार केला. दहशतवादाविरोधातील भारताची कारवाई ही केवळ सीमित लष्करी मोहीम नव्हती, तर तिचे पडसाद संपूर्ण जगभर उमटले, असे सांगत नरेंद्र मोदी यांनी दहशतवादाला कोणत्याही परिस्थितीत आश्रय किंवा समर्थन देणाऱ्या शक्तींना कडक इशारा दिला.
ऑस्ट्रेलिया दौऱ्यावर असताना पंतप्रधान मोदी म्हणाले, “ऑपरेशन सिंदूरदरम्यान दहशतवादी तळांवर झालेले स्फोट केवळ सीमेलगतच नव्हे, तर संपूर्ण जगभर ऐकू गेले. भारत दहशतवादाविरोधात ‘शून्य सहनशीलता’ धोरणावर ठाम आहे.” “ऑपरेशन सिंदूर दरम्यान, दहशतवाद्यांच्या लपण्याच्या ठिकाणांवर झालेले स्फोट तुम्ही पाहिले असतीलच. त्यांचे पडसाद जगभर ऐकू आले. जेव्हा दहशतवादी छावण्यांवर असा निर्णायक हल्ला करण्यात आला, तेव्हा तुम्हाला अभिमान वाटला नाही का?” असा प्रश्न त्यांनी उपस्थितांना विचारला, ज्यावर गर्दीने जोरदार जल्लोष आणि टाळ्यांचा कडकडाट केला.
पहलगाम दहशतवादी हल्ल्याला प्रत्युत्तर म्हणून भारताने केलेल्या दहशतवादविरोधी कारवाईचा संदर्भ देत, पंतप्रधानांनी यावर जोर दिला की, देशाच्या या कृतीतून भारत दहशतवादाला खंबीरपणे प्रत्युत्तर देईल, असा स्पष्ट संदेश गेला आहे. “जग भारताच्या संरक्षण यंत्रणांची क्षमता आणि विश्वासार्हता पाहत आहे,” असे ते मार्व्हल स्टेडियममधील उपस्थितांना म्हणाले.
पंतप्रधान मोदी म्हणाले की, भारत आणि ऑस्ट्रेलिया हे दोन्ही देश दहशतवाद, अतिरेकी विचारसरणी आणि सीमापार दहशतवादी कारवायांविरोधात एकाच भूमिकेवर आहेत. दहशतवादाला आर्थिक मदत, प्रशिक्षण किंवा सुरक्षित आश्रय देणाऱ्यांवर कठोर कारवाई झाली पाहिजे, यावर दोन्ही देशांचे एकमत असल्याचे त्यांनी सांगितले. त्यांनी दहशतवादाविरोधातील लढाईत माहितीची देवाणघेवाण, गुप्तचर सहकार्य, सायबर सुरक्षा आणि सागरी सुरक्षेतील भागीदारी आणखी मजबूत करण्यावर भर दिला.
हे ही वाचा:
तृणमूलच्या निधीतून जेट, हेलिकॉप्टरची खरेदी; पुन्हा पक्षानेच भाड्याने वापरले?
समान नागरी कायद्यासाठी सात सदस्यांची समिती, न्या. रंजना देसाई अध्यक्ष
मधुमेहींसाठी दिलासा! आठवड्यातून एकदाच घेण्याचे ‘अविक्ली’ इन्सुलिन भारतात लॉन्च
ऑस्ट्रेलियातून भारतात युरेनियम आयातीचा मार्ग मोकळा
पंतप्रधानांनी सांगितले की, ऑपरेशन सिंदूर ही भारताच्या स्वसंरक्षणाच्या अधिकाराची आणि दहशतवादाविरोधातील ठाम इच्छाशक्तीची स्पष्ट अभिव्यक्ती होती. दहशतवादी संघटनांविरोधात भारत आवश्यक ते सर्व निर्णय घेण्यास सक्षम असून, देशाच्या सुरक्षेशी कोणतीही तडजोड केली जाणार नाही, असा संदेश या कारवाईतून देण्यात आला.
या दौऱ्यात संरक्षण, ऊर्जा, तंत्रज्ञान, शिक्षण, महत्त्वाची खनिजे, स्वच्छ ऊर्जा आणि सागरी सहकार्य अशा विविध क्षेत्रांतील अनेक महत्त्वाच्या करारांवर दोन्ही देशांनी सहमती दर्शवली. तसेच इंडो-पॅसिफिक क्षेत्रात शांतता, स्थैर्य आणि मुक्त नौवहनाला प्रोत्साहन देण्यासाठी सहकार्य अधिक दृढ करण्याचा निर्धारही दोन्ही देशांनी व्यक्त केला. पश्चिम आशियातील वाढता तणाव, सागरी मार्गांची सुरक्षा आणि जागतिक पुरवठा साखळीवरील संकटाचा उल्लेख करत मोदी म्हणाले की, आजच्या काळात लोकशाही मूल्यांवर विश्वास ठेवणाऱ्या देशांनी अधिक जवळून काम करण्याची गरज आहे. भारत आणि ऑस्ट्रेलिया ही भागीदारी केवळ द्विपक्षीय संबंधांपुरती मर्यादित नसून, संपूर्ण इंडो-पॅसिफिक प्रदेशातील शांतता आणि स्थैर्यासाठीही महत्त्वाची असल्याचे त्यांनी स्पष्ट केले.