भारताच्या वित्तीय सेवा क्षेत्रात एप्रिल ते जून या कालावधीत IPO आणि QIP उपक्रमांसह एकूण ५.६ अब्ज डॉलर मूल्यातील ७९ व्यवहार नोंदवले गेले, अशी माहिती सोमवारी आलेल्या एका अहवालात देण्यात आली आहे. ग्रँट थॉर्नटन इंडियाच्या ‘दुसऱ्या तिमाहीसाठी फाइनेंशियल सर्व्हिस डील ट्रॅकर’ अहवालानुसार, व्यवहारांच्या संख्येत १८ टक्क्यांनी वाढ झाली असून २०२५ च्या पहिल्या तिमाहीच्या तुलनेत मूल्यात केवळ ५ टक्के वाढ नोंदवली गेली. मात्र या तिमाहीत जागतिक अनिश्चिततेच्या आणि व्यापारातील तणावाच्या पार्श्वभूमीवर एक संतुलित गुंतवणूक दृष्टिकोन पाहायला मिळाला.
अहवालानुसार, पब्लिक मार्केट उपक्रम वगळता या क्षेत्रात ४.५ अब्ज डॉलर मूल्यातील ७३ व्यवहार नोंदवले गेले, जे तिमाही आधारावर संख्येत १२ टक्क्यांची वाढ दर्शवतात, मात्र मूल्यात १० टक्क्यांची घसरण नोंदवण्यात आली. ही घसरण प्रामुख्याने देशांतर्गत व्यवहारांच्या मूल्यांमध्ये ९२ टक्क्यांची तीव्र घसरण झाल्यामुळे झाली आहे. अहवालात पुढे नमूद करण्यात आले आहे की, “तरीसुद्धा, उच्च-मूल्याच्या व्यवहारांमध्ये सातत्य राहिले असून, १०० दशलक्ष डॉलरहून अधिक मूल्य असलेल्या सहा व्यवहारांनी एकत्रितपणे ३.७ अब्ज डॉलरचा वाटा उचलला.”
हेही वाचा..
वैष्णो देवी यात्रेच्या मार्गावर भूस्खलन
झारखंडच्या कोल्हानमध्ये नक्षलवाद्यांची कटकारस्थानं उधळली
सुप्रीम कोर्टात आज ‘उदयपूर फाइल्स’ चित्रपटप्रकरणी सुनावणी होणार
हृदय ठणठणीत, पोट शांत ठेवणारा ‘रागी’
या तिमाहीत, या क्षेत्राचा एकूण व्यवहारांमध्ये १४ टक्के आणि एकूण मूल्यात ३३ टक्के वाटा होता. ग्रँट थॉर्नटन इंडियामधील प्रायव्हेट इक्विटी ग्रुप आणि डील्स टॅक्स अॅडव्हायजरी लीडर विशाल अग्रवाल यांनी सांगितले, “दुसऱ्या तिमाहीत लहान-लहान व्यवहारांमुळे व्यवहारांच्या संख्येत वाढ दिसून आली. विशेषतः भारतीय बँकिंग क्षेत्रात काही महत्त्वाचे मोठे सौदे झाले.” अग्रवाल यांनी पुढे सांगितले की, “बँका आणि लघु वित्त बँकांमधील एकत्रीकरणाची प्रक्रिया गती घेत आहे आणि नियामक स्पष्टता सुधारत असल्यामुळे या क्षेत्रात M&A (विलय व अधिग्रहण) आणि PE (प्रायव्हेट इक्विटी) उपक्रमांत वाढ होण्याची अपेक्षा आहे. फिनटेक हा गुंतवणूकदारांसाठी अजूनही सर्वात मोठा आकर्षणबिंदू आहे.”
दरम्यान, २०२५ च्या दुसऱ्या तिमाहीत M&A उपक्रमात काहीशी मंदी दिसून आली, जिथे पहिल्या तिमाहीच्या तुलनेत व्यवहारांच्या संख्येत ४३ टक्के आणि मूल्यात ३५ टक्क्यांची घसरण झाली. अहवालानुसार, या तिमाहीत २.६ अब्ज डॉलर मूल्याचे १६ व्यवहार नोंदवले गेले, आणि मूल्यातील घसरण असूनही देशांतर्गत व्यवहार संख्येच्या बाबतीत आघाडीवर राहिले. सुमितोमो मित्सुई बँकिंग कॉर्पोरेशनकडून यस बँकेतील १.५ अब्ज डॉलरच्या हिस्सेदारीच्या अधिग्रहणामुळे, या तिमाहीतील M&A एकूण मूल्यात इनबाउंड व्यवहारांचा वाटा ८८ टक्के राहिला – जो २०२४ च्या दुसऱ्या तिमाहीपासूनचा सर्वाधिक आहे. अहवालानुसार, २०२५ च्या दुसऱ्या तिमाहीत प्रायव्हेट इक्विटी (PE) उपक्रमांनी जोरदार कामगिरी केली असून १.९ अब्ज डॉलर मूल्यातील ५७ व्यवहार नोंदवले गेले, जे २०२२ च्या दुसऱ्या तिमाहीपासूनचे सर्वाधिक व्यवहारांचे प्रमाण आणि २०२३ च्या दुसऱ्या तिमाहीपासूनचे सर्वाधिक मूल्य आहे.
