पंतप्रधान मोदींनी बैराबी-सैरांग रेल्वे मार्गाचे केले उद्घाटन !

पंतप्रधान नरेंद्र मोदी यांनी मिझोरामची राजधानी ऐझॉलला रेल्वे नेटवर्कशी जोडणाऱ्या बैराबी ते सैरांग या महत्त्वपूर्ण रेल्वे मार्गाचे उद्घाटन केले. यानिमित्ताने सैरांग ते दिल्ली, सैरांग ते कोलकाता आणि सैरांग ते गुवाहाटी या राजधानी एक्सप्रेस गाड्यांनाही हिरवा झेंडा दाखवण्यात आला. खराब हवामानामुळे पंतप्रधान मोदी प्रत्यक्ष कार्यक्रमस्थळी पोहोचू शकले नाहीत. मात्र, त्यांनी विमानतळावरून व्हिडिओ कॉन्फरन्सिंगद्वारे या गाड्यांना हिरवा झेंडा दाखवला.

या उद्घाटनामुळे ऐझॉल ते दिल्ली ही राजधानी एक्सप्रेस सुरू झाली असून, त्यामुळे ईशान्य भारतातील ऐझॉल ही चौथी राजधानी ठरली, जी थेट देशाच्या राजधानी दिल्लीशी रेल्वे मार्गे जोडली गेली आहे.

पंतप्रधान मोदींनी ‘बारबाई ते कोलकाता’, ‘सैरांग ते गुवाहाटी’ आणि ‘सैरांग ते आनंद विहार टर्मिनल’ या गाड्यांना हिरवा झेंडा दाखवला. रेल्वे बोर्डाचे कार्यकारी संचालक दिलीप कुमार म्हणाले की, बारबाई ते सैरांग दरम्यान बांधलेला नवीन रेल्वे मार्ग डोंगराळ प्रदेशातून जातो. या प्रदेशात रेल्वे मार्ग बांधणे हे एक कठीण काम होते, परंतु रेल्वे अभियंते आणि कर्मचाऱ्यांनी कठोर परिश्रमाने हे काम पूर्ण केले आहे. त्यांनी सांगितले की, या मार्गावर ४५ बोगदे आणि ५५ मोठे आणि ८८ लहान पूल आहेत. ५ रोड ओव्हर ब्रिज आणि ६ रोड अंडर ब्रिज आहेत.

कुतुबमिनारपेक्षा उंच पूल
अहवालानुसार, पुल क्रमांक १४४ हा रेल्वे पुलांमध्ये दुसरा सर्वात उंच पूल आहे. त्याची उंची दिल्लीतील कुतुबमिनारपेक्षा जास्त आहे. ११४ मीटर उंचीचा हा पूल कुतुबमिनारपेक्षा ४२ मीटर उंच आहे. बारबाई आणि सैरांग दरम्यानचा संपूर्ण रेल्वे मार्ग हिरव्यागार पर्वत आणि दऱ्यांमधून जातो.

कुमार म्हणाले की, या मार्गाच्या बांधकामानंतर ऐझॉल रेल्वे नेटवर्कशी जोडले जाईल. यामुळे येथील लोकांना देशातील इतर ठिकाणी प्रवास करणे खूप सोपे होईल. देशाच्या इतर भागांमधून वस्तूंची वाहतूक सुलभ होईल. येथून मिळणारे उत्पादने रेल्वेने इतर ठिकाणीही पाठवता येतील. यामुळे रोजगाराच्या संधी वाढतील तसेच येथील लोकांचे उत्पन्नही वाढेल. वाहतुकीच्या साधनांच्या उपलब्धतेमुळे येथे पर्यटनालाही चालना मिळेल.

हे ही वाचा : 

पाकिस्तानातील लष्करी ताफ्यावर हल्ला करून १२ जवान मारले!

भारत-पाकिस्तान सामना पाहू नका, टीव्ही बंद ठेवा!

घाटकोपरमध्ये कार फुटपाथवर चढली; कार चालक तरुणी पोलिसांच्या ताब्यात

शिवाजीनगर मेट्रो स्थानकाचे नामांतर?, कर्नाटक सरकारच्या चर्चेवर अतुल लोंढेंचा खुलासा!

रेल्वे मंत्री अश्विनी वैष्णव यांनी याला “अभियांत्रिकी चमत्कार” असे संबोधले. त्यांनी सांगितले की, “जसे जम्मू-काश्मीरमधील चिनाब पूल आयफेल टॉवरपेक्षा उंच आहे, तसेच मिझोरममध्ये बांधलेला हा पूल कुतुबमिनारपेक्षा उंच आहे.”