चिन्नास्वामी स्टेडियमवर दिल्ली–आंध्र प्रदेश सामना प्रेक्षकांविना

भारतीय क्रिकेट नियामक मंडळाच्या (बीसीसीआय) आयोजनाखाली सुरू असलेल्या देशांतर्गत एकदिवसीय क्रिकेट स्पर्धेतील प्रतिष्ठित विजय हजारे ट्रॉफी अंतर्गत दिल्ली आणि आंध्र प्रदेश यांच्यात होणारा सामना बेंगळुरूतील एम. चिन्नास्वामी स्टेडियम येथे प्रेक्षकांविना खेळवण्याचा निर्णय घेण्यात आला आहे. कर्नाटक पोलिसांनी सुरक्षा आणि गर्दी नियंत्रणाच्या कारणांचा हवाला देत प्रेक्षकांना परवानगी नाकारली आहे.

हा निर्णय बेंगळुरू पोलीस आयुक्त सीमांत कुमार सिंह, ग्रेटर बेंगळुरू अथॉरिटी, अग्निशमन विभाग आणि इतर संबंधित यंत्रणांच्या संयुक्त तपासणीनंतर घेण्यात आला. तपासणीत स्टेडियममधील काही गंभीर त्रुटी निदर्शनास आल्या आहेत.

पोलीस आयुक्त सीमांत कुमार सिंह यांनी सांगितले की, गृह विभागाच्या सूचनेनुसार समितीने स्टेडियमची पाहणी केली. फायर विभाग, बेंगळुरू इलेक्ट्रिसिटी सप्लाय कंपनी (बेसकॉम), ग्रेटर बेंगळुरू अथॉरिटी आणि पोलीस यांचा समावेश असलेल्या पथकाने तपासणी केली. अहवालानुसार २४ डिसेंबर रोजी होणाऱ्या सामन्यासाठी प्रेक्षकांसह परवानगी देण्यात आलेली नाही. यापूर्वीच १७ मुद्द्यांची सुरक्षा सल्ला (अ‍ॅडव्हायजरी) जारी करण्यात आली होती; त्याची तपासणी करून सविस्तर अहवाल सरकारकडे सादर करण्यात आला आहे.

पोलिसांच्या मते, स्टेडियमचे गेट मोठ्या प्रमाणातील गर्दी हाताळण्यासाठी अपुरे आहेत. तसेच विराट कोहली उपस्थित राहिल्यास प्रचंड गर्दी जमण्याची शक्यता असल्याने धोका वाढू शकतो.

या पार्श्वभूमीवर कर्नाटक राज्य क्रिकेट संघटनेचे (केएससीए) नवे अध्यक्ष वेंकटेश प्रसाद यांनी राज्याचे गृह मंत्री जी. परमेश्वर यांची भेट घेऊन सवलतीची मागणी केली; मात्र प्रशासनाने ती मान्य केली नाही.

गृह मंत्री परमेश्वर यांनी याआधी चिन्नास्वामी स्टेडियम विजय हजारे ट्रॉफी सामन्यांच्या आयोजनासाठी योग्य आहे की नाही, याचा आढावा घेण्यासाठी समिती स्थापन केल्याची घोषणा केली होती. विधानसौध येथे केएससीएचे अधिकारी आणि वरिष्ठ पोलीस अधिकाऱ्यांसोबत त्यांनी बैठकीचे अध्यक्षस्थान भूषवले होते. केएससीएने प्रेक्षकांविना सामने घेण्याची परवानगी मागितल्याचेही त्यांनी स्पष्ट केले होते.

उल्लेखनीय म्हणजे, आयपीएल २०२५ चे विजेतेपद जिंकल्यानंतर ४ जून रोजी आरसीबीच्या जल्लोषादरम्यान चिन्नास्वामी स्टेडियम परिसरात झालेल्या चेंगराचेंगरीत ११ जणांचा मृत्यू झाला होता. त्या घटनेनंतर कर्नाटक पोलीस सध्या प्रेक्षकांसह सामन्यांना परवानगी देत नाहीत. त्यामुळे २४ डिसेंबरचा दिल्ली–आंध्र प्रदेश सामना प्रेक्षकांविना खेळवला जाणार आहे.