भारत आणि अमेरिका यांच्यातील व्यापार कराराबद्दल पंतप्रधान नरेंद्र मोदी यांनी आनंद व्यक्त केला आणि अमेरिकेचे अध्यक्ष डोनाल्ड ट्रम्प यांचे आभार मानले. “आपल्या दोन महान राष्ट्रांमध्ये अंतरिम व्यापार कराराच्या चौकटीवर सहमती झाली आहे,” असे ते म्हणाले. दोन्ही देशांमधील मजबूत संबंधांसाठी वैयक्तिक वचनबद्धतेबद्दल अमेरिकेचे अध्यक्ष डोनाल्ड ट्रम्प यांचे आभार मानतो, अशा भावना नरेंद्र मोदी यांनी व्यक्त केल्या.
पंतप्रधान नरेंद्र मोदी यांनी शनिवार, ७ फेब्रुवारी रोजी भारत- अमेरिका अंतरिम व्यापार चौकटीचे स्वागत केले आणि हा करार द्विपक्षीय संबंधांना मोठी चालना देणारे आणि भारतीय कामगार, शेतकरी आणि व्यवसायांसाठी नवीन संधी उघडणारे पाऊल असल्याचे म्हटले. या घोषणेवर प्रतिक्रिया देताना, पंतप्रधान मोदी म्हणाले की, दोन्ही देशांनी अंतरिम व्यापार कराराच्या रचनेवर सहमती दर्शविली आहे आणि त्यांनी नवी दिल्ली आणि वॉशिंग्टनमधील मजबूत संबंधांसाठी वैयक्तिक वचनबद्धतेबद्दल अमेरिकेचे अध्यक्ष डोनाल्ड ट्रम्प यांचे आभार मानले.
“भारत आणि अमेरिकेसाठी चांगली बातमी! आमच्या दोन महान राष्ट्रांमधील अंतरिम व्यापार कराराच्या चौकटीवर आम्ही सहमत झालो आहोत. आमच्या देशांमधील मजबूत संबंधांसाठीच्या त्यांच्या वैयक्तिक वचनबद्धतेबद्दल मी राष्ट्राध्यक्ष ट्रम्प यांचे आभार मानतो,” असे पंतप्रधान मोदींनी एक्सवरील एका पोस्टमध्ये म्हटले आहे. पुढे लिहिले आहे की, “ही चौकट आमच्या भागीदारीची वाढती खोली, विश्वास आणि गतिमानता प्रतिबिंबित करते. भारतातील कष्टकरी शेतकरी, उद्योजक, एमएसएमई, स्टार्टअप नवोन्मेषक, मच्छीमार आणि इतरांसाठी नवीन संधी उघडून ‘मेक इन इंडिया’ला बळकटी देते. यामुळे महिला आणि तरुणांसाठी मोठ्या प्रमाणात रोजगार निर्माण होईल,” असे ते म्हणाले. भारत आणि अमेरिका यांच्यातील अंतरिम व्यापार करार जाहीर झाल्यानंतर काही तासांतच पंतप्रधानांचे हे वक्तव्य आले. दोन्ही बाजूंमधील महिन्यांच्या संथ वाटाघाटी आणि टॅरिफ- संबंधित संघर्षानंतर हा करार यशस्वी झाला आहे.
हे ही वाचा:
कृत्रिम बुद्धिमत्तेच्या जोरावर गुगलची ऐतिहासिक झेप
‘वैभव’शाली विजय; युवा भारताने वर्ल्डकप जिंकला
जीवलग मित्र गमावला, वाढदिवस साजरा करणार नाही!
सोने–चांदी महागाईच्या केंद्रस्थानी
पंतप्रधान मोदी म्हणाले की, ही व्यवस्था लवचिक आणि विश्वासार्ह पुरवठा साखळी तयार करण्यास मदत करेल आणि जागतिक वाढीला हातभार लावेल, तसेच ‘विकसित भारत’ उभारणीच्या दिशेने वाटचाल करत असताना भारत भविष्याभिमुख जागतिक भागीदारीवर लक्ष केंद्रित करत असल्याचे अधोरेखित केले. संयुक्त निवेदनात, दोन्ही देशांनी म्हटले आहे की ते हा करार तातडीने अंमलात आणतील. आणि परस्पर फायदेशीर द्विपक्षीय व्यापार करार पूर्ण करण्याच्या मोठ्या उद्देशाने अंतरिम कराराला अंतिम रूप देण्याचे काम सुरू करतील.
