पाक खेळाडूला खरेदी करणाऱ्या सनरायझर्सला गावस्करांनी झोडपले

भारतीय क्रिकेटमधील दिग्गज माजी फलंदाज सुनील गावसकर यांनी ‘द हंड्रेड २०२६’ च्या लिलावात पाकिस्तानी फिरकीपटू अबरार अहमद याला खरेदी केल्याबद्दल सनरायझर्स लीड्सच्या मालकांवर कठोर शब्दांत टीका केली आहे. त्यांनी म्हटले की, अशा प्रकारचे निर्णय अप्रत्यक्षपणे भारतीय सैनिक आणि आपल्या नागरिकांच्या मृत्यूत योगदान देऊ शकतात.

सुनील गावसकर यांनी आपल्या ‘मिड-डे’ या वृत्तपत्रातील कॉलममध्ये लिहिले की, भारतीय फ्रँचायझीकडून पाकिस्तानी खेळाडूंना दिले जाणारे मानधन शेवटी कराच्या स्वरूपात पाकिस्तान सरकारपर्यंत पोहोचते. त्या पैशाचा वापर शस्त्रे खरेदी करण्यासाठी केला जातो. त्यांनी प्रश्न उपस्थित केला की एखादी स्पर्धा जिंकणे हे भारतीय नागरिकांच्या जीवापेक्षा अधिक महत्त्वाचे आहे का?

प्रत्यक्षात काव्या मारन यांच्या मालकीची सनरायझर्स हैदराबादशी संबंधित फ्रँचायझी सनरायझर्स लीड्सने अबरार अहमदला १.९० लाख पाउंड (सुमारे २.३४ कोटी रुपये) देऊन विकत घेतल्यामुळे क्रिकेट वर्तुळात वाद निर्माण झाला. अनेक वर्षांनंतर प्रथमच आयपीएलशी संबंधित मालकी असलेल्या फ्रँचायझीने पाकिस्तानी आंतरराष्ट्रीय खेळाडूला करारबद्ध केले आहे.

गावसकर यांनी आपल्या भूमिकेचे स्पष्टीकरण देताना लिहिले, “द हंड्रेड स्पर्धेत भारतीय मालक असलेल्या फ्रँचायझीने पाकिस्तानी खेळाडूला खरेदी केल्यामुळे जो वाद निर्माण झाला, तो आश्चर्यकारक नाही. नोव्हेंबर २००८ मधील मुंबई दहशतवादी हल्ल्यांनंतर भारतीय फ्रँचायझी मालकांनी आयपीएलमध्ये पाकिस्तानी खेळाडूंना जवळजवळ पूर्णपणे दुर्लक्षित केले आहे.” ते पुढे म्हणाले, “उशिरा का होईना, पण आता हे लक्षात येऊ लागले आहे की पाकिस्तानी खेळाडूंना दिले जाणारे मानधन, जे नंतर कराच्या रूपात त्यांच्या सरकारकडे जाते आणि ज्याचा वापर शस्त्रे खरेदीसाठी होतो, ते अप्रत्यक्षपणे भारतीय सैनिक आणि सामान्य नागरिकांच्या मृत्यूत योगदान देऊ शकते. त्यामुळेच भारतीय कंपन्या पाकिस्तानी कलाकार आणि खेळाडूंना काम देण्याबाबत विचार करण्यासही टाळाटाळ करत आहेत.”

हे ही वाचा:

होर्मुझ सामुद्रधुनीमधील LPG टँकर्सच्या सुरक्षेसाठी भारतीय नौदलाचे ‘ऑपरेशन संकल्प’

“जलमार्ग सुरक्षित करण्यासाठी कोणाचीही गरज नाही” ट्रम्प कोणावर संतापले?

काबूलमधील रुग्णालयावर पाकिस्तानचा हवाई हल्ला; ४०० जणांचा मृत्यू

होर्मुझ सामुद्रधुनी बंद; सौदी अरेबियाकडे तेल निर्यातीसाठी आहे ‘हा’ पर्यायी मार्ग

गावसकर यांनी स्पष्ट केले की जबाबदारी टाळता येत नाही, मग पैसे भारतीय कंपनी देत असो किंवा तिची परदेशातील सहाय्यक कंपनी. त्यांनी लिहिले, “पेमेंट भारतीय संघ देत असो किंवा त्या संस्थेची परदेशी सहाय्यक कंपनी देत असो, जर मालक भारतीय असेल तर तो भारतीयांच्या मृत्यूत अप्रत्यक्ष योगदान देत आहे. हे इतके सोपे आहे.” त्यांनी असेही नमूद केले की संघाचे मुख्य प्रशिक्षक डॅनियल व्हेटोरी हे न्यूझीलंडचे असल्यामुळे त्यांना या परिस्थितीची गुंतागुंत पूर्णपणे समजली नसेल, परंतु मालकांनी या निर्णयाचे गांभीर्य समजून घ्यायला हवे होते.

१२ मार्च रोजी लंडनच्या पिकॅडिली परिसरात झालेल्या लिलावात सनरायझर्स लीड्सने ट्रेंट रॉकेट्सला मागे टाकत अबरार अहमदला आपल्या संघात सामील केले. सनरायझर्सने पाकिस्तानी खेळाडूला खरेदी केल्यानंतर भारतातील क्रिकेट चाहत्यांमध्ये संतापाची लाट उसळली. सोशल मीडियावर अनेक वेळा Boycott Sunrisers Hyderabad हा हॅशटॅग ट्रेंड झाला. काव्या मारन यांच्यावर टीकेचा वर्षाव होत असताना संघाने या विषयावर भाष्य करण्याचे टाळले आहे.