सौदी तळावर इराणी हल्ला; अमेरिकेचे ई -३ सेन्ट्री अवॅक्स विमानाचे नुकसान

इराणकडून करण्यात आलेल्या क्षेपणास्त्र आणि ड्रोन हल्ल्यात सौदी अरेबियामधील प्रिन्स सुलतान एअरबेस येथे तैनात असलेल्या अमेरिकन वायुसेनेच्या अत्याधुनिक निगराणी विमानाचे नुकसान झाल्याची माहिती समोर आली आहे. या घटनेमुळे एअर डिफेन्स प्रणाली आणि लष्करी तयारीवर गंभीर प्रश्न निर्माण झाले आहेत.

माहितीनुसार, या हल्ल्यात ई-३ सेन्ट्री अवॅक्स विमानाला मोठे नुकसान झाले. तसेच केसी १३५ स्ट्रॅटोटँकर या इंधन भरणाऱ्या विमानांनाही फटका बसल्याची शक्यता व्यक्त केली जात आहे. या हल्ल्यात डझनभर अमेरिकन सैनिक जखमी झाल्याचेही सांगितले जात आहे.

ई -३ सेन्ट्री हे अत्यंत महत्त्वाचे एअरबोर्न सर्व्हेलन्स प्लॅटफॉर्म असून ते २०० मैलांपेक्षा अधिक क्षेत्रावर रडार कव्हरेज देऊ शकते. १९७० च्या दशकात विकसित झालेल्या या प्रणालीची किंमत सुमारे ५०० ते ७०० दशलक्ष डॉलर इतकी मानली जाते आणि जगभरात यांची संख्या सुमारे ३० च्या आसपासच आहे. त्यामुळे या विमानावरील हल्ला हा अमेरिकेच्या लष्करी क्षमतेसाठी मोठा धक्का मानला जात आहे.

हे ही वाचा:

‘मन की बात’: ऊर्जा संकटात एकजूट राहा!

पाकचे माजी लष्करप्रमुख बाजवा बाथरूममध्ये पडले, रुग्णालयात मृत्यू

मोदींच्या ‘मेक इन इंडिया’चा चेहरा: अहमदाबाद-मुंबई बुलेट ट्रेन

१ एप्रिलपासून रशियाची पेट्रोल निर्यात बंद

हे अवॅक्स विमान युद्धकाळात हवाई क्षेत्रावर लक्ष ठेवणे, शत्रूच्या हालचालींचे निरीक्षण करणे आणि लष्करी कारवायांचे समन्वय साधणे यासाठी अत्यंत महत्त्वाची भूमिका बजावते. तज्ज्ञांच्या मते, अशा प्रकारच्या प्रणालीचे नुकसान झाल्यास मध्यपूर्वेत अमेरिकेच्या लष्करी कारवायांवर परिणाम होऊ शकतो, कारण त्याची त्वरित भरपाई करणे सोपे नाही.

या हल्ल्यामुळे आणखी एक महत्त्वाचा प्रश्न निर्माण झाला आहे—अत्याधुनिक एअर डिफेन्स प्रणाली असूनही एवढ्या मोठ्या लष्करी तळावर हल्ला कसा यशस्वी झाला? ड्रोन आणि क्षेपणास्त्रांच्या संयुक्त हल्ल्यामुळे विद्यमान सुरक्षा व्यवस्थेतील त्रुटी उघड झाल्या आहेत.