जम्मू-काश्मीरमधील कुलगाम येथे स्थलांतरित मजुरांवर झालेल्या दहशतवादी हल्ल्यामागे लष्कर-ए-तैयबाचा कमांडर लतीफ भट आणि त्याचा साथीदार वारिस शाह यांचा हात असल्याचा संशय सुरक्षा यंत्रणांनी व्यक्त केला आहे. प्राथमिक तपासात वारिस शाहने या हल्ल्यासाठी रेकी (टेहळणी) आणि अन्य रसद पुरवल्याचे संकेत मिळाल्याची माहिती समोर आली आहे. एनडीटीव्हीने यासंदर्भातील वृत्त दिले आहे.
शुक्रवारी कुलगाममध्ये दहशतवाद्यांनी केलेल्या गोळीबारात छत्तीसगडमधील दोन स्थलांतरित मजुरांचा मृत्यू झाला. मृतांमध्ये दीपक आणि भूपेंद्र यांचा समावेश आहे. दीपकचा घटनास्थळीच मृत्यू झाला, तर गंभीर जखमी झालेल्या भूपेंद्रने रुग्णालयात उपचारादरम्यान अखेरचा श्वास घेतला. सुरक्षा यंत्रणांच्या माहितीनुसार, गेल्या दहा दिवसांतील हा दुसरा लक्ष्यित दहशतवादी हल्ला आहे. यापूर्वी अनंतनागमध्ये एका पोलिस कर्मचाऱ्याची लक्ष्य करून हत्या करण्यात आली होती. त्यानंतर संपूर्ण काश्मीर खोऱ्यात मोठे शोध आणि तपास अभियान सुरू करण्यात आले होते.
प्राथमिक तपासात या दोन्ही हल्ल्यांमध्ये एके-४७ ऐवजी लहान कॅलिबरच्या पिस्तुलाचा वापर करण्यात आल्याचे समोर आले आहे. ही कार्यपद्धती तथाकथित ‘हायब्रिड दहशतवाद्यां’शी मिळतीजुळती असल्याचे अधिकाऱ्यांचे म्हणणे आहे. हे स्थानिक स्तरावर भरती केलेले ओव्हर ग्राउंड वर्कर्स (OGWs) हल्ला करून सामान्य नागरिकांमध्ये मिसळून जातात, त्यामुळे त्यांचा शोध घेणे अधिक कठीण होते.
तपास यंत्रणांच्या मते, या दोन्ही हल्ल्यांची पद्धत लष्कर-ए-तैयबाची शाखा मानल्या जाणाऱ्या द रेझिस्टन्स फ्रंट (TRF) या संघटनेशी मिळतीजुळती आहे. या संघटनेची कार्यपद्धती म्हणजे पिस्तुलातून झटपट हल्ला करून गर्दीत मिसळून पसार होणे, त्यामुळे मोठ्या शस्त्रांचा वापर टाळून तपास यंत्रणांना चकवा देण्याचा प्रयत्न केला जातो.
हे ही वाचा:
इटलीनंतर फ्रान्सनेही स्पेन सीमेवर नियंत्रण वाढवले
ओमानच्या किनारपट्टीजवळ तेलवाहू जहाजाजवळ भीषण स्फोट
जैश कनेक्शनप्रकरणी अर्पिता सरकारला झारखंडमधून अटक
दिल्लीत १६ ऑगस्टपर्यंत ‘नो-ड्रोन झोन’
दरम्यान, सुरक्षा यंत्रणांनी लतीफ भट आणि वारिस शाह या दोघांचा शोध सुरू केला आहे. लतीफ भट हा शोपियान चकमकीनंतर चर्चेत आला होता. त्या वेळी लष्करचा वरिष्ठ कमांडर झाकीर गनई सुरक्षा दलांच्या कारवाईत ठार झाला होता, मात्र लतीफ भट तेथून पळून जाण्यात यशस्वी झाला होता. त्यानंतर त्याने सीमेपलीकडील सूत्रधारांच्या सांगण्यावरून पुन्हा स्लीपर सेल सक्रिय करून बिगर-स्थानिक नागरिक आणि सुरक्षा दलांना लक्ष्य करण्याचे कट रचल्याचा संशय सुरक्षा यंत्रणांनी व्यक्त केला आहे.
