सोनं-चांदीच्या दरात पुन्हा तेजी; सोनं १० आठवड्यांच्या उच्चांकावर

सोन्या-चांदीच्या दरातील तेजीचा सिलसिला या आठवड्यातही कायम असून कमोडिटी बाजारात दोन्ही मौल्यवान धातूंच्या किमतींना मजबूत आधार मिळत आहे. जागतिक बाजारात कच्च्या तेलाच्या किमती वाढत असतानाच सोन्या-चांदीच्या दरातही मोठी वाढ पाहायला मिळत आहे. एमसीएक्सवर सोन्याचा भाव १० आठवड्यांच्या उच्चांकी पातळीवर पोहोचला आहे. जगभरातील मध्यवर्ती बँकांकडून सोन्याची सुरू असलेली मोठ्या प्रमाणातील खरेदी, अमेरिकेतील रोजगाराची अपेक्षेपेक्षा कमजोर आकडेवारी आणि डॉलरमध्ये झालेली घसरण यामुळे सोन्या-चांदीच्या दरांना मोठा आधार मिळाला आहे.

इंडिया बुलियन अँड ज्वेलर्स असोसिएशननुसार, ९९९ शुद्धतेच्या २४ कॅरेट सोन्याचा दर प्रति १० ग्रॅम १,५०,६४१ रुपयांवर बंद झाला होता. मात्र, १२ ऑगस्ट २०२६ रोजी सकाळच्या व्यवहारात सोन्याच्या दरात आणखी वाढ झाली. गुडरिटर्न्सच्या माहितीनुसार, २४ कॅरेट सोन्याचा भाव १,५३,८३० रुपये प्रति १० ग्रॅम, तर २२ कॅरेट सोन्याचा दर १,४१,०१० रुपये प्रति १० ग्रॅम झाला. १८ कॅरेट सोन्याचा भावही १,१५,३८० रुपये प्रति १० ग्रॅमवर पोहोचला आहे.
हे ही वाचा:
एफसीआरए विधेयक २०२६ संयुक्त संसदीय समितीकडे सादर

करसंकलनाला बूस्टर! थेट करातून ८.११ लाख कोटींचा महसूल

एमसीएक्सवरील व्यवहारातही सोन्याने मजबूत सुरुवात केली. आज सोन्याचा भाव १,५४,६८३ रुपये प्रति १० ग्रॅमवर उघडला, तर चांदीचा भाव २,३७,८६० रुपये प्रति किलोग्रॅमवर खुला झाला. याआधीच्या सत्रात एमसीएक्सवर सोनं १,५३,६३९ रुपये प्रति १० ग्रॅम आणि चांदी २,३५,२५० रुपये प्रति किलोग्रॅमवर बंद झाली होती. म्हणजेच नव्या सत्रात दोन्ही मौल्यवान धातूंमध्ये सुरुवातीपासूनच तेजीचा कल दिसून आला.

जागतिक बाजारातही सोन्या-चांदीच्या किमती मजबूत आहेत. कॉमेक्सवर सोन्याचा भाव ४,४४९.७० डॉलर प्रति औंस, तर चांदीचा भाव ६५.३७० डॉलर प्रति औंसवर पोहोचला आहे. या वर्षाच्या सुरुवातीपासून सोन्याच्या दरात आतापर्यंत १९,००० रुपयांपेक्षा अधिक वाढ झाली आहे. त्यामुळे गुंतवणूकदारांच्या दृष्टीने सोनं पुन्हा एकदा आकर्षणाचे प्रमुख केंद्र ठरत आहे.

चांदीच्या दरातही मोठी तेजी पाहायला मिळत आहे. देशातील विविध शहरांमध्ये चांदीच्या दरात काही प्रमाणात फरक आहे. चेन्नई आणि हैदराबादमध्ये एक किलो चांदीचा भाव सुमारे २,६०,१०१ रुपये आहे. तर मुंबई, दिल्ली, कोलकाता आणि बंगळुरूमध्ये एक किलो चांदीचा दर सुमारे २,५५,१०१ रुपये आहे. औद्योगिक मागणी, गुंतवणुकीतील वाढ आणि जागतिक बाजारातील सकारात्मक वातावरणामुळे चांदीच्या दरालाही मजबूत आधार मिळत आहे.

कमोडिटी बाजारातील सध्याच्या परिस्थितीबाबत जेएम फायनान्शियल सर्व्हिसेसचे कमोडिटी आणि करन्सी रिसर्चचे वरिष्ठ उपाध्यक्ष प्रणव मेर यांनी सकारात्मक मत व्यक्त केले आहे. त्यांच्या मते, सध्या कमोडिटी बाजारात तेजीचे वातावरण असून सोन्या-चांदीच्या किमती आणखी वाढण्याची शक्यता आहे. चीन आणि पोलंडसारख्या देशांच्या मध्यवर्ती बँकांकडून मोठ्या प्रमाणात सोन्याची खरेदी होत आहे. मध्यवर्ती बँकांची ही मागणी सोन्याच्या किमतींसाठी महत्त्वाचा आधार ठरत आहे.