राष्ट्रीय सुरक्षा सल्लागार डोवाल गेले बीजिंगला, सीमा वादावर तोडगा निघणार?

राष्ट्रीय सुरक्षा सल्लागार (NSA) अजित डोवाल सोमवारी (२४ ऑगस्ट) दोन दिवसांच्या चीन दौऱ्यावर बीजिंगमध्ये पोहोचले. भारत-चीन सीमा विवादावर विशेष प्रतिनिधींच्या चर्चेच्या २५व्या फेरीत ते सहभागी होणार आहेत. भारत-चीन सीमा प्रश्नावर भारताचे विशेष प्रतिनिधी असलेले अजित डोवाल हे चीनचे परराष्ट्र मंत्री वांग यी यांच्या निमंत्रणावरून बीजिंगमध्ये पोहोचले आहेत. परराष्ट्र मंत्रालयाच्या माहितीनुसार, डोभाल आणि चीनचे विशेष प्रतिनिधी वांग यी मंगळवारी भारत-चीन सीमा विवादावर विशेष प्रतिनिधींच्या चर्चेच्या २५व्या फेरीत सहभागी होतील.

यापूर्वी ६ ऑगस्ट रोजी भारत आणि चीनदरम्यान सीमा निर्धारण, सीमा व्यवस्थापन, विविध समन्वय यंत्रणांची निर्मिती आणि सीमापार सहकार्याशी संबंधित मुद्द्यांवर चर्चा झाली होती. परराष्ट्र मंत्रालयाने दिलेल्या माहितीनुसार, ही चर्चा नवी दिल्ली येथे भारत-चीन सीमा व्यवहारांवरील परामर्श आणि समन्वयासाठीच्या कार्य यंत्रणेच्या (WMCC) ३६व्या बैठकीदरम्यान झाली होती. परराष्ट्र मंत्रालयाने सांगितले की, दोन्ही देशांमध्ये मोकळेपणाने चर्चा झाली आणि प्रत्यक्ष नियंत्रण रेषेवरील (LAC) परिस्थितीचा आढावा घेण्यात आला. तसेच, सीमा भागात शांतता आणि स्थैर्य कायम ठेवणे हे दोन्ही देशांच्या संबंधांच्या सर्वांगीण विकासासाठी अत्यंत महत्त्वाचे असल्याचे दोन्ही बाजूंनी पुन्हा स्पष्ट केले.

या बैठकीत भारतीय प्रतिनिधी मंडळाचे नेतृत्व परराष्ट्र मंत्रालयाचे पूर्व आशियाचे संयुक्त सचिव सुजीत घोष यांनी केले. तर चिनी प्रतिनिधी मंडळाचे नेतृत्व चीनच्या परराष्ट्र मंत्रालयाच्या सीमा आणि सागरी व्यवहार विभागाच्या महासंचालक होउ यानकी यांनी केले. बैठकीदरम्यान दोन्ही देशांच्या अधिकाऱ्यांनी प्रलंबित मुद्दे सोडवण्यासाठी आणि LAC वर कोणत्याही प्रकारचा गैरसमज किंवा चुकीचे आकलन टाळण्यासाठी विद्यमान राजनैतिक आणि लष्करी संवादाचे मार्ग सुरू ठेवण्यावर सहमती दर्शवली. यामध्ये WMCC, स्थानिक कमांडर स्तरावरील बैठका आणि यापूर्वी निश्चित करण्यात आलेल्या इतर यंत्रणांचा समावेश आहे.

परराष्ट्र मंत्रालयाने सांगितले की, विशेष प्रतिनिधींच्या २४व्या फेरीतील चर्चेच्या निष्कर्षांनंतर दोन्ही बाजूंनी सीमा निर्धारण, सीमा व्यवस्थापन, यंत्रणांची निर्मिती आणि सीमापार सहकार्याशी संबंधित मुद्द्यांवर सविस्तर विचारविनिमय केला. भारतीय बाजूने सीमापार वाहणाऱ्या नद्यांशी संबंधित ‘तज्ज्ञ स्तरावरील यंत्रणे’ची (Expert Level Mechanism) पुढील बैठक लवकर आयोजित करण्याची गरज पुन्हा अधोरेखित केली. तसेच, उंचावरील भागात सुरू असलेल्या प्रकल्पांशी संबंधित तांत्रिक माहितीची देवाणघेवाण करण्याचे महत्त्व भारताने स्पष्ट केले.