पदक मिळेपर्यंत घरी जाणार नाही!

- Advertisement -

भारताची स्टार वेटलिफ्टर मीराबाई चानू हिने आगामी एशियन गेम्स २०२६ साठी आपले लक्ष्य स्पष्ट केले आहे. जपानमधील आयची-नागोया येथे १९ सप्टेंबर ते ४ ऑक्टोबरदरम्यान होणाऱ्या या स्पर्धेत पहिले पदक जिंकण्यासाठी मीराबाई जोरदार तयारी करत आहे. विशेष म्हणजे, एशियन गेम्समध्ये पदक जिंकेपर्यंत घरी परतणार नाही, असा निर्धार तिने केला आहे.

पदकासाठी घेतली कठोर प्रतिज्ञा

कॉमनवेल्थ गेम्समध्ये सुवर्णपदक जिंकल्यानंतरही मीराबाईने विश्रांती न घेता प्रशिक्षणावर भर दिला. ती म्हणाली, “मी थेट मोदीनगरमध्ये प्रशिक्षणासाठी परतले. खरं तर मी घरी म्हणजेच मणिपूरला गेलेच नाही. मी स्वतःला एक आव्हान दिले आहे की, एशियन गेम्समध्ये पदक जिंकेपर्यंत मी घरी जाणार नाही.”

दुखापतीपासून बचावाला प्राधान्य

मीराबाईच्या तयारीत फिटनेस आणि दुखापतीपासून बचावाला सर्वाधिक महत्त्व दिले जात आहे. तिचे प्रशिक्षक विजय शर्मा असून, अमेरिकन स्ट्रेंथ अँड कंडिशनिंग कोच डॉ. एरॉन हॉर्शिग यांच्यासोबतही ती नियमितपणे काम करते. २०२० पासून दोघांचा संपर्क कायम असून, दर गुरुवारी व्हिडिओ कॉलद्वारे प्रशिक्षण, रिकव्हरी आणि पुढील नियोजनाचा आढावा घेतला जातो.

एशियन गेम्समधील पदकाचे स्वप्न अधुरे

एशियन गेम्समध्ये मीराबाईला आतापर्यंत पदक मिळवता आलेले नाही. २०१८च्या जकार्ता एशियन गेम्समध्ये पाठीच्या गंभीर दुखापतीमुळे तिला स्पर्धेतून माघार घ्यावी लागली होती. तर २०२२च्या हांगझोऊ एशियन गेम्समध्ये ती ४९ किलो वजनी गटात चौथ्या क्रमांकावर राहिली होती.

मीराबाईच्या मते, यंदाची स्पर्धा तिच्यासाठी अत्यंत कठीण असणार आहे. “एशियन गेम्स माझ्यासाठी सर्वात कठीण राहिले आहेत. यावेळी तुम्हाला एशियन गेम्समध्ये ‘ऑलिम्पिक’ पाहायला मिळू शकते, कारण आमच्या वजनी गटातील सर्वात मजबूत लिफ्टर आशियातून आहेत,” असे तिने सांगितले.

चीन, उत्तर कोरिया, जपान आणि थायलंडच्या खेळाडूंचे आव्हान

मीराबाईने चीन, उत्तर कोरिया, जपान आणि थायलंडच्या वेटलिफ्टरकडून कडवी टक्कर मिळण्याची शक्यता व्यक्त केली आहे. २०२४च्या पॅरिस ऑलिम्पिकमध्ये थायलंडच्या सुरोदचाना खंबाओने मीराबाईला अवघ्या एका किलोच्या फरकाने चौथ्या स्थानावर ढकलले होते. खंबाओने एकूण २०० किलो वजन उचलले होते.

“खरी परीक्षा अजून बाकी”

ग्लासगो येथे झालेल्या कॉमनवेल्थ गेम्समध्ये मीराबाईने ४८ किलो वजनी गटात एकूण १९० किलो वजन उचलून सुवर्णपदक पटकावले. तिने स्नॅचमध्ये ८५ किलो आणि क्लीन अँड जर्कमध्ये १०५ किलो वजन उचलले. या कामगिरीसह तिने स्नॅच, क्लीन अँड जर्क आणि एकूण वजनाचे कॉमनवेल्थ गेम्स विक्रम प्रस्थापित केले.

मात्र, या कामगिरीने ती समाधानी नाही. “खरं सांगायचं तर कॉमनवेल्थ गेम्समधील स्पर्धा माझ्यासाठी फार कठीण नव्हती. ग्लासगोमध्ये मला फार मेहनत घ्यावी लागली नाही. खरी परीक्षा अजून बाकी आहे,” असे मीराबाईने स्पष्ट केले.

लक्ष्य फक्त नागोया

मीराबाईने सांगितले की, सध्या तिचे संपूर्ण लक्ष नागोया एशियन गेम्सवर आहे. “मला जपानमध्ये मी किती पुढे जाऊ शकते हे पाहायचे आहे. सध्या एशियन गेम्स हेच माझे एकमेव लक्ष्य आहे,” असे ती म्हणाली.

नागोयातील कामगिरीनंतरच पुढील ऑलिम्पिकच्या तयारीचे नियोजन केले जाणार आहे. एशियन गेम्समध्ये मीराबाई पाच सदस्यीय भारतीय वेटलिफ्टिंग संघाचे नेतृत्व करणार आहे.