पाकड्यांना लोळवले, भारताची फायनलमध्ये धडक!

आशियाई क्रीडा स्पर्धा २०२६ मध्ये भारतीय पुरुष हॉकी संघाने पाकिस्तानला ४-३ अशा फरकाने पराभूत करत अंतिम फेरीत दिमाखात प्रवेश केला. भारत-पाकिस्तान यांच्यातील या अटीतटीच्या उपांत्य सामन्यात भारतीय संघाने सुरुवातीला ३-० अशी भक्कम आघाडी घेतली होती. मात्र, पाकिस्तानने जोरदार पुनरागमन करत सामना ३-३ असा बरोबरीत आणला. सामना शूटआऊटकडे जाण्याची शक्यता निर्माण झाली असतानाच अभिषेकने अखेरच्या क्षणी निर्णायक गोल झळकावत पाकिस्तानच्या आशांवर पाणी फेरले. या विजयासह गतविजेत्या भारताने आणखी एक पदक निश्चित केले असून आता संघाचे लक्ष्य सुवर्णपदकावर आहे.

हरमनप्रीतचा दुहेरी धमाका!

भारतीय संघाने सामन्याच्या पहिल्याच मिनिटांपासून आक्रमक खेळ करत पाकिस्तानवर दबाव निर्माण केला. पाचव्या मिनिटाला भारताला पेनल्टी कॉर्नर मिळाला आणि कर्णधार हरमनप्रीत सिंहने अचूक फटक्याच्या जोरावर गोल नोंदवत भारताला १-० अशी आघाडी मिळवून दिली.

हरमनप्रीत एवढ्यावरच थांबला नाही. १३व्या मिनिटाला मिळालेल्या आणखी एका पेनल्टी कॉर्नरचे त्याने गोलमध्ये रूपांतर केले. त्यामुळे भारताची आघाडी २-० झाली. कर्णधाराच्या या दोन गोलमुळे भारतीय खेळाडूंचा आत्मविश्वास उंचावला, तर पाकिस्तानच्या बचावफळीवर दबाव वाढला.

सुखजीतचा गोल; भारताची ३-० आघाडी

दुसऱ्या क्वार्टरमध्येही भारतीय संघाने आपले वर्चस्व कायम ठेवले. २३व्या मिनिटाला सुखजीत सिंहने शानदार गोल करत भारताची आघाडी ३-० वर नेली. मनप्रीत सिंहने चेंडूवर ताबा मिळवल्यानंतर शिलानंद लकडा याने डाव्या बाजूने चालीची सुरुवात केली. गोलसमोर अचूक पास मिळाल्यानंतर सुखजीतने संधीचे सोने केले.

भारत सहज विजय मिळवणार, असे चित्र निर्माण झाले होते. मात्र, मध्यंतरापूर्वी पाकिस्तानने पुनरागमनाची सुरुवात केली. ३०व्या मिनिटाला अबू महमूदने पेनल्टी कॉर्नरवर गोल करत पाकिस्तानची पिछाडी १-३ अशी कमी केली.

पाकिस्तानचे पुनरागमन; सामना ३-३!

उत्तरार्धात पाकिस्तानने आक्रमणाची धार वाढवली. ४५व्या मिनिटाला हनान शाहिदने गोल करत भारताची आघाडी ३-२ अशी कमी केली. त्यानंतर अखेरच्या क्वार्टरच्या सुरुवातीलाच राणा वहीदने आणखी एक गोल झळकावला. त्यामुळे सामना ३-३ असा बरोबरीत आला.

तीन गोलांची आघाडी गमावल्यानंतर भारतीय संघावर दबाव निर्माण झाला. पाकिस्तानने सामना बरोबरीत आणल्यामुळे शूटआऊटची शक्यताही वाढली होती. मात्र, भारतीय खेळाडूंनी शेवटपर्यंत हार मानली नाही.

अखेरच्या क्षणी अभिषेकचा विजयी प्रहार!

सामन्याचे काही सेकंद शिल्लक असताना अभिषेकने निर्णायक गोल झळकावला आणि भारतीय चाहत्यांचा जल्लोष सुरू झाला. या एका गोलने सामन्याचे चित्र पालटले. भारताने ४-३ असा विजय मिळवत पाकिस्तानला स्पर्धेबाहेरचा रस्ता दाखवला आणि अंतिम फेरीत प्रवेश केला.

आता सुवर्णपदकासाठी भारताचा सामना दक्षिण कोरिया आणि मलेशिया यांच्यातील दुसऱ्या उपांत्य सामन्याच्या विजेत्याशी होणार आहे. पाकिस्तानविरुद्धच्या या थरारक विजयामुळे भारतीय संघाचे मनोबल उंचावले असून, अंतिम सामन्यात सुवर्णपदक पटकावण्याची संधी भारतासमोर आहे.