भारताचे वनडेत वर्चस्व, आता टी-२०तही धुमाकूळ!

वनडे मालिका २-१ अशी खिशात घातल्यानंतर टीम इंडिया आता वेस्ट इंडिजविरुद्धच्या पाच सामन्यांच्या टी-२० मालिकेसाठी सज्ज झाली आहे. मालिकेतील पहिला सामना मंगळवारी लखनऊच्या भारतरत्न श्री अटल बिहारी वाजपेयी एकाना क्रिकेट स्टेडियमवर रंगणार आहे. टी-२०मध्येही विजयी लय कायम राखण्याचा भारतीय संघाचा प्रयत्न असेल.

टी-२०त भारताचा वरचष्मा

भारत आणि वेस्ट इंडिज यांच्यात २००९ पासून आतापर्यंत ३१ टी-२० आंतरराष्ट्रीय सामने झाले आहेत. त्यापैकी भारताने २० सामन्यांत विजय मिळवला असून वेस्ट इंडिजने १० सामने जिंकले आहेत. १ सामना अनिर्णित राहिला आहे. त्यामुळे टी-२०तील हेड टू हेड आकडेवारीत भारताचे स्पष्ट वर्चस्व दिसून येते.

भारत आणि वेस्ट इंडिज यांच्यातील टी-२०तील अखेरची लढत टी-२० विश्वचषक २०२६मध्ये झाली होती. या सामन्यात भारताने ५ विकेट्सने विजय मिळवला होता. मात्र, वेस्ट इंडिजने भारताला चांगलीच झुंज दिली होती. प्रथम फलंदाजी करताना वेस्ट इंडिजने २० षटकांत ४ विकेट्स गमावत १९५ धावा केल्या. भारताने दमदार पाठलाग करत ४ चेंडू राखून लक्ष्य गाठले.

एशियन गेम्सच्या सुवर्णपदकानंतर आत्मविश्वास उंचावला

श्रेयस अय्यरच्या नेतृत्वाखालील भारतीय संघ नुकताच एशियन गेम्स २०२६मध्ये सुवर्णपदक जिंकून आला आहे. सलामीवीर अभिषेक शर्मा सध्या भन्नाट फॉर्ममध्ये असून पाकिस्तानविरुद्धच्या अंतिम सामन्यातही त्याने तुफानी अर्धशतक झळकावले होते.

मात्र, वैभव आणि संजू सॅमसन यांना एशियन गेम्समध्ये अपेक्षित कामगिरी करता आली नव्हती. त्यामुळे वेस्ट इंडिजविरुद्धच्या मालिकेत हे दोन्ही आक्रमक फलंदाज आपला ठसा उमटवण्यासाठी उत्सुक असतील.

तिलक वर्माने एशियन गेम्सच्या पाकिस्तानविरुद्धच्या अंतिम सामन्यात अवघ्या २२ चेंडूंत नाबाद ५१ धावा ठोकत आपली आक्रमकता दाखवून दिली आहे.

गोलंदाजीत नव्या चेहऱ्यांवर भिस्त

भारतीय संघाच्या गोलंदाजी आक्रमणात मात्र अनुभवाची काहीशी कमतरता जाणवू शकते. वेगवान गोलंदाजीची धुरा अर्शदीप सिंह सांभाळणार असून त्याला प्रिन्स यादव आणि मयंक यादव यांची साथ मिळणार आहे.

वेस्ट इंडिजही देणार कडवी झुंज

दुसरीकडे, वनडे मालिकेत भारताला कडवी झुंज देणारा वेस्ट इंडिज संघ टी-२० मालिकेतही दमदार पुनरागमन करण्याच्या निर्धाराने मैदानात उतरेल. शेरफेन रदरफोर्ड, शिमरोन हेटमायर आणि रोमारियो शेफर्ड यांच्याकडून कॅरेबियन संघाला मोठ्या अपेक्षा आहेत. वनडे मालिकेत शानदार फॉर्ममध्ये असलेला शाई होप टी-२०तही आपली लय कायम ठेवण्याचा प्रयत्न करेल.

वेस्ट इंडिजला आपल्या गोलंदाजांकडूनही टी-२० मालिकेत अधिक प्रभावी कामगिरीची अपेक्षा असेल. त्यामुळे लखनऊतील पहिल्याच सामन्यात भारत-वेस्ट इंडिजमध्ये फलंदाजी विरुद्ध गोलंदाजीचा रोमांचक सामना पाहायला मिळण्याची शक्यता आहे.