अजय देवगणच्या बंगल्यातील अनधिकृत बांधकामावर हातोडा

बॉलिवूड अभिनेता अजय देवगण याच्या मुंबईतील जुहू परिसरातील बंगल्यातील अनधिकृत बांधकामावर काही भाग मुंबई महापालिकेने पाडला आहे. आवश्यक परवानग्या न घेता बांधकाम आणि अंतर्गत बदल केल्याच्या आरोपावरून ही कारवाई करण्यात आली. महापालिकेने १० सप्टेंबर रोजी काम थांबवण्याची नोटीस बजावली होती. मात्र, नोटिशीनंतरही काम सुरू असल्याचे आढळल्याने शनिवारी, १७ ऑक्टोबर रोजी महापालिकेच्या अधिकाऱ्यांनी कारवाई केली.

अजय देवगणचा हा बंगला जुहू येथील कपोल को-ऑपरेटिव्ह हाउसिंग सोसायटीमध्ये असून, त्याचे क्षेत्रफळ ७,८०२ चौरस फूट आहे. महापालिकेच्या म्हणण्यानुसार, बंगल्यात अंतर्गत बदल करणे, विभाजनाच्या भिंती उभारणे, खिडक्यांमध्ये बदल करणे आणि इतर संरचनात्मक कामे करण्यासाठी आवश्यक परवानग्या घेण्यात आल्या नव्हत्या. याप्रकरणी मुंबई महानगरपालिका कायद्याच्या कलम ३५४अ अंतर्गत नोटीस देण्यात आली होती. काम तातडीने थांबवून आवश्यक कागदपत्रे सादर करण्याचे निर्देशही देण्यात आले होते.

मात्र, नोटिशीनंतरही बांधकाम सुरू राहिल्याने महापालिकेच्या अधिकाऱ्यांनी घटनास्थळी जाऊन अनधिकृत ठरवण्यात आलेला भाग पाडला. या कारवाईचे दृश्यही समोर आले असून, अधिकारी हातोड्याच्या साहाय्याने बांधकाम हटवताना दिसत आहेत.

हे ही वाचा:

दिल्ली-मुंबई एक्स्प्रेसवेवर बस उलटून आठ जणांचा मृत्यू

‘जागा सोडून जा’ म्हणत मालवणीत हिंदूंवर हल्ला

दिपकेला प्रतिबंधात्मक अटक; नेहा बोराची सुटका

भारतापुढे दबाव फोल; ट्रम्प यांची शुल्कवाढीवरून माघार

दरम्यान, ‘विमल वेलची’च्या जाहिरातीत दिसल्यामुळे देवगण आणखी एका वादात सापडला असून, महाराष्ट्र अन्न विकास प्राधिकरणाने (एफडीए) त्याला, तसेच अभिनेते शाहरुख खान आणि टायगर श्रॉफ यांना कारणे दाखवा नोटीस बजावली आहे. महाराष्ट्र एफडीएचे प्रमुख तुकाराम मुंडे यांनी म्हटले होते की, ही जाहिरात प्रतिबंधित उत्पादनाऐवजी वापरली जाण्याची शक्यता असल्याने ही छाननी केली जात आहे.