लडाखमध्ये पहिल्यांदाच पंचायत निवडणुकीची घोषणा!

केंद्रशासित प्रदेश लडाखमध्ये पहिल्यांदाच पंचायत निवडणुका होणार आहेत. राज्य निवडणूक आयोगाने निवडणुकीची घोषणा करताच संपूर्ण प्रदेशात आदर्श आचारसंहिता लागू झाली आहे. लडाखमधील सर्व पंचायत क्षेत्रांमध्ये २१ नोव्हेंबर रोजी मतदान होणार असून, ३० नोव्हेंबरपर्यंत संपूर्ण निवडणूक प्रक्रिया पूर्ण करण्याचे उद्दिष्ट आयोगाने ठेवले आहे.

राज्य निवडणूक आयोगाच्या माहितीनुसार, पंचायत निवडणुकीची अधिसूचना २६ ऑक्टोबर रोजी प्रशासक आणि राज्य निवडणूक आयोगाकडून जारी केली जाणार आहे. उमेदवारांना २ नोव्हेंबरपर्यंत नामनिर्देशनपत्र दाखल करता येईल. ३ नोव्हेंबर रोजी अर्जांची छाननी होईल, तर ५ नोव्हेंबरपर्यंत उमेदवारांना अर्ज मागे घेता येणार आहेत. त्यानंतर २१ नोव्हेंबर, शनिवारी सर्व पंचायत क्षेत्रांमध्ये मतदान घेतले जाईल.

जम्मू-काश्मीरपासून विभक्त झाल्यानंतर पहिली निवडणूक

लडाखमध्ये यापूर्वी २०१८ मध्ये पंचायत निवडणुका झाल्या होत्या. मात्र, त्या वेळी लडाख हा तत्कालीन जम्मू-काश्मीर राज्याचा भाग होता. जम्मू-काश्मीर पुनर्रचना कायदा, २०१९ अंतर्गत ३१ ऑक्टोबर २०१९ रोजी जम्मू-काश्मीरचे विभाजन करून जम्मू-काश्मीर आणि लडाख असे दोन केंद्रशासित प्रदेश निर्माण करण्यात आले. त्यामुळे स्वतंत्र केंद्रशासित प्रदेश म्हणून लडाखमध्ये होणाऱ्या या पहिल्याच पंचायत निवडणुका ठरणार आहेत.

हे ही वाचा:

रेहान वाड्राच्या प्रदर्शनातून आंदोलनांचे फोटो हटवले

सुटका होताच सौरव दास, आशुतोष रांकाला क्राईम ब्रँचने बोलावले

“परदेशी नेत्यांची वक्तव्ये मूर्खपणाची, अस्वीकार्य”

वाशीममध्ये दुर्गा विसर्जन मिरवणुकीत गुलाल उधळण्यावरून राडा

जम्मू-काश्मीर पंचायत राज नियम, १९९६ मधील नियम सातनुसार लडाखमधील पंचायत क्षेत्रांमध्ये सरपंच आणि पंचांच्या निवडणुका घेण्याची तरतूद आहे. त्यानुसार सर्व पंचायत क्षेत्रांमध्ये निवडणुका घेण्याचा निर्णय घेण्यात आला आहे. निवडणुका निष्पक्ष आणि शांततेत पार पडाव्यात, यासाठी आयोगाने आदर्श आचारसंहितेचे काटेकोर पालन करण्याचे निर्देश दिले आहेत. राजकीय पक्ष आणि उमेदवारांनी नियमांचे उल्लंघन करणाऱ्या किंवा अनुचित प्रकारांना प्रोत्साहन देणाऱ्या कृतींपासून दूर राहावे, असेही आयोगाने स्पष्ट केले आहे.