पंतप्रधान मोदी, कॅप्टन स्मित यांना इस्रायलच्या स्वातंत्र्यदिनी मशाल प्रज्वलनाचे निमंत्रण

इस्रायलचे पंतप्रधान बेंजामिन नेतान्याहू यांनी भारताचे पंतप्रधान नरेंद्र मोदी यांच्याशी दूरध्वनीवरून संवाद साधला. यावेळी त्यांनी पंतप्रधान मोदी यांना भारतीय वैमानिक कॅप्टन स्मित माछर यांच्यासोबत इस्रायलच्या स्वातंत्र्यदिनानिमित्त मशाल प्रज्वलित करण्यासाठी आमंत्रित केले आहे. नेतान्याहू यांनी सोशल मीडिया प्लॅटफॉर्म ‘एक्स’वर पोस्ट करून ही माहिती दिली. त्यांनी पंतप्रधान मोदी यांचा उल्लेख आपला मित्र असा करत भारत आणि इस्रायल यांच्यातील दीर्घकालीन संबंधांचे कौतुक केले.

नेतान्याहू यांनी पुढे सांगितले की, पंतप्रधान मोदी यांनी या निमंत्रणाबद्दल त्यांचे आभार मानले. भारत आणि इस्रायल हे दोन्ही देश जमीन आणि आकाश अशा दोन्ही ठिकाणी दहशतवादाविरोधात एकत्र लढत असल्याचे मत नरेंद्र मोदी यांनी व्यक्त केले. तसेच दोन्ही देशांमधील मजबूत आणि दीर्घकालीन संबंधांचेही त्यांनी कौतुक केले.

पंतप्रधान कार्यालयाने दिलेल्या माहितीनुसार, इस्रायलचे पंतप्रधान बेंजामिन नेतान्याहू यांनी नरेंद्र मोदी यांच्याशी दूरध्वनीवरून चर्चा केली. दोन्ही नेत्यांनी भारत-इस्रायल संबंधांमध्ये सातत्याने होत असलेल्या प्रगतीचे स्वागत केले. तसेच दोन्ही देशांमधील विशेष धोरणात्मक भागीदारी अधिक मजबूत करण्याच्या कटिबद्धतेचा पुनरुच्चार केला. या चर्चेदरम्यान पश्चिम आशियातील परिस्थितीवरही विचारविनिमय झाला. या प्रदेशात शांतता आणि स्थैर्य प्रस्थापित करण्याची तातडीची गरज असल्याचे दोन्ही नेत्यांनी अधोरेखित केले.

गुरुवारी झालेल्या या दूरध्वनी संभाषणादरम्यान नेतान्याहू यांनी पंतप्रधान मोदी यांना कॅप्टन स्मित माछर यांच्यासोबत इस्रायलच्या स्वातंत्र्यदिनानिमित्त मशाल प्रज्वलित करण्याचे निमंत्रण दिले. कॅप्टन स्मित यांनी दुबईहून तेल अवीवला जाणाऱ्या विमान प्रवासादरम्यान १७० हून अधिक प्रवाशांचे प्राण वाचवले होते. स्वतः जखमी झालेले असतानाही त्यांनी दाखवलेल्या धाडसामुळे आणि प्रसंगावधानामुळे अनेकांचे जीव वाचले.

हे ही वाचा:

महापौर, अमिताभ, दिलजित दोसांजसह शाळांना बॉम्बची धमकी

म्यानमारमधील शस्त्र प्रशिक्षण प्रकरणी मॅथ्यू व्हॅनडाइक भारतात परतला

तिघांच्या हत्येप्रकरणी दहशतवाद्याला दुहेरी जन्मठेप

हवामान संकटाला विकसित देश जबाबदार

नेतान्याहू यांनी आपल्या पोस्टमध्ये म्हटले, “मी माझे मित्र आणि भारताचे पंतप्रधान नरेंद्र मोदी यांच्याशी संवाद साधला. इस्रायलच्या स्वातंत्र्यदिनानिमित्त त्यांना या धाडसी भारतीय वैमानिकासोबत मशाल प्रज्वलित करण्यासाठी आमंत्रित केले. मोदी यांनी निमंत्रणाबद्दल माझे आभार मानले. भारत आणि इस्रायल हे जमीन आणि आकाश अशा दोन्ही ठिकाणी दहशतवादाविरोधात एकत्र लढत असल्याचे त्यांनी सांगितले. तसेच आमच्या मजबूत आणि दीर्घकालीन संबंधांचेही त्यांनी कौतुक केले.”