कॅप्टन स्मित मछारना यूएईकडून सन्मान

संयुक्त अरब अमिरातीने (यूएई) भारतीय वैमानिक कॅप्टन स्मित मछार आणि फ्लाय दुबईच्या कर्मचाऱ्यांचा त्यांच्या धैर्याबद्दल सन्मान केला आहे. ३० सप्टेंबर रोजी विमानाच्या कॉकपिटमध्ये घडलेल्या एका घटनेदरम्यान गंभीर जखमी असतानाही कॅप्टन यांनी कॉकपिटचा दरवाजा उघडला. त्यामुळे विमानातील कर्मचारी आणि प्रवाशांना हस्तक्षेप करून मदत करता आली आणि संभाव्य मोठी दुर्घटना टाळण्यास हातभार लागला.

यूएईचे राष्ट्राध्यक्ष शेख मोहम्मद बिन झायेद अल नाहयान यांनी या घटनेत सहभागी असलेल्या कर्मचाऱ्यांना ‘फर्स्ट क्लास ऑर्डर ऑफ झायेद II’ हा सन्मान प्रदान केला. आपत्कालीन परिस्थितीत प्रवाशांचे संरक्षण करण्यासाठी आणि विमान सुरक्षित ठेवण्यासाठी त्यांनी केलेल्या प्रयत्नांची दखल या सन्मानाच्या माध्यमातून घेण्यात आली आहे.

कॅप्टन मछार यांच्या धाडसी कृतीचे आंतरराष्ट्रीय स्तरावर कौतुक होत असतानाच हा सन्मान जाहीर करण्यात आला आहे. भारत, यूएई, इस्रायल आणि अमेरिका या देशांतील नेत्यांनी त्यांच्या धैर्याचे कौतुक केले आहे. इस्रायलनेही या भारतीय वैमानिकाला नागरी शौर्य पुरस्कार देण्याची घोषणा केली आहे. दुखापतीतून पूर्णपणे बरे झाल्यानंतर त्यांना हा पुरस्कार प्रदान केला जाणार आहे.

हे ही वाचा:

कर्जतचा प्रकल्प सुरतेचा बदला घेण्यासाठी?

तामिळनाडूमध्ये दारू खरेदीच्या नियमांत मोठा बदल

कोळशाचे प्रदूषण टाळून स्वच्छ वीजेसाठीच कर्जतचा प्रकल्प

पाकिस्तानने केला साहेबांचा गेम!

शेख हमदान यांच्या हस्ते सन्मान प्रदान

दुबईचे युवराज, संयुक्त अरब अमिरातीचे उपपंतप्रधान, संरक्षणमंत्री आणि दुबईच्या कार्यकारी परिषदेचे अध्यक्ष शेख हमदान बिन मोहम्मद बिन राशिद अल मकतूम यांच्या हस्ते कर्मचाऱ्यांना हे सन्मान प्रदान करण्यात आले.

दरम्यान, मंगळवारी शेख मोहम्मद बिन झायेद यांनी दुबईचे उपराष्ट्राध्यक्ष, पंतप्रधान आणि शासक शेख मोहम्मद बिन राशिद अल मकतूम यांच्या उपस्थितीत या कर्मचाऱ्यांची भेट घेतली.

यूएईच्या नेतृत्वाने प्रवाशांचे संरक्षण करण्यासाठी आणि विमान सुरक्षित ठेवण्यासाठी कर्मचाऱ्यांनी दाखवलेल्या धैर्याचे व व्यावसायिक कौशल्याचे कौतुक केले. नागरिकांची सुरक्षितता आणि संरक्षण सुनिश्चित करणे हे देशाचे सर्वोच्च प्राधान्य असल्याचेही नेतृत्वाने पुन्हा स्पष्ट केले.

सन्मानित कर्मचाऱ्यांनी यूएईच्या राष्ट्राध्यक्षांचे आभार मानले आणि हा सन्मान मिळाल्याचा अभिमान व्यक्त केला.

यापूर्वी ३ ऑक्टोबर रोजी शेख हमदान यांनी जखमी अवस्थेत उपचार घेत असलेल्या कॅप्टन मच्छार यांची रुग्णालयात भेट घेतली होती. कॅप्टन यांच्या धैर्याचे आणि कर्तव्यनिष्ठेचे कौतुक करताना त्यांनी सांगितले होते की, मच्छार यांनी धैर्य, जबाबदारी आणि मानवी जीवनाबद्दलची काळजी यांचे सर्वोच्च उदाहरण घालून दिले आहे.

शेख हमदान यांनी सोशल मीडियावरील पोस्टमध्ये म्हटले होते, “आमच्याकडून आणि देशाच्या नेतृत्वाकडून त्यांना मनापासून कौतुक आणि प्रशंसा.”

ते पुढे म्हणाले की, मछार हे यूएईच्या संघाचा आणि देशाच्या गौरवशाली कथानकाचा भाग आहेत, याचा देशाला अभिमान आहे. यूएईचे वर्णन करताना त्यांनी या देशाला “करुणेचा देश… शांततेचा देश… आणि जीवनाचा देश” असे संबोधले.

यूएईच्या जनरल सिव्हिल एव्हिएशन अथॉरिटीने कॅप्टन मच्छार, विमानातील कर्मचारी आणि परिस्थिती नियंत्रणात आणण्यासाठी मदत करणाऱ्या प्रवाशांचे कौतुक केल्यानंतर शेख हमदान यांनी ही भेट घेतली होती.

भारतीय वैमानिकाच्या धैर्याचे जगभरातून कौतुक

हवेत असताना दाखवलेल्या धैर्याबद्दल भारत, इस्रायल आणि अमेरिकेच्या नेत्यांनी कॅप्टन स्मित मच्छार यांचे कौतुक केले आहे.

पंतप्रधान नरेंद्र मोदी यांनी मछार यांना नायक संबोधले. इस्रायलचे पंतप्रधान बेंजामिन नेतान्याहू यांनीही त्यांच्या धैर्याची प्रशंसा केली. तर अमेरिकेचे राष्ट्राध्यक्ष डोनाल्ड ट्रम्प यांनी गंभीर जखमी असतानाही कॉकपिटचा दरवाजा उघडल्याबद्दल मच्छार यांचे कौतुक केले.

या घटनेत कॅप्टन मछार यांनी दाखवलेले धैर्य आणि कर्तव्याप्रती असलेली निष्ठा यांची आंतरराष्ट्रीय स्तरावर दखल घेण्यात आली असून, यूएईकडून मिळालेला हा सन्मान त्याचाच एक भाग आहे.