कोकण रेल्वेच्या संचालक (वित्त)पदी कविता राकेश साटवी यांची नियुक्ती

कोकण रेल्वे कॉर्पोरेशन लिमिटेडच्या संचालक (वित्त)पदाची सूत्रे कविता राकेश साटवी यांनी २३ ऑक्टोबर २०२६ रोजी स्वीकारली. वित्त, लेखा आणि व्यावसायिक कामकाज क्षेत्रातील त्यांना २४ वर्षांचा अनुभव आहे. चार्टर्ड अकाउंटंट असलेल्या साटवी यांनी ऑस्ट्रेलियातील डिकिन विद्यापीठातून ग्लोबल बिझनेस अॅडमिनिस्ट्रेशनमध्ये पदव्युत्तर पदवी आणि यूकेच्या ACCA संस्थेकडून इंटरनॅशनल फायनान्शियल रिपोर्टिंगमधील डिप्लोमा प्राप्त केला आहे.

कोकण रेल्वेत नियुक्ती होण्यापूर्वी त्या चेन्नई येथील कामराजार बंदर लिमिटेडमध्ये मुख्य वित्त अधिकारी म्हणून कार्यरत होत्या. या पदावर त्यांनी ४५० कोटी रुपयांच्या भांडवली ड्रेजिंग प्रकल्पाला मंजुरी मिळवून देण्यात आणि १,२०० कोटी रुपयांच्या प्रस्तावित आयपीओ प्रक्रियेत महत्त्वाची भूमिका बजावली. यापूर्वी त्यांनी जे. एम. बक्षी पोर्ट्स अँड लॉजिस्टिक्स, एपीएम टर्मिनल्स, भारत मुंबई कंटेनर टर्मिनल आणि कंटेनर कॉर्पोरेशन ऑफ इंडिया यांसारख्या संस्थांमध्ये विविध वित्तीय पदांवर काम केले आहे. वित्तीय नियोजन, निधी व्यवस्थापन, करप्रणाली, लेखापरीक्षण, जोखीम व्यवस्थापन आणि कॉर्पोरेट गव्हर्नन्समधील त्यांचा अनुभव कोकण रेल्वेच्या आर्थिक कामकाजासाठी उपयुक्त ठरणार आहे.
हे ही वाचा:
व्यापारबंदी झुगारून पाकिस्तानची भारताकडून ५,८७६ कोटींच्या मालाची खरेदी

एआय क्षेत्रातील कर्जसंकटामुळे २०० हून अधिक कंपन्यांचे अस्तित्व धोक्यात