नेपाळमध्ये बर्फवृष्टीचा कहर, सहा भारतीय पर्यटक डोंगरात अडकले

नेपाळमध्ये झालेल्या जोरदार बर्फवृष्टीमुळे सहा भारतीय पर्यटक संकटात सापडले आहेत. नेपाळमधील दोल्पा जिल्ह्यातील प्रसिद्ध शे-फोक्सुंडो तलाव परिसरात हे पर्यटक अडकले असून, त्यामध्ये दोन महिलांचाही समावेश आहे. अचानक झालेल्या बर्फवृष्टीमुळे संपूर्ण डोंगराळ परिसर बर्फाने झाकला गेला आहे. रस्ते आणि पायवाटा बंद झाल्याने पर्यटकांना पुढील प्रवास करणे अशक्य झाले. त्यातच मोबाईल संपर्क तुटल्याने त्यांच्या सुरक्षेबाबत चिंता निर्माण झाली. पर्यटकांची माहिती मिळताच नेपाळ प्रशासन आणि लष्कराने तातडीने बचावकार्य सुरू केले.

ही घटना शे-फोक्सुंडो ग्रामीण नगरपालिकेच्या वॉर्ड क्रमांक आठमधील धो परिसरात घडली. शनिवारी अचानक हवामान बदलून जोरदार बर्फवृष्टी सुरू झाली. त्यामुळे या भागातील जनजीवन विस्कळीत झाले. पर्यटकांसोबत असलेल्या स्थानिक गाईडने हवामान प्रतिकूल असल्याने पुढील प्रवास टाळण्याचा सल्ला दिला होता. मात्र, पर्यटकांनी हा इशारा दुर्लक्षित करून शे-फोक्सुंडो तलावाच्या दिशेने प्रवास सुरू ठेवला. त्यांनी गाईडला मागे सोडल्याने परिस्थिती अधिक गंभीर बनली. शनिवारी संध्याकाळी त्यांच्याशी संपर्क होत नसल्याचे लक्षात आल्यानंतर गाईडने प्रशासनाला माहिती दिली.
हे ही वाचा:
ममता म्हणतात, जे काफिर ते घाबरतात!

नागपुरात लॉरेन्स बिष्णोई टोळीच्या नावाने १२ सराफांना धमकी

२०२४ची लोकसभा निवडणूकच बेकायदेशीर होती!

भारताने पाचवा सामनाही गमावला, पण मालिका जिंकली!
प्रशासनाने शोधमोहीम सुरू केल्यानंतर रविवारी पर्यटकांचे नेमके ठिकाण शोधण्यात यश आले. त्यानंतर नेपाळी लष्कराच्या हेलिकॉप्टरच्या मदतीने त्यांना सुरक्षित बाहेर काढण्याची तयारी करण्यात आली. मात्र, बचावकार्यासाठी नियोजित हेलिकॉप्टरमध्ये तांत्रिक बिघाड झाल्याने मोहिमेत अडथळा निर्माण झाला. त्यामुळे पर्यायी हेलिकॉप्टरची व्यवस्था करण्याचे प्रयत्न सुरू करण्यात आले. प्रतिकूल हवामान आणि दुर्गम भौगोलिक परिस्थितीमुळे बचावकार्य हे प्रशासनासमोर मोठे आव्हान ठरले आहे.

अडकलेल्या पर्यटकांची नावे मौमिता हलदर, पियाली कोले, जजला त्रिवेदी कुमार, आदित्य सिंघा, दिपलीना बिस्वास आणि राजेश डे अशी आहेत. हे सर्वजण समुद्रसपाटीपासून सुमारे ३,६०० मीटर उंचीवर असलेल्या प्रसिद्ध शे-फोक्सुंडो तलावाला भेट देण्यासाठी गेले होते. निसर्गसौंदर्याचा आनंद घेण्यासाठी गेलेला हा प्रवास अचानक जीवघेण्या संकटात बदलला. हिमालयीन भागात पर्यटन करताना हवामानाचा अंदाज घेणे आणि स्थानिक गाईडच्या सूचनांचे पालन करणे किती महत्त्वाचे आहे, हे या घटनेने पुन्हा एकदा अधोरेखित केले आहे.