नेपाळमध्ये बर्फवृष्टीत अडकलेल्या सहा भारतीय पर्यटकांची सुटका

पश्चिम नेपाळमधील दुर्गम डोल्पा जिल्ह्यात मुसळधार बर्फवृष्टीमुळे अडकलेल्या सहा भारतीय पर्यटकांची सोमवारी (२ नोव्हेंबर) सकाळी हेलिकॉप्टरच्या मदतीने सुरक्षित सुटका करण्यात आली. जिल्ह्यातील एका वरिष्ठ पोलीस अधिकाऱ्याने ही माहिती दिली. परिसरात सुरू असलेल्या बर्फवृष्टीमुळे ३१ ऑक्टोबरपासून या भारतीय पर्यटकांशी संपर्क होऊ शकला नव्हता.

डोल्पा जिल्हा पोलीस कार्यालयाचे प्रमुख आणि पोलीस उपअधीक्षक (डीएसपी) अनिल राज गिरी यांनी सांगितले की, पर्यटकांचा ठावठिकाणा समजल्यानंतर त्यांना बाहेर काढण्यासाठी हेलिकॉप्टर पाठवण्यात आले. त्यानंतर सर्वांना जिल्ह्याचे मुख्यालय असलेल्या दुनाई येथे आणण्यात आले. सुटका करण्यात आलेल्या सहाही पर्यटकांची प्रकृती ठीक असल्याचेही त्यांनी स्पष्ट केले.

खराब हवामानामुळे हे पर्यटक अडकले होते. शे-फोक्सुंडो ग्रामीण नगरपालिकेतील दानिगढ परिसरातून त्यांची सुरक्षित सुटका करण्यात आली. हा पर्यटकांचा समूह धो ताराप येथून लोकप्रिय पर्यटनस्थळ असलेल्या शे-फोक्सुंडो तलावाच्या दिशेने ट्रेकिंग करत होता. त्याचवेळी त्यांना जोरदार बर्फवृष्टीचा सामना करावा लागला. स्थानिक माध्यमांनी दिलेल्या माहितीनुसार, ३१ ऑक्टोबर रोजी हे पर्यटक अडकल्याची माहिती मिळाल्यानंतर बचाव मोहीम सुरू करण्यात आली. मात्र, खराब हवामान आणि हेलिकॉप्टरची व्यवस्था करण्यात आलेल्या अडचणींमुळे बचावकार्यात विलंब झाला.

हे ही वाचा:

सत्ताबदल लोकशाही मार्गानेच हवा!

पंजाबमध्ये ‘आप’ला गळती; आणखी एका आमदाराचा राजीनामा

प्रदर्शनापूर्वीच ‘रामायण’च्या ११ लाखांहून अधिक तिकिटांची विक्री

दिल्लीच्या प्रदूषण मोहिमेत पहिल्याच दिवशी ६८ लाखांचा दंड

दरम्यान, नेपाळच्या इमिग्रेशन विभागाने २७ ऑक्टोबर रोजी एक सूचना जारी केली होती. त्यानुसार, जोरदार बर्फवृष्टी, हिमवादळ आणि हिमस्खलनाचा धोका लक्षात घेऊन २९ ते ३१ ऑक्टोबर या कालावधीत उंच पर्वतीय आणि हिमालयीन भागांतील प्रतिबंधित क्षेत्रांसाठी ट्रेकिंग परमिट देणे थांबवण्यात आले होते.